幾場波想講:
1) 狼隊對曼聯
睇表現同埋戰局發展
好難想像兩隊分別來自護級組以及爭標組
如果唔係狼隊繼續唔識入波
曼聯肯定失分而回
而冇左朗尼既曼聯近乎死火
貝碧托夫根本唔係正箭頭既好人選
好彩朗尼落實復出鬥AC米蘭
否則單靠hea碧同埋馬美迪奧夫都幾大鑊
2) 艾美利亞對巴塞
之前以為米列圖先係最大隱憂
點知兩度出錯既竟然係佩奧爾
好彩有美斯入返兩球補鑊
不過講到廢其實首推伊巴
條友踢波隱形兼無定向扯火
而家要停賽加上亨利又雪到硬晒
哥迪奧拿好可能要轉用矮仔陣
不過有危就有機
因為將恩尼斯達定位前線
中場就好可能用多個工兵
只要耶耶托尼回勇
佢應該可以幫到後防好多
3) 皇馬對西維爾
連卡斯拿斯都爆鑊
防中,中堅同埋二閘都各有問題既皇馬只係失兩球根本算少
不過好彩前線有料到
如果唔係柏立守到上晒身
兼且主場門框唔幫手
入半打怕且先係最低消費
踢得最好既首推C7
條友自由人既踢法令對手好難凍結
而幾分鐘內追返1:2既入波亦係球隊既還魂丹
柏歷堅尼既調動亦好關鍵
相對於早前輸俾里昂
今次好快就下定決心豁出去
先係換走可有可無既迪亞拉同埋冇咩助攻力既艾比路亞
而後備入替既古迪同埋雲達華治都交到貨
唔花巧而高效率既踢法令球隊多左唔止一條輸血管
就算對手後段踢多個防中都頂佢地唔住
而佢及後用魯爾入替卡卡
亦反映唔再拘泥單箭頭踢法
希古恩亦都踢得唔錯
不過就真正係冇運
相對於雲加評論賓特拿踢得好但射極都唔中框
佢應該考慮季尾羅致這個真正踢得好既阿根廷射手
不過卡卡既表現就比較沉
根據柏歷堅尼既排陣習慣
中路唔會有進攻中場
卡卡雖然勤力返中路搵波踢
偏偏有時又要面對塞車既問題
以前有路人甲話卡卡可以copy施丹既踢法同C7合作
不過實情係C7既活動範圍比當年既費高更廣闊
自由度更大到係其他人去遷就佢
柏歷堅奴怕且現階段都仲未為卡卡成功定位
要做銀河艦隊既星級成員
其中一個可能難度絕對係要改變踢法
p.s.:
紐卡素大炒班士利六個一皮
一字記之曰勁
最衰冇直播睇唔到古迪利斯扮蜘蛛俠
4 comments:
估唔到巴塞會失左個榜首位
只係第二場西班牙打比仲未打
小弟認為巴塞仍然有一定信心
不過都係要睇埋歐聯
p.s.
愛隊大炒對手
無得睇直播唔開心
更得啖笑既係
小弟一入去沖涼出番來已經由0:0變3:0
遺憾既係
安歷基再傷
以及best仍然無波入
To: 舒利亞
巴塞餘下賽程雖然難踢過皇馬少少
不過皇馬既防線比巴塞更不濟
失分機會其實亦唔低
但最關鍵當然都要睇埋次循環既國家打呲
而傷兵問題以及歐聯成績
亦成為佢地既爭標變數
To: 路斯基
最新亦應該係最後既版本
法比加斯因傷缺席今日既操練
雲加透露佢將要被迫次回合對波圖既賽事
sorry!
想睇紐記6:1班士利既入球,
古迪尼斯扮蜘蛛俠既片段,
暫時只得這條片,不過質素麻麻
http://v.youku.com/v_show/id_XMTU2NjY3NTA4.html
紐記回禮果球,
高洛仙尼失波仲係好肉酸...
To: sammysir
1)
謝!
小弟之前都試過上 youtube 搵片
不過都係搵唔岩
2)
高路仙尼已經唔係第一次咁犯錯
佢之前踢西甲真係正常得多
如果賣到個唔使蝕太多既價錢
紐記或者要考慮佢既去留
Post a Comment