想講兩場波
第一場係德國大炒奧地利
雖然肯定出線
不過意料之內真係冇咩值得興奮
對弱隊都失兩球仲應該球隊上下攝高枕頭好好反省
畢斯杜巴先天輸身材同埋速度
最慘仲要冇路數
無論踢閘或者中堅都整定係後防黑洞
偏偏佢無論球會同埋國家隊都長踢長有
請恕小弟無慧根明白雲高爾,希歷斯基同埋路維嗰腦唸咩
其實梅迪薩卡雖然近一季表現略為走樣
不過始終高波殺晒
用侯美斯去夾佢既效果應該唔錯
另一方面,高路斯以及普度斯基近幾年都幾乎係球隊正箭頭既鐵膽
不過出年歐國盃怕且係前者既最後一次國際性大賽
暫時來睇路維會靠馬里奧高美斯接班
不過佢無論埋門一腳(特別係處理12碼既水準),
同中場既互動,心理質素以及穩定性都同前輩有一段距離
而路維早前講過考慮同時起用奧斯爾以及馬里奧葛斯
尋晚睇到就冇類似英格蘭雙特既問題
但對住奧地利咁既弱隊
就算踢到曉飛都唔可以作準
不過路維亦總算多個 plan 揸手
第二場想講既係港甲開鑼
甘巴爾上半場居然用左閘丹尼串演中堅
無論陣式係3-4-3或者4-3-3都係超錯既決定
右路既曾錦濤雖然係箭頭出身
不過助攻無一次有威脅
回防既前隊友亨利次次都食住佢
中場既新仔顏樂楓又限於經驗同埋質素
踢左半場既結論只係得個跑字
送唔到個波上前場
前線就算多幾個足球先生都唔慌會有運行
後防失準都只係半場輸一粒
佢地其實已經執返身彩
到下半場甘巴爾將個陣執返正常
開波冇耐又靠個12碼追平
但整體發揮一般下
就算乘勢壓返住晨曦去踢
都只係失分收場
佢地最後階段仲有少少打亂章既感覺
睇完真係有少少失望
不過如果甘巴爾因今場而睇到球隊弱點
兩分又算得係咩
另一方面,大婆台報導體育新聞嗰個靚仔
聲稱羅沙度係傑志陣中比較有表現既球員
小弟夠膽講條友好可能係俾精華條片誤導左
這名西班牙中堅其實除左一次頭槌同埋兩個罰球比較搶鏡外
其餘時間其實表現平平無奇
幾次失位之餘
巴利一味勤力已經搞到佢頭都大埋
咁既表現絕對唔配成為上季既最佳11人
晨曦方面
肯搶肯拚有球味
只嫌佢地組織力一般
未知係因為新兵太多定係班波未夠班
如果Rambo搞得掂既話
遲下加埋卡爾既攻擊力應該有一定保證
2 comments:
買左今期KEYMANSOHO,
好睇過上期,
可能內容較為集中講本地聯賽及賽馬,
主題較清晰,
上期主題都很好,
但各篇的內容仍然很散,
關聯性不太夠,
同埋文字太通俗,
而今次本書封面及各頁內留下的印刷氣味亦沒有上期那麼刺鼻,
但仍然很濃,
可能是彩色印刷上的紙張出現問題,
本地甲組開鑼戰場波我都有睇直播
很佩服大哥瑜同招積,
把一場戰情咁沈悶既波講得咁緊湊,
毫無冷場,
可能季初病關係,
兩隊進攻組織傳送都仍然有極大的改善空間.
To: sammysir
1)
小弟會將你既寶貴意見轉達俾佢地知
2)
季初波
唔知爆冷多
悶戰亦多
畢竟大家都未上晒力
3)
傑志今場明顯失準
平時佢地既組織能力好好多
Post a Comment