想講下法國對英格蘭場波......
先講法國
杜明尼治大概已搵到心目中既最佳陣式同埋陣容
由於踢06世界盃既時候仲有施丹
球隊以當代球王加上列貝利以及馬路達踢3個進攻中場
去支援亨利
韋拉同埋馬基里尼兩個防中就負責 back up
好明顯係一個 4-2-3-1 陣
但隨住施丹退休
前線又有例如賓施馬更高質既前鋒可供選擇
杜明尼治試左幾場之後已經開始用 4-4-2 陣式
而隨住馬路達今季咁沉
法國既組織進攻既重擔就落在列貝利身上
以佢而家既狀態
加上亨利以及安歷卡(或者係賓施馬)
總可以帶俾對手一定程度既威脅
小弟認為法國而家既隱憂反而係後防
馬基里尼同埋韋拉都年事以高兼傷病纏身
替補既杜拿蘭同埋兩個迪亞拉
質素唔夠兩個前輩之餘
亦唔夠經驗
費文尼又唔見得特別受重用
06年法國自淘汰賽起越踢越好
一對防中絕對係無名英雄
小弟認為當時馬基里尼同埋韋拉既重要性絕對不下於施丹
但而家睇佢兩個真係唔多似可以重拾水準
而後防既加拿斯近況沉
加上杜林越來越唔掂
(小弟甚至認為佢係全隊既最大弱點)
由中場起既中路防守咁唔穩陣
隨時令佢地負上沉重既代價
至於英格蘭
先講上半場
好明顯卡比路會為佢既最強人腳以 4-2-3-1 為藍本
前線只用朗尼踢單箭頭未嘗不可
因為令人好有信心既前鋒真係只得佢
中場方面
卡比路似乎於領軍第二場波
就決心要解決謝拉特同埋林伯特唔能夠共存既難題
因為陣式上卡比路係用兩個防中去 back up 一個進攻中場
謝拉特同埋林伯特同時出場既機會唔大
艾歷臣同埋麥卡倫應該好慚愧
消息指林伯特於開波前就已經返左酒店
唔知係傷病定係另有內情
小弟未得閒去 check
小弟只知道睇謝拉特上半場既表現幾 sharp
有巴利同埋夏格維斯同佢做 back up
令佢可以專心進攻
不過可能由於謝拉特太 sharp
就令小弟覺得碧咸同埋祖高爾變得暗淡左少少
前者可能係唔夠狀態
但後者就似乎要習慣下比之前更集中於左路進攻
後防方面
米卡李察士只要冇傷一定可以壓倒布朗踢正選
到時佢同埋左路既艾殊利高爾就可以一齊後上助攻
加埋碧咸同埋祖高爾
英格蘭最少都仲有兩翼側擊睇下
但一對閘都咁有助攻力
就令到一對防中既回防補位變得更重要
龍門方面反而應該係卡比路最大既難題
咁多個龍門都冇一個係世界級既
而就算國內再年青既赫特同埋甘普都唔見得好掂
可預期龍門問題會困擾英格蘭至少多幾年
而下半場卡比路改踢 ４－４－２
就只有簡單一個好處
冇左謝拉特後上攻堅
單用哥治屈機唔見得係上算
不過雖然佢地下半場人腳唔算好
依然好多時間控球在腳
（全場比主隊多大約１０％既控球時間）
睇得出卡比路要求球員比艾歷臣同埋麥卡倫時代更注重控球在腳
卡比路教左兩場波
就已經做左上兩手做幾年都做唔到既野
搵到卡比路接手
似乎係英格蘭足總近年除左賺錢以外最叻既野
3 comments:
英格蘭咁多年都係雷聲大雨點小，次次都係大賽無表現，真係希望卡比路可以帶到英格蘭去到另一個層次。事實上，佢都應該係近幾年英格蘭國家隊最有料既領隊。雖然門將方面幾頭痛，不過以佢地逐漸穩陣既防線，問題應該唔會太大。
但最大問題就是英格蘭班球員好多時候踢國家隊既比賽都好似谷唔起,心理質素一般,心態又好似只以入選為榮,但落場後又會產生門口狗的表現,即在球會踢到曉飛,但在國家隊就...二十多年都改善不到,弄到好多時英格蘭既踢球風格都好悶,這五至六年就更甚...
To: 舒利亞
後衛係比龍門可靠
但講真都唔係特別好
就算佢地真係好
冇好龍門既防線始終好難令人放心
To: sammysir
1)
睇英格蘭班友射12碼咁屎既表現
就知佢地既心理質素好有問題
2)
但另一方面
佢地本身既態度亦好有問題
當中好多二打六都已經當自己係天皇巨星
睇佢地有1/3隊人
對克羅地亞前一晚都仲掛住開 sex party
就已經知佢地好冇責任感
而全隊代表隊
有好多球員既表現都唔及平時踢球會
其中一個原因應該係
佢地踢國家隊時唔夠平時咁搏
全隊除左碧咸,朗尼,謝拉特
同埋夏格維斯之外
小弟數唔到仲有邊個英格蘭球員
踢國家隊 keep 到踢球會時既水準
3)
至於風格問題
比較關事既應該係教練
只要睇下當年荷度同埋拿鐵斯長期被忽視
又只得加斯居尼算得上係得到重用
就已經預左佢地既足球唔會點樣華麗
Post a Comment