幾場波想講.....
1) 車路士對曼聯
曼聯幾日前對維拉利爾既歐聯賽事明顯係尋晚場波既預演
夏格維斯,費查同埋朴智星3條友都好搶鏡
就算史高斯踢得好沉都冇所謂
打開紀錄前既主因係佢地搶羸條中場
而佢地加上里奧費甸南同埋艾夫蘭輪流後上助攻
最終用左17分鐘就令一條有卡華路早段傷出既車仔防線失守
曼聯入到波
就令人睇到冇左艾辛同埋迪高既影響真係好大
米基爾同埋波歷克對攻守都冇咩貢獻
前者除左斬過一腳靚波俾沙洛文卡奴入波
其餘時間可以講話冇腳好波
林伯特雖然發揮尚算穩定
但就令人有孤掌難鳴既感覺
車仔失波反後雖然傾力反撲
但明顯受制於曼聯一條高效率既中場
結果控球時間羸一條街
但真正有威脅既攻門唔太多
就算有亦俾祖高爾同埋安歷卡浪費晒
最終可以迫和對手都係全靠沙洛文卡奴大打爭氣波
如果尋晚車仔保唔住主場既不敗紀錄
大菲切腹都唔掂
車仔尋晚既踢法同埋佢既臨場調動都有值得商榷既餘地
未失波之前
車仔既球員冇咩走位可言
而中場更加回防不力導致失波
失波後
佢又心急下半場即刻換入唔夠狀態既杜奧巴
小弟其實認為佢既狀態只可以搏15分鐘
而佢選擇換走馬路達
就倒不如換走安歷卡
不過大菲尋晚搞到咁狼狽
遠因同佢太老定,未有替補就放走馬基里尼同埋胡禮菲臘斯有關
因為篇幅關係而在此唔多講
p.s.:
不過講到差勁
兩隊應該冇一個人及得上萊利
有睇場波既應該會明白小弟講緊咩
2) 保頓對阿仙奴
阿仙奴可能真係十年如一日
順既話攻勢真係有如水銀瀉地
防守又係時有甩漏兼長期畏高
總括而言佢地踢既......此終係全英超,甚至全歐洲最有娛樂性既足球
但小弟多年最欣賞既始終係雲加既財技
上年又賺3700萬鎊
雖然未來17年每年最少都要還2400萬鎊
但只要雲加一日唔走
兵工廠 fans 對於球會財政上同埋球隊既悅目踢法
都一定可以好樂觀
侯利亞以前有句名言:
帶隊英超排第一既未必係最佳領隊
排第尾既亦未必係最差領隊
如果考慮埋理財能力同埋悅目踢法
小弟心目中既英超領隊始終係雲加
如果今季利記又羸唔到英超
小弟希望捧盃既係兵工廠
3) 利物浦對史篤城
愛隊羸唔到波既原因有好多個:
一係早段食詐糊
二係知恥近乎勇既對手守得好集中
三係愛隊攻得唔夠耐性
四係愛隊好多球員都好累
賓帥好似忽然唔記得佢自己最叻輪換!
五係賓帥太遲用班拿約
全隊最擅長破密集既就係這個以色列國腳
偏偏賓帥要73分鐘先放佢落場
佢週中唔計補時只係踢左21分鐘
小弟好唔明點解佢好氣好力都冇得一早落場
如果佢可以一早落場
利記應該可以打破缺口
如果之後幾場波就一次咁既表現
羸多曼聯10次都唔使旨意羸英超
p.s.:
1)
明知睇利記既重播會邊睇邊狂插
小弟都係決定照睇
某程度上小弟睇波同萬千師奶睇家好月圓既心態都係一樣
2)
預告:小弟聽日同肥安平反
18 comments:
雖然要睇家好月圓，不過上網總有方法睇到。平時甚少睇強隊比賽，更加無咩機會睇到兩隊強隊對陣。今次趁自己記得加上又早開埸，決定睇下。其實主要都係睇家好月圓，不過賣下廣告又睇下波，悶埸果時又睇下咁。上半埸互有攻守，不過我覺得紅魔鬼較佔優(全埸都係)。較爭議既應該係果球禁區雲達沙撲跌安歷卡定馬路達，睇慢鏡雖然雲達沙係撲到個波先，不過的確佢係撲跌左對手，其實我覺得已經判得。當然，有唔少網友認為唔判都無咩問題。
下半埸因為家好月圓播完，所以較專心睇。睇落又唔覺車仔有咩進步。紅魔鬼仲有唔少機會擴大比數。C朗入左來後又的確幾生。可惜朗尼把握唔到黃金機會。結果轉頭就輸番粒。講番輸呢球，其實紅魔鬼今季已經唔係第一次失呢d死球。沙洛文卡奴又唔係特別高大，比佢頂入真係幾抵死。同開鑼戰對紐記失果球一樣，都係走甩哂。
To: 舒利亞
1)
其實小弟覺得車路士略佔優勢
2)
雲達沙0個球明顯係犯規啦
佢雖然係想撲波
但撲唔實個波而成個馬路達撲趺
咁冇可能唔係12碼
3)
冇左艾辛同埋迪高既車路士
即刻廢左一半功力
4)
曼聯今季防守死球真係時有唔集中既情況
你都幾細心
p.s.:
雙龍會竟然唔夠荷媽吸引?
你究竟係球迷定係劇集迷?
其實呢個問題小弟都同幾多網友講過，不過佢地話曼聯後防無左最重要果幾個，呢樣就唔知啦-.-
p.s.哈哈，如果有紐記份小弟一定全神貫注地睇，不過呢兩隊小弟都對佢地無咩好感，加上陣容又未算full team，睇少陣都ok啦=_=況且我真係覺得家好月圓幾好睇(對無線來講)睇完之後又有排無野好睇-.-
To: 舒利亞
1)
對紐記失波既時候
曼聯陣中其實都有維迪同埋雲達沙
咁既解釋唔夠說服力
2)
家好月圓都叫好睇?
唉!
如果網主有睇開tvb就唔會覺得家好月圓咁差=.="
我平時有睇家好月圓,只係星期六,日才有睇,平時因為要返舊居吃飯才會睇tvb一個劇集,以往都係睇完尖子攻略就走人,不過今次我都沒有睇車曼大戰,冇辦法啦,舊居沒有now tv,同埋個劇冇得睇重播
我覺得今屆曼聯雖然簽了貝碧托夫,同埋人腳好鼎盛(看其板凳名單就知),但係始終上兩屆已奪取太多錦標,對奪標既渴望感始終沒有利記同車仔咁強.
我今年只希望紐記唔降班就算了,
以一隊人腳唔太差,球員薪酬同埋球場容量都是英超前幾名既大球會,卻因為連年混亂同負面新聞,弄至成績咁差,對我地來說,真的無可奈何!
SORRY,應該話平時都冇睇家好月圓,因為劇情冇新意同埋唔想睇吵架才對
To: 舒利亞
小弟好少睇電視劇
因為冇時間同埋耐性之餘
亦覺得電視劇既普遍質素唔高
To: sammysir
1)
對錦標冇之前咁渴望
加上有C7這個計時炸彈
係曼聯最不安既因素
2)
只要盡快搵到新老闆同埋新領隊
(當然基瑾亦有機會回歸)
紐記未至於再次淪為護級份子掛
3)
小弟都睇過少少家好月圓
但每次都本能反應好想立即轉台
(不過阿媽有時得閒會睇下而未能如願)
感覺劇本有好多反駁位
而成套劇經常為左滿足低質素觀眾
而堆砌極多既嗌交戲份
令小弟好反感
我都覺得紐記未至於護級咁慘，不過想有出頭日，多數都又等下季。
嗌交戲同鍾嘉欣日日都喊係小弟覺得幾煩既地方，不過有夏雨同司祺姐等咁多位好戲之人，我覺得已經值得睇。
To: 舒利亞
1)
紐記如果爭唔到盃
想出頭一定要等下季
2)
鍾嘉欣個樣雖然好算眼
但演技真係差到不能再差
一見到佢喊就以為佢扮緊十歲八歲既小朋友
3)
夏雨同埋菊姐既演技其實幾浮誇
4)
司祺姐係好戲
不過所謂既金句實在太多
你幾時見過有人嗌交既時候
成日都爆到幾句金句去串對手
5)
小弟認為最搶戲既反而係米雪
做反派向來比較搶戲
今次有一例子
p.s.:
我似乎於我個地盤講得家好月圓太多
好開心有人支持阿仙奴捧盃
希望今年有機會在現場為他們喝采
To: 奀V
阿仙奴既表演略為反覆
踢6場竟然已經輸左兩場
如果仲係咁
好難攞英超冠軍
對侯城及對波圖是兩種不一樣的踢法
不一樣的結果
雲格也是天與地的心情
同樣是失球 憤然擲樽及笑得開懷
領隊不易做
但我依然對它充滿信心
我們等着瞧
To: 奀v
不過尋晚於光明球場又一劣作
踢7場就失左7分
仲要全部衰俾弱隊
今季既前路似乎幾難行
詳情寫賽後感先再講
正如你所說為甚麼會失分於弱隊有點心酸
但看到球場並不坐滿我有另一個想法 可能買票機會大些
上一季穩坐榜首多時 但守不到尾 或許今季改變策略 先放後追
To: 奀V
1)
你不如索性去睇阿仙奴既作客賽事
又或者早少少準備買佢地主場對弱隊既賽事
咁應該會比較易買飛
2)
先放後追?
你個人都幾阿Q!
利物浦反勝 你就好啦
莫非想英超加歐聯
To: 奀V
1)
簡直係近年聯賽最絕地反擊既一次
2)
兩邊既牌面只係一般
盡人事啦
Post a Comment