林伯特既詐糊唔應該叫問題球
而係旁證明顯錯判
唔使慢鏡都睇到球波過晒白界
忽然覺得高科技輔助協法同埋真普選都係遙遙無期
小弟亦必須承認
英格蘭(其實又係林伯特)亦算好唔夠運
但問題係世紀誤判唔可以話係英格蘭出局既轉捩點
只可以話係佢地歷年來輸得最大鑊既轉捩點
英格蘭同埋德國都聲稱會踢進攻足球
唔同既係前者大軍壓境但冇位埋手
而除左占士以外既防守球員仲排住隊出錯
相反後者係縮後等機會先出擊
穩健既後防就成為進攻既基礎
路維既針對性部署係後防中路
由於朗尼靠爆炸力足以單挑梅迪薩卡同埋費特列治
德國既中後場可以話係圍捕朗尼
亦唔會俾佢有空間發揮佢既速度
而小豬最終趕及復出(煙幕?)
加上謝拉特有時要去邊線搵食而冇料到
最終俾到德國麻煩既就只得回勇既林伯特
而路維果然靠5人中場食糊
小豬同埋基迪拉主力防守
前面3個就墮後回防之餘再等機會突擊
雖然普度斯基同埋湯馬士梅拿繼續各自專攻一邊
不過英格蘭兩閘太多空位俾佢地發揮
都冇必要玩移型換影
而高路斯入波之餘
亦拉開空位俾中場後上
全套 4-2-3-1 反擊戰術簡單實際
加上英格蘭後防補位超差
造就對手羸夠四個一皮
是是但但台既新聞報導員話英格蘭下半場係輸突擊
但其實德國單係上半場已經有5次攻門中框
當中只有1次係來自反擊
反映德國就算踢陣地戰都足以羸波
今次誤判算係還返個人情俾德國之餘
又可以作為今屆英格蘭既下台階
實情有晒英國佬著數
心水清既都知以佢地咁既表現
其實最終都走唔遠
卡比路而家大條道理死撐出局唔關佢事
600萬鎊年薪既合約反正仲有兩年
國米又已經搵埋賓尼迪斯接手
佢唔肯劈炮根本係意料中事
睇來佢都係同曾蔭權同期退休
尾場墨西哥一樣曾經射中楣
亦同樣受害於無能球證既明顯誤判
似乎更加值得同情
一來冇咁冤枉輸第一球
打死都唔信奧蘇里奧會俾人波都偷埋
二來至少初段真係踢得仲好過阿根廷
4 comments:
球證誤判
小弟絕對認為係致英格蘭於死地
不過一件事還一件事
果球如果唔係誤判
英格蘭唔洗死?
未必
唔會話德國打得好
因為只係英格蘭打得差
小弟唔敢估英格蘭如果追番2:2
最終會唔會輸
不過明顯既係
佢地入到八強
都多數止步
宜家咪當早一場抖
卡比路要負責?
呢層緊係唔洗講
隊波打得咁差
佢實有責任
不過實情係班球員都唔抵幫
成條防線無料到
中場又只係個別球員一兩場打得叫ok
朗尼更加死哂火
尋晚真係睇到小弟發火
小弟多少都算一個英迷
見到隊波雖然有決心
但係硬係好似廢左武功咁
攻又唔掂
守又勁廢
唉......
墨西哥出局已經預左
都叫雖敗猶榮
睇落阿根廷個勢最強
唔通真係佢地威番次?
To: 舒利亞
1)
英格蘭同德國最大既分別
就係前者似係11個人各自為戰
而後者就真係似一個整體
當德國佬做到 1+1>2 既效果
英格蘭既1+1就只係等如1.5,甚至0.5
而英格蘭亦再次衰在應付唔到壓力
卡比路果然唔係心理醫生
可能搞得掂英格蘭既教練人選
怕且得返摩連奴同埋軒迪克
2)
德國18年來第3次於法定時間羸一線球隊
今場亦算係路維接手4年以來既代表作
不過唔足以令小弟對路維完全放心同埋信任
佢既臨場應變有時依然怪怪地
3)
阿根廷真係咁好?
其實佢地唔比墨西哥踢得好
後防有迪米捷利斯一日都可能好大鑊
好彩下場有森美爾復出取代貝迪斯
小弟又唔係話佢地踢得最好既
只係四場全勝
個勢只有荷蘭足以抗衡
但係佢地又有英格蘭各自為政既問題
最終真係奪冠而回
小弟都係驚訝
To: 舒利亞
4場全勝又點?
上屆佢地都大炒過塞爾維亞及黑山6:0
個勢咪又係好似好勁
最終咩收場你都記得啦
淘汰賽始終係逐場計
而家外界比較睇高阿根廷會羸德國
至少賭波公司既賠率反映咁既情況
但德國如果踢得返上場既水準
以阿根廷一條唔見得比英格蘭既防線
德國其實有機偷雞
當然美斯無論質素同埋狀態都高過朗尼
德國佬又未必睇得佢住
Post a Comment