想講近日睇過既幾場英超
英超方面
阿仙奴雖然羸波
不過只因對手係比佢地更加唔掂既保頓
羸3:0唔足以反映佢地已經復甦
而小弟幾個月前已經同雲佩斯計過數
佢上季既所有入球全部來自2011年
當中佢冇波入既比賽
球隊不敗以及羸波既比率反而更高
已經證明將攻勢過份集中於佢身上唔係好事
但雲加似乎唔打算去改善這個弱點
當然好似禾確特既個別隊友長期唔爭氣
亦係雲加求變既障礙
不過雲佩斯下季尾就約滿
雲加既講明唔想大幅加佢人工
球隊又越來越唔似係爭標份子
佢心死跳槽又大把 offer 等住佢
單係兵工廠產品近年既最大買家曼城就被傳準備出價3000萬鎊接貨
佢走人既機會點睇都大過留隊
雲加與其例牌死撐主將 ‘going nowhere’
都真係應該的起心肝唸定 plan B
而利記雖然羸波
不過表現只係一般
卡路爾就最令小弟失望
杜格利殊廿年前同而家旗下都有唔少射手
卡路爾係最有身型優勢既一個
但佢所帶來既威脅同蘇亞雷斯,魯殊,班尼斯,比士利
甚至艾德烈治同埋羅辛度都差好遠
當中原因有二
一係佢既走動比以前踢紐記時更少
而利記亦比紐記少用長傳
二係佢就算有時肯郁都唔識走個靚位
杜sir如果唔想這項3500萬鎊既投資爛尾
就真係要調校下球隊同埋佢既踢法
否則佢既效用隨時差過當年既希斯基
曼聯方面
雖然一下子傷晒兩大箭頭
不過始終幾個後備都有返咁上下戰鬥力
加上蘭尼 on fire
攻力依然有一定保證
球隊真正既問題仍然來自後防
如果唔係迪基亞近兩場既表現係加盟以來最好
佢地近兩場隨時冇分落袋
2 comments:
感覺上利記既打法好似夾唔到卡路爾,
不過點都應該係球隊行先,
球員係去配合球隊現有既打法,
卡路爾果種衝撞式打亂章既屈機形打法,
可能真係去英冠跟大SAM或史篤城才岩佢踢,
就算返來而家既紐記,
都可能有些格格不入..
不過講真,
佢真係好似不在狀態,
估計又係私生活既問題啦...
我都覺得好奇怪,
佢D走位好似真係走錯哂,
隊友D傳中波好似唔係以佢為目標?
還是佢特登唔走入禁區接應..
總之落場就好似行行企企,夢遊緊
而家仲係零入球真係估唔到
難道真係要返家鄉閉門思過??
To: sammysir
1)
雖然卡路爾大大份
不過覺得佢其實係腳好過頭既球員
2)
佢既走位真係唔多
或者同未收晒身有關
不過就算走亦真係好有問題
3)
佢既私生活向來唔檢點
4)
如果杜sir搞佢唔點
佢可能會係比哥利摩亞以及迪奧夫
令利記更血本無歸既水貨
Post a Comment