想講下基瑾單野......
紐卡素發表聲明否認球會炒左基瑾
亦重申希望基瑾繼續留隊
但問題係基瑾會唔會已經決定左同紐記請辭?
消息指而家基瑾仍然係紐記領隊
但就去意已決
報導話佢尋晚同法律顧問開會
傾下有咩辦法可以唔以辭職既情況下離隊
因為一旦佢向紐記請辭
佢要賠償紐記超過100萬鎊
星期一英國傳媒話紐記高層同基瑾開會
仲曾經傳出基瑾已經辭職既消息
不過紐記已經否認
而家紐記話冇炒佢之餘,仲想留佢
咁段估而家唔開心好想離開既係基瑾
佢究竟有咩咁唔滿意?
可能性有幾個:
韋斯既特殊身份
同埋紐記既買賣政策應該令佢幾不滿
而基瑾開到口想用既人
紐記又次次都搞到一鑊泡
佢話想奧雲留隊已經講左幾個月
但到而家都仲未說服佢成功續約
當初仲要奧雲仔減薪100萬鎊
奧雲成個暑假都同熱刺,曼聯,市原同埋愛華頓扯上關係
而家依然有傳聞指拖肥糖打算於1月出賤價600萬鎊搶人
最終過左轉會 deadline 奧雲都仲未走已經算紐記班高層好彩
以上所講既應該係近因
而近因就有:
過左成個暑假買人既數量同埋花費
顯然唔足以滿足基瑾
而買既人又原來未必一定經基瑾過目
其中一個例子就係干沙里斯
佢老人家會點唸
而佢開晒口話要用(同埋最終用左)巴頓
就因而得罪左老闆艾殊利
而佢話要留既占士米拿又俾韋斯高價賣走左
(不過占士米拿單野小弟覺得韋斯可以做既野唔多
因為條冇料既反骨仔明顯因為新約問題而想轉投維拉)
堆晒所有野就星期一,二兩日同老闆以及其他高層開會
(美其名係開會
小弟覺得其實應該係搏火)
而家咁既勢
除非紐記班高層有本事令基瑾回心轉意
反則都已經可以搵定新領隊
不過如果基瑾話嫁又唔嫁
最終肯留隊既話
效果一定唔似幾個月前國米既文仙尼鬧劇
畢竟基瑾真係好有江湖地位
而班球員都超撐佢
這方面絕非隊內甚多仇家既文仙尼可以相比
2 comments:
一路都唔like請韋斯番來，根本就係明剃KK眼眉。而今次KK想走，好明顯亦都同管理層有關。其他網友矛頭直指向韋斯同埋新任主席占美尼斯。
雖然我都唔多滿意奧雲，不過KK係領隊，佢話想留個球員都留唔到，我又真係唔知呢個領隊仲有咩實權。
其他網友都有分析過呢單野。有人就話KK開會係同占美尼斯開，唔關老細事。個會佢兩個傾唔掂，KK一怒之下唔撈。而老細知道之後即刻去留KK
宜家件事仲未知點發展落去，不過我真係唔想KK走。
To: 舒利亞
紐記岩岩先有返少少起色
如果基瑾而家走左
紐記又要重頭來過
無論舒利亞,莫耶斯或者韋斯去接手
都唔似可以帶領紐記重返5-8名
Post a Comment