雖然有點過時
不過都想講下幾場波
曼聯作客大炒保頓5球
講真唔多震撼
一來朗尼無論入波同埋食白果
好多時都有連續性
二來自從奧雲高尼接手保頓後
佢地好肯進攻
但防守就明顯越來越差
難為佢接受 Four Four Two 訪問仲大言大慚:
‘Can I win trophies? No doubt about it.’
曼聯可以羸咁多只係因為保頓屎
佢地今場唔集中既情度更甚於上季足總盃4強輸俾史篤城嗰鑊
打死都唔信紅魔鬼星期日對車仔仲可以咁如取如攜
保頓而家仲放風話1月放走加利卡希爾
保羅羅賓遜質低態劣
禮特又大而無當
比較有質素既新仔保利達又只係借將
而謝斯基連倫近兩季既水準又慢慢下滑
今季護級一定有佢地份
而利記雖然作客輸俾史篤城
不過中前場發揮唔差
輸既只係埋門一腳
這亦係點解熱刺可以苦戰羸狼隊既關鍵
另外,加歷查亦再次證明佢係球隊既負資產
杜格利殊係時候狠下心腸
尋晚一心唸住巴頓倒戈紐記會有好戲睇
不過真正搶鏡既就係泰拉拔同埋胡禮菲臘斯
迪奧迪同埋卡巴耶放生前者
搞到昆士借流浪上半場真係踢得幾生
而後者離開曼城亦係球迷之福
自碧咸被迫退出國際賽後
英格蘭幾個接班人各有問題
如果胡禮仔可以把握機會重生
季尾有份踢歐國盃並唔係妄想
另一邊既西甲
巴塞失分就俾傳媒批評佢地留力留出禍
但小弟就覺得唔怪得哥迪奧拿咁多
一來佢地歐聯首場要對抖多一日既AC米蘭
二來班波岩岩先踢完太公波
如果今場作客皇蘇都夫添搏殺
傷出既隨時唔止一個阿歷斯山齊士
如果係都要搵人狽鑊
首選一定係自殺性長程回傳既大衛韋拿
假波 feel 絕對拍得住當年馬達拉斯四十幾碼玩死自己龍門既笠射
最後要講既係意甲
國米同埋羅馬輸波絕對唔奇
加斯柏連尼既3後衛陣式只會進一步加劇國米既防守死穴
今場頭兩個失波就係輸佢地既所謂聯防
而安歷基成半隊波都係新兵
當中仲有幾件係係臨急抱佛腳既收購
只講默契已經夠佢地輸到仆直
p.s.:
歐聯重開就有得睇巴塞對AC米蘭
真係夫復何求
2 comments:
琴晚通頂睇紐記
不過認真係失望
亦不得不說昆士柏流浪確係比紐記實力高
成場波壓住踢
組織又流暢
反而紐記傳幾下就斷
真係....
同意SWP琴晚打得超好
不過令到佢如入無人之境既肯定係賴恩泰萊
唔係想輸打贏要
佢死球係掂，斬波亦有一手
不過防守完全唔掂
無速度既佢琴晚幾乎無一次阻到SWP
紐記唔輸絕對係靠運
不過一對中堅仍然抵讚
史堤芬泰萊護空門外，同高洛仙尼齊齊清走唔少波
而隊長雖然都間有失誤同高章，但總算守得唔錯
對面保夫萊特唔生性
咁我地呢面既三位有份落場既前鋒就應該係失禮
除左貝斯有一兩次威脅外
幾乎係無野做到
都係果句
艾美奧比幾時先會無得踢
To: 舒利亞
1)
紐記最錯就係放生左泰拉拔
其實以波論波
紐記班底唔差得過昆士借流浪
2)
之前已經講過賴恩泰萊因為冇速度
所以佢雖然可以踢好多個防守位置
不過真係唔好旨意佢可以做好防守工作
佢斬波咁醒
左/右中場先係佢既最佳位置
3)
丹巴巴亞其實更值得做正選
4)
講到口都臭
既然箭頭選擇唔多
柏度好應該索性踢4-5-1或者4-4-1-1
有利佢地爭中場
Post a Comment