2012-11-20

1)
碧咸宣佈於美職聯決賽後離開洛杉磯銀河
不過佢已經否認轉戰澳職聯

Comment:
中超,J-League又或者中東雖然好肯俾錢
不過阻住佢其他副業
機會唔大

歐洲主流聯賽又唔夠體能搏足一季
不過如果轉戰速度冇咁高,競爭冇咁激烈既法甲,葡超又或者荷甲
應該仍然有力選擇性搏殺
當中唯一俾得起錢既就只有巴黎聖日耳門

而既然英超,西甲同埋意甲都踢過
轉戰法甲對佢都有一定吸引力
何況巴黎有利佢同佢老婆搞時裝副業
當日佢踢AC米蘭就被傳某程度受到老婆影響

2)
卡希爾放風有興趣於1月以借用形式短暫回巢愛華頓

Comment:
愛華頓今季表現超乎預期
不過人腳仍嫌不足

每季都捱唔足成季既費蘭尼多左時間上左前場
如果替補唔夠
肯定打唔足成季
而吉遜以及希斯貝加更加玻璃腳就更難寄予厚望
新人高文就算有驚喜
莫耶斯都唔會俾佢孭重飛

卡希爾雖然因為轉數跌watt而被賣走
不過熟識球隊運作仍會係增兵筍盤

3)
羅渣士一早表明1月會有新射手
利物浦當然繼續同多名射手扯上關係
除左史杜歷治以及禾確特兩單舊聞外
羅斯同埋謝法倫都被傳係利記既新射手人選

Comment:
史杜歷治同埋禾確特既發展遜於預期
前者肯拚之餘又唔自私
不過質素唔係頂班貨
如果貴過1500萬鎊就無謂俾車仔搵笨而又做水魚

而'衝向敵人'一直唔係正前鋒人選
埋門一腳唔似前鋒之餘
冇位佢走就等同半個廢人
就算可以收返800粒兼多隻名氣馬
不過如果冇左史達寧就真係得不償失
現階段射術雖然可能更差
但至少亦多幾年青春補救

謝法倫論波底在二人之上
搵佢打邊仲可以同史達寧雙翼齊飛
令阿蘇可以更專心埋門
不過水準飄忽又係諗唔過

羅斯重創後唔知咩嘢水準
加上傳聞佢想回歸意甲踢國米
利記要簽絕對唔係易事
不過簽到亦未必係好
佢打邊冇打中間咁好
至怕成為另一個波連尼

2012-10-27

1)

薩拉戈薩被指有興趣向基達菲羅致古爾沙

Comment:
古爾沙自從08歐國盃後加盟費倫巴治就漸走下坡
上季回流西甲亦已經唔係基達菲正選
就算後備落場都唔多靠到身材搵食
薩拉戈薩打佢主意其實冇咩著數

2)
AC米蘭被指考慮搵尹巴士頓或者列卡特救亡

Comment:
以佢地而家既人腳
點睇都唔算係班霸
總之好價既賣,想加人工既又賣
下一個被賣走既就可能係奇雲保定
好彩近年已經積極送走啲老嘢
否則更加大鑊
衰在搵新血眼光一般
叻在簽到一個艾沙拉維既同時
又入錯幾件新貨
新仔尼安加盟短時間就已被知會將於1月被賣走
雖然冇咩好材料都煮到好餸既先係大師傅
但以而家佢地既人腳未免有點兒那過
如果貝老繼續唔科水又未搞掂賣盤
俾佢搵到邊個去教都冇用

3)
艾馬同賓菲加既合約將於季尾屆滿
山度士被指打佢主意

Comment:
未來幾年主辦世界盃以及奧運
近兩年既巴西球壇亦得到較多既商業贊助
國內球會雖然未至於完全抗衡到歐美球會既挖角
不過至少多左彈藥羅致過氣老嘢

冇左甘素既山度士想簽返個playmaker絕對正路
傳聞有一定可信性

p.s.:
做教頭同打其他工一樣
做到嘢但唔識做人都係冇運行

正如孤寒鬼食冇情雞
同埋摩力克冇人走頭

前者係唔係真係唔鍾意用黑人球員
實在冇實質證據
不過教到邊都有球員唔妥佢就係事實
上場半場休息先又同人嘈交
你係老闆都未必放心俾佢教到尾
仲要而家6場聯賽都開唔到齋
不過做老闆既都爭唔落
踢亞協嗰季先走去搞青春班
基本人腳亦有不足
卓卓同埋高尼路先後走左都搵唔到新中堅
硬要防中羅拔圖墮後
效果已經打折
加上現有中前場人腳既組織能力比上季更一般
弧寒鬼得唔夠4個月去完成調校都唔怪得佢

至於摩力克
傳聞佢同人相處又係有啲問題
做左但唔俾你知點解咁做又係令人好難夾

不過話說回頭
佢先後選左45個球員同埋當中咁多新血
可能係睇到現有嗰班未必配合到佢既long-term plan(甚至現有要求)

而嗰班真正話事人唔肯合作又係令人扯火
要政苦放水就唔該合作少少
唔夠一年fing左400粒但幾近原地踏步
將來要求繼續放水既難度自然增加
堅信部份鬼頭好肯大支嘢兼呃飯食
但嗰班老屎忽老事長帶來既禍害又慌會少咩

講開做人
遠在英超既文仙尼就叻好多
輸波後至少有兩招傍身
一係轉移視線
經典例子莫過於上季歐聯輸俾拜仁後賴泰維斯唔肯出場
二係公開認衰甚至去到中東負荊請罪
你係老闆見到咁有'誠意'都心軟俾多幾次經驗

不過如果歐聯出局
英超又大fall out既話
同老闆好好'溝通'既必殺技都可能要用在下一個老闆身上

2012-10-6

1)
利物浦被指派球探觀察燕豪芬既比利時翼鋒 D.Mertens

Comment:
紐記上季都被傳打佢主意
不過傳聞身價高達1000萬鎊就當然無疾而終
最終紐記都將筆錢買左柏比ABC

對佢所知唔多
只知羸荷蘭嗰場友賽佢攞晒彩
不過佢已係近期第3個同利記扯上關係既燕豪芬球員
係唔夠球探跟多幾隊波
抑或球探慳水慳力同時間做3個report

2)
紐約紅牛被指想搵哈利列納執教

Comment:
以哈利叔咁有價有市
隨時於月內有幾份英超新工送上門
使咩自降身價去美職盟養老

講到新工
利記同埋維拉既美國老闆唔似咁快炒領隊
不過唔似因為有遠見而更似睇錢份上

諾域治,修咸頓以及雷丁等護級份子亦肯定打佢主意
不過俾唔起錢就自然機會唔大
正確點講應該係雷丁既俄羅斯老闆大把錢但出名慳家
相反昆士伯流浪既老闆咁肯使錢
識買唔識用既曉士最有機會俾哈利叔取代

p.s.:
1)
飛馬又失分
係幾冇運而拉唔開紀錄
但防線穿窿都冇咩好怨

2)
Keymansoho停刊
月頭1號唔使再去撲書
so sad!

2012-9-30

1)
阿仙奴被指打算有興趣於1月以800萬鎊收購丹尼素夫

Comment:
這名俄羅斯防中原本已經係俄超頂薪球員之一
見到侯克同埋韋素高薪加盟就又話要加人工
可見佢要求肯定唔低

雖然報導話辛尼特肯以800萬鎊賤價踢走佢
有必要搵防中既兵工廠
又可能因為馬維拿既傷患以及狀態而未必會於1月出價
不過以雲加咁慳家既性格唔似會俾佢開天殺價
就算上年盤數又賺三千幾萬鎊都係咁話

2)
利物浦近日同以下球員扯上關係:
盧斯安奴拿辛格,史杜特文,加坦,漢基蘭以及丹巴巴亞

Comment:
曼聯自上季已睇中史杜特文同埋加坦
冇錢又冇得踢歐聯既利記好難爭

而盧斯安奴拿辛格可以踢進攻中場兼兩翼
估值600萬鎊就有交易的確好吸引
不過燕豪芬亦唔似會於1月同時放走兩個主力

至於丹巴巴亞
由於佢合約既離隊特別條約已過期
加上佢今季仲fit過柏比ABC
意味要簽佢就要俾紐記開天殺價

最有興趣既反而係同富咸季尾約滿但仲未續約既漢基蘭
英國傳媒估價佢值600萬鎊
不過到左1月應該要最少打個5折
雖然佢已經31歲
不過穩定性更勝利記現時幾個中堅
就算做後備都至少比加歷查信得過

p.s.:
1)
尋日入場睇左銀羅艦隊對港版巴塞
前者同上季相比少左斬中靠高波屈機
而多左於中路靠傳送突波
效果唔算太突出只因默契輸蝕
幾場同幾年確實會有好大距離

佢地中場有好幾個球員擅長中距離射門
可以係破關方法之一
不過印象中佢地只係首場對橫濱FC先有比較多嘗試

伊達踢得比較自由
進攻中場,最前,甚至兩邊都隨時搵到佢
但同上季季初既中村估人一樣未算太適應

而南華前線少左個有威脅既正箭頭
李安度太廢而迪亞高又稍嫌獨食
後者最終由右翼位移至正箭頭就入波
某程度係因為對手一對中堅一時唔適應佢既走位

不過最深印象既係狄卡奧
肯跑肯搶又好波
佢加上轉型多左參與防守既陸志豪以及踢得好自由既伊達
就令球隊既控球能力不下於傑志
加上佢地有貼身招呼對方大腦林嘉諱
亦係尋日有運之餘既另一羸波原因

2)
利記終於開齋
so good!
不過話時話都幾擔心曉頓就快冇得撈

2012-9-24

又輸波
不過唔係輸俾曼聯
而係輸俾球證

'沒有最黑,只有更黑'既口號
可能係指運氣
不過怕且更多人認為係黑哨

唔信曼聯可以排到4-4-2-4既屈機陣式
不過當有關攔截以及俾12碼既執法尺度去到咁極端
失望難免

從來唔希望靠球證或者運氣去羸波
不過都唔想因為這些因素而輸波

假設尺度相同
如果舒維爾要見紅
雙腳飛剷既伊雲斯都唔應該有得留低
蘭尼,史高斯以及尹佩斯咁樣踢波
曼聯踢到完場亦好難齊人

如果上半場伊雲斯明顯攬趺艾加
下半場3秒內蘇亞雷斯以及史達寧
先後於禁區被侵犯
兩次都唔俾12碼
點解華倫西亞於接觸更輕微既情況下跌低
Halsey偏偏要判利記極刑

如果佢真係黑哨
曼聯要佢搞咁多嘢先羸到一球
佢賽後應該大條道理要求加錢
又如果曼聯將來再鬥曼城,巴塞,皇馬等更強既球隊
可能做黑哨既要帶埋暗器出球場

謝拉特以及利記整體發揮唔差
係5場聯賽以來最好既一場
蘇亞雷斯冇波入只因腳風唔順
以及仍然稍嫌獨食
當然曼聯唯一一個有表現既連迪加特全場都好集中

不過史達寧今場雖然牽制左艾夫蘭冇得全攻
但整體貢獻其實只係一般
大抵對手已經睇通佢幾乎次次都想扭落底線傳中
不過當將來功夫好啲而板斧又再多啲既話
應該唔會只係一個扭波版既禾確特

2012-9-23

1)
曼聯被指睇中華拉尼以及加拉塔沙雷既森密卡耶
而巴塞隆拿就被指打維迪主意

Comment:
先講巴塞
佢地明知佩奧爾既戰鬥力只會逐漸下滑
碧基亦因為咩都羸過晒而真係冇以前咁好鬥心
要搵中堅根本應該係暑假既事
最終只係趁轉會市場關閉簽到有待進一步改造既桑治
只係做左一半嘢
而家既中堅慌季內應該仲會再現
亦係打多場既11分優勢都唔太穩陣既原因

不過傳聞主角係維迪就唔多可信
一來維迪已經3字頭兼曾受重創
二來係買就暑假買左啦
三來大衛雷斯雖然唔多穩陣
不過上腳踢法巴塞更buy

曼聯方面
皇馬唔似會放走華拉尼這個長遠計劃
而森密卡耶反而有機
因為有遠見既費sir年幾前已經開始為中堅位置搵新血
不過只得兩個幾易傷既史摩寧以及菲爾鐘斯就肯定唔夠
不過這名新星其實波底唔差
上腳踢法隨時吸引到利物浦以及巴塞爭埋一份

2)
夏格維斯以及施維斯達仲未落到班
莫耶斯已否認接收前者
而後者去韋斯咸試腳失敗後
就收到印度球會 Dodsal FC 既斟酌

Comment:
愛華頓向來打仔格
吉遜短抖都已經搞到莫耶斯咁頭痕
連早前既希斯貝加都唔成事
神級玻璃腳又可以憑咩嘢落班

而如果當年既加利仔係'跑得慢,唔夠快,冇速度'既代表
豬達就係'踢得差,唔夠好,冇質素'既極品
已經仲要一把年紀

去槌仔幫試腳都預左佢衰
歐洲主流聯賽幾可肯定唔再關佢事
如果唔想轉戰印度聯賽
返法國踢中下遊球會,甚至效法當日韋托特咁踢法乙
已係比較好既選擇

查實佢兩條友加埋接近70歲
搵機會轉型做助教先正路

p.s.:
小弟係利迷
唔要手機好似搖控號咁長先睇到英超排名
今晚要爭氣!

2012-9-15

1)
利物浦被指準備於1月出價1000萬鎊收購洛蘭迪
而烏甸尼斯既巴西中堅D.拿蘭謝拉亦被傳係羅渣士既新中堅人選

Comment:
8月尾已經俾嗰CEO老點左一次
如果1月再冇射手
羅渣士殺佢都似

洛蘭迪這名西班牙兵粗中帶幼
簡直係好波版既卡路爾
如果跳樓價1000萬鎊有交易
就梗係好過貴價買土炮禾確特又或者史杜烈治

不過無論簽咩人都好
蘇亞雷斯都要改變踢法
多組織而少做埋門一腳

另一方面,羅渣士想知D.拿蘭謝拉都唔奇
佢擅長上腳既踢法會融入到利記既踢法
除非羅渣士有信心可以當年雲加咁改造到阿當斯,基昂等人
否則史基泰爾以及就快收山既加歷查都唔似好岩用

烏甸尼斯上季只係用左200萬歐元就從彭美拉斯簽到佢
而家700萬既出價應該可以打動佢地放人

2)
紐卡素近日再次同H.Maguire,麥比華以及湯馬士恩斯扯上關係
不過前者已經表明冇考慮離開錫菲聯

Comment:
3單傳聞最怪都係恩斯嗰仔嗰單
上年睇佢跟利記訪港踢7人賽
可能因為發育未完全
身體質素唔似有佢老豆咁好之餘
仲鐘意上腳到有啲獨食
上季間中睇佢又唔覺佢有咁大進步

土炮真係炒到貴晒
暑假出400萬鎊俾荷路威reject已算執返身彩
段估唔肯加多兩球於1月搶人

p.s.:
下場搵曼聯開齋!!!

2012-9-8

想講太公波

荷蘭,法國以及俄羅斯都係要重新上路既偽強隊
3個新教頭不約而同於上場熱身賽失手
而於首場具競爭性既比賽先開到齋

尹高爾大刀闊斧搵左8個23歲以下既新血
不過佢地近年既好嘢都來自中前場
佢擺明希望後防可以靠默契去幫補質素方面既不足

班波而家肯交貨都只係要話俾外界知雲馬維克有幾唔掂
長遠同尹高爾可以好好合作既機會仍係未知之數
特別係後者其實亦出名惡頂
歷年來唔妥佢既人腳足以砌到成隊明星隊
所以爛橙14年多數繼續陪跑

至於法國近幾年都幾似荷蘭
中前場個人質素偏高但冇合作性
再加條慌失失防線以及狗咬狗骨既衰格

唯一比較可取既只有教練比較正常
至少比較少同球員開火
不過前任白蘭斯更有威望都鎮唔住班球員
上季執教馬賽時曾經同個別球員冷戰既迪甘斯可以做到幾多
始終令人懷疑

俄羅斯方面
佢地人腳既老化問題其實唔好得英格蘭幾多
當日卡比路教英格蘭唔太敢去變
而家教俄羅斯都唔慌有大改變

慶幸既係外圍賽對手唔勁之餘
球員既紀律性亦肯定好過英格蘭嗰班大哥
換血阻力應該冇咁大

p.s.:
近日最關注既其實唔係足球
更唔係賣足球公仔以及波衫既小生意
而係嗰個不知所謂既國教洗腦學科

有人話讀宗教學校都未必會信教
所以唔使驚會被洗腦
但問題係你頂唔信宗教學校可以轉去其他宗教背景既學校
甚至冇宗教背景既學校
但頂唔信洗腦教育既話
有幾多人可以為仔女轉去國際學校

而學生咁細個未必個個都已經訓練到有獨立思考能力
如果內容有偏袒
好多學生隨時就咁俾人洗腦

睇眼前政壇
所謂既建設派怕左阿爺而冇人有良心表態
係人係鬼明顯不過
本地政治先天殘缺
舉手機器疊馬
狼英仲狼過隻狼

唔敢講破壞派全部都係好人
不過至少聽日送到佢地入立法會就多幾票對付惡法

2012-9-3

利記開季3戰1分
論表現唔算特別差
不過問題真係唔少

前線方面
蘇亞雷斯踢荷甲踢到曉飛都只係假象
英超節奏同埋緊身攔截絕對係兩回事
加上佢踢法有時過份獨食
勉強做晒所有嘢只會all or nothing
不過多數係後者
亦令新仔波連尼更難切局

利記七,八十年代咁勁唔止因為個別球星勁
係大家都知道好好合作就可以令一加一加埋等如三

而羅渣士希望中前場以快速互傳製造機會
不過默契未夠既結果就係搓失多過俾人逼甩
而當中場攔截以及補位都做得唔好
原本已經唔掂既防線就更加大鑊

利記3場失7球
當中有3球都係源於謝拉特既犯錯
絕非偶然
佢肯定好氣好力過香港嗰個四哥
不過絕對冇條件好似幾多前咁滿場飛
如果羅渣士肯向費sir偷師而當佢係傑斯咁用
對利記,甚至英格蘭都係好事

雷阿倫傳送功夫肯定好過軒達臣
落注於佢身上都好正路
紐尼沙軒本身質素甚高
初次上陣冇料到都唔係佢既錯
段估將來唔會只於出場同埋被換走先發覺佢既存在

學嘢總要交學費
3場失8分肯定肉赤
不過怪就怪自己根基打得唔好
如果防線有n年前咁穩
絕對有力和晒3場
所以球證唔俾12碼又或者射中門框都同賴地硬冇甚分別

下場作客新特蘭絕對難打
奧尼爾領軍下既主場戰績絕對唔失禮
只要唔好再輸一場而進一步打窒自己
返主場對曼聯開齋絕對唔奇
特別係曼聯防線亦只係五十步笑百步

p.s.:
利記唔好反映到兵工廠好似好勁
如果迪亞比正常返少少唔爆鑊就叫勁
贊堅臣咪要俾個進步獎佢

普度斯基雖然有波入
不過long term都係對基奧特較有信心
佢而家只係信心唔夠兼緊張
俾佢開到齋自然會好好多

不過佢若想去到尹佩斯既level就要識得用腦對付中堅
與其搏對手犯錯就不如把握timing食佢個位
這點絕對與撞唔撞得係兩個問題

2012-9-1

1)
保亞斯趕及於轉會市場完結前送走雲達華治以及杜斯山度士
亦將丹尼路斯外借去新特蘭

另一方面,佢就成功引入洛里斯以及丹普西
可惜既係簽唔到另一目標莫天奴

Comment:
洛里斯肯定唔係卡斯拿斯以及保方既level
不過勝在年青又有領導能力
加上本土選擇唔多兼價位更加唔合理
1200萬鎊既價錢仍算合理

中堅置多左維頓漢梗係好
不過走既走,未走既又係老弱傷殘
整體水準唔似會有好大提升

中場中路又係問題
施古臣同埋丹普西係好擅長後上攻門
不過組織能力肯定及唔上摩達歷以及雲達華治
而買貴左既達比利更係未證明到有咩咁巴閉

加上無論辛度以及利華摩亞又或者幾個新兵
都冇摩達歷控制比賽節奏既能力

不過兜兜轉轉下買斷到艾迪巴約
加上一對快翼
以及擅於後上既施古臣以及丹普西
中前場食糊擺明係靠效率

由於整體實力冇明顯增強
打入前4實在唔太樂觀

2)
皇馬於落實借用艾辛後
決定俾迪亞拉轉投安沿

Comment:
艾辛近年因為傷患
表現明顯下滑
不過只得29歲依然有大把時間搏反彈
以佢8成水準都勁過迪亞拉
皇馬今次有著數

另一方面,當年車仔既6大主力
杜奧巴同埋艾辛已走
艾殊利高爾以及林伯特就快約滿但仲未有下文
位置比較穩陣既只有泰利同埋施治

迪馬堤奧如果保得住自己個位
一定會繼續keep住換血
如果Cashy繼續好似傳聞咁獅子開大口
而林伯又堅持要佢理想既出場時間
當年既大佬肯定於季尾又少兩個

2012-8-27

1)
利物浦最終成功借用紐尼沙軒
而史比寧以及查理阿當都被指會被賣走到保頓同埋愛華頓

Comment:
利記成功搶人
主因係利記唔似兵工廠咁堅持季尾要買斷佢
紐尼沙軒踢法上幾似沙比艾朗素
摩佬擺明想捧佢長遠接班
盡可能都唔會賣走佢

話羅渣士靠打人情牌搶人
聽落合理但唔會係關鍵
因為跟過摩連奴既唔止佢一個
仲有而家接手熱刺既保亞斯

另一方面,羅渣士而家打造一個技術行先既中前場組合
連防中都係好波重要過硬朗
史比寧以及查理阿當等有效率
但始終粗枝大葉既球員就一定冇運行
後者返愛華頓又或者富咸應該有助反彈

2)
阿仙奴被指睇中卡比耶以及迪奧迪
前者值1500萬鎊
後者更值2000萬鎊

另一方面,雲加被指視捷西斯拿維斯為禾確特既1500萬鎊替補人選

Comment:
賣走桑治而加碼收購助攻冇咁勁既迪奧迪
有冇搞錯?

而當迪阿比不自量力上前助攻時
阿迪達半被迫都可以墜後補到佢個位
加上又有個張伯倫自薦扮謝拉特
用1500萬鎊收購卡比耶對佢同埋兩間球會本身都冇咩著數

另一方面,而家既兵工廠中前場新兵多
默契有限而影響組織都可以理解
不過so far睇到既係真係少左把尖刀

普度斯基踢邊嫌佢走動唔夠積極
恃住有腳頭而寧願等機會起腳都唔多願落底
而睇佢踢科隆都睇到佢唔岩踢正箭頭
埋門一腳同兩個高x斯相比都差左一皮
這方面基奧特明顯比佢值得期待

兵工廠而家最多既就係側擊球員
不過當組織平平既時候
唔夠靚交就走得幾快都冇用
唯有等辛迪卡蘇拿進一步融入球隊
徹底發揮到類似當日法比仔既作用

所以而家有冇憤性衝向敵人既禾仔都冇所謂
fing1500萬鎊簽捷西斯拿維斯
就倒不如用合理價錢搵個好防中或者兩閘

p.s.:
睇史基泰爾踢波有時真係好火
睇前唔睇後真係頂佢個掣
如果唔係有招猛虎頭槌傍身
可能真係要降格踢英冠
話時話中堅賓踢後面都可能小心過佢
佢兩個換位踢可能更有運行

2012-8-24

1)
車路士同意以800萬鎊從馬賽收購艾斯派古達

Comment:
冇左保辛華
車仔買返個正宗右閘都好正路

這名即將23歲既西班牙球員初出道踢進攻中場
可想而知一定唔會係一個冇助攻既右閘

覺得佢肯定未夠沙治奧拉莫斯既level
不過絕對夠料爭做西班牙次選右閘
雖然防守方面冇艾比路亞咁全面以及爛打
不過助攻就真係好難差過艾比路亞

2)
羅渣士透露希望於星期六前落實引入紐尼沙軒
不過報導指阿仙奴以及熱刺都對佢好有興趣

Comment:
摩達歷幾乎去硬皇馬
熱刺如果收購韋利安
倒不如去爭紐尼沙軒

一來價錢平啲
甚至借用一年睇辦都有得傾

二來佢既機動性絕對好過韋利安
英超球隊甚少於中路起用一個純進攻中場
韋利安有冇條件略為轉型亦係疑問

p.s.:
英超開鑼最sharp首推夏薩特
只要冇傷冇病
咁既水準做硬最佳年青球員
球員先生都肯定有份入選

最失望肯定係愛隊利記吞西布朗3蛋
整體表現一般之餘
與其賴球證執得過緊
不如怒插一對中堅不知所謂

如果有得選擇
史基泰爾唔續約好過
艾加過曼城或者巴塞都冇所謂
高甸8成水準都比佢地信得過

尋晚又有西班牙國家打呲
兩隊都在水準之下

中堅位置始終係巴塞隱憂
佩奧爾真係已經年老力衰
馬仔冇高度
布斯基斯亦冇速度
中堅可能先係新兵桑治最常出任既位置
當然門將亦係巴塞既另一隱憂
次回合緊張啲都多得域陀華迪斯

2012-8-15

1)
安尼達仍未落實加盟紐卡素
佢老豆透露這名荷蘭國腳要知道柏度諗住點用佢
先會決定係唔係過檔
而佢亦唔排除最終留隊

另一方面,托禾倫被指係紐記另一增兵對象

Comment:
安尼達7月中攤牌要離隊
不過最有誠意既買家只得紐記
既然人工唔見得會多好多
最緊要當然係考慮出場機會同埋岩唔岩踢

紐記中後場無論質同量都有不足
等左成個夏天先得一個澳洲牛奶咀中堅高迪
如果只係用620萬鎊
就多個可以踢閘同埋防中,甚至客串右閘既新晉國腳
都算係good deal

另一方面,紐記中前場略嫌創造力不足
既可踢箭頭,又可以踢進攻中場既托禾倫係好岩紐記
不過燕豪芬今季目標羸返聯賽
既然個別位置球員年輕偏大
冇理由放走當打又孭到飛既托禾倫

而丹巴巴亞過左特定條款既日子都未走
其他球會要搶人既難度已經大增
紐記可以講話成功留到佢
佢同柏比ABC既雙箭頭組合再繼續簡單踢法應仲有出路
加上R.艾馬菲達奴雖然未知質素如下
但至少可以打邊以及中路派牌
另一新仔比基尼馬拿又據聞速度驚人
所以如果budget有限
簽安尼達比托禾倫更上算

2)
西班牙傳媒指巴塞副主席尋日己到倫敦向阿仙奴羅致桑治
傳聞出價約1200萬鎊

Comment:
以桑治既級數
合約又仲有3年先到期
出價1200萬鎊明顯太低
都唔知係唔係西班牙報紙佬山草藥舖老闆上身--up得就up

佢既可以踢中堅以及防中
兵工廠既踢法又同巴塞類似
巴塞搵桑治絕對冇搵錯人
佢踢中堅亦至少會好過輸晒制空權既馬斯查蘭奴
不過以巴塞現時人腳輪唔到佢踢正選
留隊做必然正選好過

p.s.:
今晚無啦啦要踢太公波
俾你係球星都hea踢
不過荷蘭嗰班可能例外
話晒要向雲馬維克示威
就算作客死敵比利時往績平平都隨時反彈

另一個要攞威既人就可能係卡比路
當日教英格蘭係咁
今晚首次帶領俄羅斯都應該唔會例外
何況對手仲只係唔齊腳既科特迪瓦

2012-8-13

南韓最終保得住銅牌

大抵係多得自開賽以來一直出色既防守

同埋忽然略嫌過火但有用既硬朗攔截

相反日本始終埋門一腳平平

絕對同佢地既組織能力唔同level

決賽方面

墨西哥表現其實唔算太突出

最叻都係拖慢比賽節奏

只係巴西實在太不知所謂

今次就輪到拉菲爾達施華發波瘟

平時睇佢踢曼聯只覺佢因為貪勝不知輸而失位

估佢唔到既係條友會學人玩波

丹尼爾,馬干,卡富以及佐真奴等前輩好波過佢咁多

但都踢得實際過佢

尾段仲要同隊友嘈交就更係連品都輸埋

丹尼爾出幾成功力都夠做14年世界盃正選

但更大問題係文尼施斯講明這隊奧運隊係14年世界盃既班底

防中雖然有好人選

不過後防中路只有堤亞高達施華比較似樣

而唔知係佢既隊友太過無間道

抑或係佢帶唔起啲隊友升呢

整體效果只係一般

考慮到其他中堅人選現階段都只係二打六

就算未計中前場幾個所謂新星既化學作用比預期差

單係防後已夠文尼施斯頭痛

2012-8-5

分組賽既構思 一係為左某啲二,三線球隊或者參賽者有多啲機會參與賽事 二係唔想嗰啲所謂熱刺因為一時夙準而提早畢業 三係越多賽事意味門票以及直播既收入越多 不過弊既就係參賽者或者球隊有機會走線 足球比賽走線就十分常見 今次奧運亦有部份球隊明顯走線 講到出口因為唔想舟車勞頓而唔想羸南非既有日本女足 結果7個正選亦得以休息 守死一人球隊巴西絕對唔意外 當然巴西輸俾實力一般既英國而落左下線 亦有走線避開美國之嫌 男足方面 亦有評論指塞內加爾為左避開巴西而走線 不過都係8強出局就自然不了了之 講返男女子4強 美國女足對住格食格既加拿大 加上往績天下無敵 根本半隻腳入左決賽 但日本已係眾矢之的 對住表現有進步既法國根本只係五五波 防守會係佢地爭入決賽既最大本錢 男足方面 自從西班牙同埋烏拉圭兩大對手爆冷分組賽收皮 已係巴西金牌零的突破既最好機會 咁都脫腳就唔知要再等到幾時 不過防線方面都有唔少漏洞 防備龍門同埋一對中堅都踢到慌失失 係佢地既最大隱憂 其餘3隊賽前只係黑馬 南韓攻力一般 不過防守唔錯又有啲運仔 日本就擅長反擊 不過埋門一腳只係一般 比較有好感既係墨西哥 夠機動之餘亦有個人技術 杜斯山度士既表現雖未至於好似當日初於巴塞響朵咁sharp 但至少似返個高質球員 真心希望佢奧運賽後離開英超

2012-7-30

1) 紐卡素被指視雷米為增兵對象 Comment: 阿仙奴同埋熱刺一直都被指打佢主意 輸晒前景同埋財力 紐記要爭當然係勁難 雖然丹巴巴亞一直被傳離隊 雷米既速度又係而家紐記前線所欠缺 不過未完全證明實力就已經俾人炒到貴晒 萬一買左另一個施斯就真係喊都無謂 2) 富咸被指有興趣以100萬鎊接收艾沙維 Comment: 雖然傳聞價賤到只係當日買入價既5% 不過佢而家既週薪高達9萬鎊但又偏偏冇貨交 雖然已經遲左好多 不過止蝕始終係正路選擇 但問題係以富咸既財力 就算賣走丹普西後都未必養得起肯減薪既艾沙維 Comment: 早兩日去兵工廠賽前吹風會八掛 睇住教授'貪曾'上身 一聽見尹佩斯離隊,增兵,殘陣等字眼就黑面 尋日羸唔到土產熱刺既賽後又雞咁腳就入返更衣室 雖然略欠風度但將心比己都知佢唔多好受 但眼前二線兵戰鬥力真係一般過一般 依然係空有技術但唔夠硬朗 加上中場出名多玻璃腳而後防又成日慌失失 就算最終留到尹佩斯都難有運行

2012-7-22

1) 曼聯方面承認已出價收購尹佩斯 不過報導指阿仙奴如果收唔到2000萬鎊既出價就連傾都唔會傾 而雲加就堅持要求這名荷蘭射手留隊 不過佢同埋韋舒亞以及路斯基都唔會隨隊到亞洲踢熱身賽 Comment: 上年拿斯尼擺明走硬都有隨隊出訪亞洲 原因係佢擺明等緊過曼城 不過當時曼城根本仲未開價 不過今次尹佩斯收晒風費sir會出手 加上潛在買家祖記以及曼城亦可能因為咁而焗住提早出價 與其要由亞洲仆返去英國,甚至乎意大利傾約甚至驗身 隨隊出發先至出奇 2) 消息指利物浦有興趣羅致丹普西以及阿倫 而查理阿當就可能成為引入前者既籌碼 大約可抵數500萬鎊 Comment: 查理阿當雖然擅長死球同埋後上攻門 不過論波底又或者傳送能力都只係一般 所以一定係羅渣士搵中場開刀既首選

2012-7-16

1) 報導指利物浦已拒絕紐卡素提出先借後賣卡路爾既提議 不過英國傳媒指利記仍然可能接受其他球會直接買斷佢既offer Comment: 如果真係決定唔要 咁梗係唔好拖而即刻賣走佢 不過如果只踢地面戰而冇高波屈機既plan B又等如買少個保險 倒不如至少留多佢半季 2) 柏奴亞提議雲加用尹佩斯同曼城交換迪施高 Comment: 雖然迪施高都有料亦比較年輕 不過而家係曼城有求在先 要佢地補水換人就差唔多 3) 迪贊巴被奧丹斯放棄後 準備轉戰比甲又或者法甲 Comment: 既然只可以於歐洲二流聯賽打混 倒不如去中超呃飯食 而家既中超幾近只要有名氣就有得撈 講開又講 一個只有星味,但充斥假波同埋黑哨既聯賽 咪又係表面風光

2012-7-14

1) 紐卡素被指睇中阿積士防中安尼達 而卡巴耶就被傳成為巴塞既增兵對象 Comment: 迪奧迪同咁多間大球會扯上關係 擺明等緊好offer既紐記而家搵定替補都好正路 不過鍾克講明紐記既500萬歐元出價太低 加上林拔又被指對這名小將念念不忘 以而家維拉陣中無特別出色既防中 爭埋一份都真係唔奇 另一方面,雖然基達走左 巴塞隆拿中場仍然唔怕冇兵用 卡巴耶過檔怕且只會成為另一個希比又或者艾費利 2) 報導指利物浦睇中寄誠庸 韋斯咸以及富咸都被指睇中卡路爾 而麥斯洛迪古斯就決定回流祖家,效力紐維爾舊生隊 比拿美亦可能會轉投昆士伯流浪,同曉士再次合作 Comment: Big Sam接手後既槌仔幫係無以前咁技術性 不過亦好在硬朗左兼成功重返英超 佢來季更加名正言順咁重行佢當年教保頓既舊路 簡單踢法加埋有個舊滾友隊友路蘭射住基本上已有谷底反彈既保錢 更正既係唔使減人工 輸家怕且只有蝕足2000萬鎊既利記 另一方面,與其為左亞洲市場而引入南韓謝拉特 倒不如留用多幾個岩用既舊將 3) AC米蘭方面確認將伊巴謙莫域以及堤亞高施華一併賣俾巴黎聖日耳門 報導指轉會費為6200萬歐元 Comment: 以貝老而家既環境就梗係睇錢份上 本來已經係全隊最高薪既伊巴 上季表現略為走樣早前都仲嘈住要加人工 俾人開刀早有伏線 最絕就係施華單嘢 A米先堅持唔俾佢去巴黎聖日耳門 再加人工氹佢續約 張約冇咁快完就當然可以等個更高既價錢賣走佢 不過話說回頭 而家佢地可能為左慳錢而連羅賓奴都賣埋俾馬拉加 唔計未必成事既泰維斯 佢地而家既考慮替補人選只不過係艾斯托利同埋迪斯度等新仔 當球隊一下子冇晒老嘢既經驗又冇埋兩大當打主力既戰鬥力 貝老似乎都幾冇誠意重奪意甲

2012-7-10

1) 艾利亞落實以500萬歐元(另有200萬歐元add on) 重返德甲,加盟雲達不來梅 Comment: 個價跌到咁筍 肯定有英超同埋西甲打佢主意 佢最終決定重返德甲 可能正係想去過熟識既環境搏反彈 2) 羅馬承認正考慮利物浦對波連尼既出價 Comment: 羅渣士睇住佢大 佢又岩踢4-3-3陣式 買佢應該有用 不過咁亦好可能加速卡路爾走人 佢雖然未至於有頭冇腳 不過輪腳法同埋走位又真係唔岩用 相對下比拿美,達寧,查理阿當以及軒達臣就有望留低 特別係軒達臣可以有更多時間重返中路 應該唔會令佢冇咁自暴其短 3) 大衛辛頓否認重返意甲,加盟羅馬既傳聞 而卡積亞就被指係紐卡素既新中堅人選 不過就有報導指森遜考慮過檔雷丁 而阿仙奴亦被指視迪奧迪為新中堅人選 Comment: 卡積亞雖然發展冇預期咁順利 但始終有一定質素 如果有佢去夾史堤芬泰萊又或者高路仙尼 效果可能比而家更好 畢竟卡積亞各方面既質素比較平均 何況史堤芬泰萊亦可以移去右路 當然簽到迪保治又或者其他正宗右閘就更好 p.s.: 1) 香港韋拿返中甲效力日之泉 好彩唔係重操故業做搬水 雖然佢交足戲咁話會珍惜機會 不過類似場面之前已經唔止一次出現 唔同同隊既舊隊友香港謝拉特出名勤力又搏命 最怕佢做埋'一路向西'既港甲版男主角 2) 終於可以寫返blog so good!

2012-6-8

幾經辛苦寫完分組賽形勢分析後唔見左隻USB (至少近一年寫過既稿以及部份有用文件既 soft copy 就咁冇晒 ) 自問冇時間同埋心機再從頭寫過 即管簡單講各組首,次名心水 so sorry! A組:俄羅斯,波蘭 B組:德國,荷蘭 C組:西班牙,克羅地亞 D組:法國,英格蘭 p.s.: 希望於賽事期間可以再同大家share賽後感

2012-6-5

最近超忙 唔計歐聯同埋西國盃兩場決賽 近十幾日睇得比較多既其實只有本地波 7人賽主賽冇預期咁好睇 皮亞桑波底幾好,名氣幾大都冇用 踢唔慣就係踢唔慣 連帶球隊都接連俾新特蘭同埋李斯特城收皮 維拉原本係最識踢7人賽既球隊 可惜部份主力俾英格蘭唔同梯隊徵召 嗰世少盃最佳龍門就算好波都要連續兩年飲恨 而冠軍紐卡素其實唔算踢得特別sharp 極其量只算發揮穩定 至少同當年既維拉同埋紅鑽冇得比 不過阿當甘寶似乎有啲料 即管睇下將來佢會唔會好似隨隊遊埠既小艾美老味咁 可以登陸英超 正既係名人賽 舒靈咸算係keep得唔差 表現亦算有貨交 雖然安達頓因傷入廠而再次甩底 不過其他隊友都有一定7人賽經驗 入到4強絕對正路 不過講勁就唔及 top class 同埋阿積士元老隊 前者踢慣踢熟又幾韌 4強羸森林嗰場仲係代表作 只嫌有時當自己踢緊小型球而踢得太幼細 不過佢地決賽俾阿積士大炒6:1 忽然大雨而失準只係其中一個原因 因為阿積士既波底比往年既英倫對手高唔止一個層次 加上腳風又超順 兩個笠射都靚到啪啪聲 捧盃合理 可惜既係域斯基全個賽事都因傷而只做觀眾 否則應該仲勁 至於亞協盃傑志出局就唔算係太大冷門 畢竟就算勁到巴塞咁既level 如果搓唔入禁區既話 有幾多控球權都冇用 加上狄恩真係有晒針對性部署 先靠輕微犯規令球證足停場波 又重點封埋傑志右路 不過最緊要都係有運 腳風甚順既佐迪居然近門撻Q 如果傑志先開紀錄應該會係另一個故仔 至於足總盃決賽 就好似天水圍飛馬今季後勁不繼既寫照 加上真係唔明點解佢地條防線居然會有咁多甩漏 3個盃都輸晒俾傑志都冇咩好怨 隊波下季變返中型班 部份合理人工既主力都會上山投靠大佬 少林寺本身人腳唔差 接班問題又有適度解決 加上冇亞洲賽負擔 印象中傳聞再次執教既清高輝同高世安其實有啲似 一樣以態取人亦有啲保守 不過唔會亂點鴛鴦已經夠同進一步強化既傑志死過 至於晨曦方面 列卡度再次因為條件問題 而捧盃後都冇得撈 加上多個主力離隊 如果補充到既筍貨只得基奧雲尼 戰鬥力肯定下滑之餘仲要兼顧亞協 來季成績未許樂觀 萬一新教頭弧寒鬼好似今季季初教流浪咁 硬要調教球隊既組織能力 對球隊亦未必係好事 怕且下季港甲都會係雙龍爭珠既局面 香港隊方面 對新加坡羸波但整體表現只係一般 不過林嘉瑋繼續有貨交之餘 黃洋既表現亦有進步 只係下半場不段換人後同對手亂鬥亂就有啲失望 人腳暫時唔齊同埋未調節好踢法都唔係大問題 至怕摩力克好似傳聞咁講遲下跳槽返澳職盟 畢竟靠山CEO亦已經走人 p.s.: 1) 睇左廿幾年港甲 有好幾個外援中堅特別深印象 分別係鄧尼,德士貝利,狄恩,卡根洛夫,卓卓,美亞同埋高尼路 而家連最後兩個都終於告別港甲 過左適應期後既列文越踢越好 肯定唔係名牌水貨 當今港甲最強中堅應該係佢 2) office有估波比賽 要由8強估到決賽組合 做完功課交埋form後會講下分組形勢

2012-5-24

1) 車路士下季人腳將有唔少變動 杜奧巴率先宣佈離隊 盛傳佢可能去中超又或者中東掘金 而消息指迪哥堤奧亦可能因為唔同意只得一年新約而走人 另外,保辛華以及卡奴就被傳好可能會被放棄 Comment: 咩係見好就收睇杜奧巴同埋就知 於最高峰一刻就走人 摩連奴當日教波圖同埋國米都係咁 而迪馬堤奧間中有花招 歐聯決賽用雙左閘令拜仁右路全場傳中全部落空正係最新例子 不過佢只得一招死守再突擊 如果唔係拜仁防守果然失誤 寧願靠保定都唔靠好氣好力既雲拜頓去同杜奧巴爭頂 車仔同佢已經一早收皮 阿巴咁唔識波怕且都知佢其實冇咩料 頭兩號功臣點睇都係魔獸同埋施治 不過話說回頭 阿巴使咁多錢都係要捧歐聯 如果而家哥迪奧拿同佢完成任務而落得俾佢待薄既下場 當出手已經唔夠曼城闊綽 試問將來仲有幾多頂級會肯為佢效力 2) 利物浦搵新領隊仍未有定案 消息指利記原本想搵雲高爾做總監 不過佢就更有興趣教波 Comment: 無論名牌同埋中型班教頭都冇下文 好彩時間尚算充裕 不過雲高爾真係唔係好貨色 臨場應變能力一般之餘 份人霸道就真係攞你命3000 雖然利記陣中冇咩邊個特別鍾意同領隊嘈交 難保將來會頂佢唔順 3) 拜仁被指有興趣引入查維馬天尼斯 Comment: 拜仁防中已有小豬同埋吉斯達禾既鐵膽組合 既然後防中路開窿 簽到佢都應該會用佢踢中堅 其實拜仁前線亦有增兵必要 有級數既後補真係唔多 奧歷離隊後既情況只會更嚴重 而踢法單調亦明顯單調 佢地歐聯飲恨比4強出局既巴塞隆納更抵死 p.s.: 好累 下次再寫本地波 包括亞協盃同埋7人賽

2012-5-17

1) 杜格利殊最終被利物浦辭退 Comment: 佢最錯就係過份地將球隊本土化 與其用唔合理既價錢去收購二流土炮 倒不如去其他地方增兵 而如果真係咁鍾意用自己友 一早過檔英格蘭又或者蘇格蘭好過啦 而更大鑊既係當英倫二流三寶貨不對辦 佢都仍然唔肯用返班舊將 雲加當年用錯一個丹尼臣有咩影響已經有眼睇 今季利記中場有佢地絕對係3杯大檸樂 不過無論點杜sir都係小弟小弟心目中永遠既 King Kenny 另一方面,賓尼迪斯以及馬天尼斯都被傳接手 後者主張控球在腳既踢法可能幫到利記改善組織力 不過教得掂韋根 唔代表教大球會都掂 至怕佢係另一個學神 維拉可能先係佢既 perfect match 事關中型班壓力唔大之餘 陣中牛奶咀又波底唔差 至於肥賓 小弟而家對佢為利記帶來歐聯依然心存感激 不過如果佢嗰套係掂 利記就一早羸左英超 而佢亦唔使下台啦 加上佢教左利記後慣左shopping 美國佬今季使大左後未必滿足到佢 2) 歐國盃列強教頭陸續點兵 艾曼紐臣以及韋拿杜姆已率先被尹馬維克割愛 而白蘭斯就仍然徵召養傷多過踢波既哥古夫 至於鶴臣就最終為泰利而棄用里奧費甸南 Comment: 從荷蘭同埋法國既點兵 就知佢地而家既人腳對比 馬路達同埋哥古夫狀態未足都依舊入選 只因法國近年創造力一般 拿斯尼同埋佢兩個既貢獻都未有當年施丹既一半 英格蘭方面 泰利同埋里奧費甸南只能二選其一 前者既整體表現雖然只係五十步笑百步 不過身體質素,助攻以及同後防默契都贏晒 加上費sir又出口術話唔贊成里奧入選 鶴臣既決定完全冇冷味 唯一諗爆頭就係泰利入選對士氣既影響 畢竟佢個朵已經臭晒 另一方面,鶴臣用人有時又幾難明 米卡李察士就算客串中堅都勁過尼史葛 至少有得做後備 自卡比路年代已經唔受重用既佢偏偏今次仲連後補都冇份 傷癒未fit既積基卡究竟有咩好過佢 而艾朗連儂雖然都唔係好貨色 不過今季表現點都好過達寧 而與其浪費中場一個名額 倒不如補貼前線 頭兩場分組賽只得3個箭頭真係唔多夠用 當然鶴臣咁保守 隨時擺5個中場亦係事實 3) 納比落實同廣州恆大簽約兩年半 Comment: 許老闆講過希望3至5年內羸到亞冠盃 如果佢唔反口 意味銀狐都有合理時間做嘢 而佢亦至少食得住幾個有啲料但有時唔聽話既外援 另一方面,如果連尼斯達都好似傳聞咁講會跟佢去搵人仔 上廣州睇真正球星總好過睇港甲某啲紙上明星

2012-5-14

4大聯賽相繼落幕 上星期已經收咧既德甲仲有場德國盃 拜仁全場冇唸過死守 事實上以佢地而家既人腳只似一個穿窿既桶 何來滴水不漏 輸到1:3仲似開始為歐聯決賽試陣 以波論波 多蒙特進攻點比拜仁更多 組織能力亦更強 今場羸波以及稱霸德甲都合理 至於做唔做到3連霸就要睇一眾高層點去平衡兩條戰線 因為以佢地而家既板凳深度似乎唔多可能 拜仁同佢地今季於德甲以及歐聯既遭遇 正正係都冇本事兼顧兩條戰線 拜仁下半季德甲脫腳 原因除左傷兵問題 更關鍵既係佢地想成為第一隊主場稱霸歐聯既球隊 輕德甲就造就分組賽出局既多蒙特後上衛冕聯賽 英超方面 曼城捧盃都唔覺文仙尼有料到 羸波只因球員個人質素 下季能否更上一層樓就要睇後防有冇新中堅 以及球隊有咩具經驗既新血 夏薩特,卡雲尼以及法卡奧都肯定好波 不過曼城更急要搵既可能係有更多大賽經驗既老波骨 尋晚失準肯定係同壓力有關 而佢地陣中平均歐聯經驗唔太多 絕對係佢地下季再進一步既障礙 當然尼史葛,沙域以及高路托尼信唔過亦係問題 文仙尼唔夠功力再進一步就更係死症 意甲方面 AC老人院執笠對球隊影響唔大 畢竟艾基利好耐以前已經部署換血 下季同祖記仍會係兩頭馬車既爭標局面 祖記下季要兼顧歐聯 而前線仍然欠缺一個頂級射手 絕對係佢地繼續升呢既障礙 即管睇下佢地清走瘀血後係咪真係簽到尹佩斯 國米方面 全攻型4-3-2-1新陣好睇唔好食 加上後防過多老弱殘兵 下季肯定繼續難捱 如果莫拉堤屎忽痕又搵新教頭就仲濕滯

2012-5-11

1) 曼聯被指將於最快下星期從愛華頓以1000萬鎊引入巴尼斯 Comment: 艾夫蘭明顯狀態走緊下坡 更大鑊既係越來越貪勝不知輸 但助攻時又成日好似隻盲牛咁唔理timing一味向前衝 中路俾波佢既球員有時都難做 偏偏大孖(甚至細孖)又唔爭氣 中路同埋右閘雖然都各有漏洞 不過至少多啲'正常'既選擇 費sir率先為左路補返個窿都絕對正路 不過巴尼斯雖然擅長處理死球 但整體質素同皮亞斯差左半班 同當fit既艾殊利高爾就差得仲遠 長遠而言都唔係曼聯以及英格蘭既好選擇 2) 蘇巴根落實執教狼隊 Comment: 佢教科隆原本教得唔差 隊波1月都仲排第9就係有力證明 最終搞到自己同隊波攬炒既關鍵怕且係衰內訌 話說回頭如果經理芬克真係同佢咁唔夾 倒不如季中就易帥 至少新教頭接手後都有時間摸熟隊波 p.s.: 馬體會羸歐霸唔係奇事 不過羸到3粒就真係冇唸過 對於比爾沙旗下主攻型既既畢爾包而言 馬體會初段鬥攻本來正合胃口 先失守亦唔係大問題 但當洛蘭迪幾乎每次進攻都俾人包圍先係致命 畢爾包既進攻就咁等同冇左重心 另一方面,艾武列比達有身材又有助攻 偏偏唔帶住個腦落場 當年鍾意返祖家買人既賓尼迪斯都曾經唸過簽佢 好彩最終買入既係史基泰爾 雖然都係同一個style 質素至少好半班

2012-5-6

迪馬堤奧接手後其實冇咩花招 歐聯4強靠美利拉斯兩度突襲已係少有針對性部署 簡單講只得一招 亦係關鍵既一招 就係盡可能俾機會所有球員 成班唔妥保亞斯既老嘢同埋棄將結果即刻做嘢 戰術其實好簡單 有波在腳就攻 冇波在腳就守 迪馬提奧既功力亦同摩連奴以及軒迪克等老師傅仲有好大段距離 所以而家既佢(又或者車仔)只似係一個靠舖牛力盡力去打既新紮拳手 至於杜格利殊這個贏過晒本土所有錦標既教頭 點睇都係老師傅 不過老嘢有時會回塘 但更大鑊既係硬頸 軒達臣咁既料 達寧咁唔穩定既狀態 居然可以有咁多出場時間 無非係唔肯面對自己入錯貨既事實 再冇人照既公公都話要知所進退而去讀神學 古治同埋麥斯洛迪古斯必定步魯爾梅利斯後塵離隊 講返尋晚場波 達寧全場都唔可以於保辛華身上搵到著數 而比拿美與其四圍走 倒不如開上前線幫輕蘇亞雷斯 全場唯一合理調動就係換入卡路爾 不過佢踢盃仔醒過踢英超 季尾狀態亦好過比拿美 點解反而係後備又係令人費解 史比寧中場失拖 荷西安歷基唔係頂級左閘 全都唔係尋晚先知既事實 佢地既犯錯根本就好似交稅咁走唔甩 只係衰在唔可以申請分期而偏要於關鍵時候付出代價 當然拉爾拿封唔晒近柱又係令人失望 相對施治既神救更係相形見拙 卡路爾既問題球似係未過晒白界 (點解唔補多腳而係咁快去慶祝?!) 如果嗰個時間追得返2:2當然有機食住個勢後上 不過運氣同埋球證誤判從來都係比賽既一部份 與其羸多隻盃仔 倒不如希望今次失利令杜sir正視球隊弱點 只要適量換血 希望本身人腳唔差既利記下季至少可以重返前4

2012-5-4

1) 保地花高否認引入A.山度士既報導 佢既經理人亦有類似既回應 Comment: 就算當佢冇傷冇病 都有土炮基拔斯同佢爭位 如果維頓漢真係加盟 華美倫仲幾可能正式重返熟識既左路 所以這名經常因為助攻而失位既巴西兵走都唔奇 2) 曼城被指睇中利雲度夫斯基以及蘭奴捷亞 Comment: 蘭奴捷亞一度被形容為意大利防線新希望 不過發展似乎冇預期咁順利 一個仍然有待浸淫既後衛當然唔會特別好路數 但佢又冇高速去補位 踢英超應該會幾蝕底 Comment: 1) 利記聽晚大戰車仔爭足總盃 車仔仲有些微希望爭前4之餘 亦有個更重要既歐聯決賽未踢 利記表面睇會更有決心 不過迪馬堤奧幾日前鬥紐記都有留力 利記這方面既優勢其實唔太大 而利記中場質素稍遜於對手 與其貿然鬥搶 倒不如再靠擦鞋仔波好過 2) 朗尼上年嗰個倒掛係英超歷來最佳入球? 小弟心水反而係伯金當年嗰下經典轉身入波 又或者碧咸嗰腳笠射 至於今季金球 原本以為阿蘇嗰腳笠射羸硬 不過柏比ABC嗰腳滑翔衝力射球講真仲絕 唔講仲以為係以為係電腦特技 冇晒力隨便一拉都咁靚 真係冇嘢講

2012-5-1

1) 英格蘭足總同鶴臣簽約4年 不過當地球迷同埋傳媒都有聲音唔想代表隊由佢接手 Comment: 鶴臣教富咸,西布朗同埋芬蘭國家隊等弱隊都算合格有餘 偏偏教國米同埋利記都仆直 點睇佢都只係弱隊救星 表現冇忽似強隊既英格蘭同佢可能真係天作之合 但問題係佢食唔食得住英格蘭嗰堆大哥 2) 消息指由於香川真司唔肯續約 而令多蒙特打算季尾以500萬鎊賤賣佢 Comment: 如果真係咁平 真係大把球隊俾得起 杜sir而家傳聞俾800粒先買到伊姆隨時又買貴左 不過話說回頭冇份踢歐聯既利記又憑咩執到香川咁既筍貨 問祖記借用艾利亞反而比較實際 p.s.: 其實此問題困擾左費sir成個球季 季中兩個龍門接連神救而令人以為問題已經解決 不過近期舊病復發守 比今場框都未中更係失利關鍵 費sir今場排陣亦見問題 甚有雪味既朴智星同埋菲爾鍾斯忽然孭飛 交唔足貨都好正常 而文仙尼其實都唔見得高招 中後段已經驚死想一味靠守 毫無霸氣可言 就算最終英超冠軍失而復得都係靠球員質素 萬一 touch wood 失分俾紐記 文仙尼去多幾次杜拜謝罪都冇用

2012-4-28

雖然又係過氣 不過都想講週中既歐洲賽 吸取過首回教訓 哥迪奧拿算係有針對性部署 既要加強側擊 又要搵人頂住杜奧巴 一個疑似3-3-1-3既陣式應運而生 恩尼斯達同埋古恩卡專攻兩邊 配合入滲時間準繩既阿歷士山齊士 加上中場前前後後加埋既3個指揮官型球員 所產生到既威力係好過首回合 當然雙方各有一個中堅傷出 鬧中堅慌既巴塞當然較受影響 而哥帥這個新陣於兩側既防守仲差過上場 埋下俾美利拉斯再次偷襲得手既伏線 拉美利斯兩場都係主力防守後再忽然短跑選手上身 肯定係迪馬堤奧既針對性部署 而今次巴西氣袋把握補時階段出擊 肯定考慮到就算偷襲失手後 對手都唔夠時間再攻返轉頭 反映佢既搵食本錢除左心肺之餘仲有腦袋 上文提及哥迪奧拿只要適度調整就會仲有勝算 上半場算係做到啲嘢 不過足球比賽係互動既遊戲 臨場調動唔得都係大鑊 今次亦再次反映佢既功力同嗰啲大師傅仲有啲距離 再次面對對手打少一個後守得更加鐵桶 可以做既都係嗰幾招 中路唔得就拉邊 地波唔掂就高波 生波冇計就死球 再唔得就要靠調動個別人腳 換入基達肯定係睇中佢既截擊力強過幾個書生球員 搶波搶得快先可以更快搶返個波再攻過 思路正確但代入個case就錯晒 畢竟車仔於下半場更加放棄控球 換入'奇兵'基斯甸泰路就更加錯得離譜 佢上場忽然擔大旗但交唔到貨 信心肯定受到打擊 點解唔用上場有貨交兼比較有大賽經驗既柏圖洛迪古斯 其實於這個資訴發達到得人驚既年代 所謂既奇兵一早已經俾對手起晒底啦 冇運肯定係巴塞出局既其中一部份 不過哥帥未夠功力似乎更加關鍵 皇馬出局又係自己捉虫 拜仁早段失失慌連輸兩粒 趁佢地仲未回魂而快快手手羸夠3粒好過 當對手追返一球後等同啪左兩粒回魂丹 先從頭再谷過就更係吃力啦 貪勝不知輸同埋過份計數有時就係咁一線之差 事後孔明當然亦可以叻過摩連奴 不過真係事實 畢竟上回合佢地都係守唔到尾 摩連奴輸波後賴連場大戰又係冇風度 佢講既嘢係事實 不過點樣取捨係你自己既事 哥迪奧拿衰左都冇類似牢騷 輸左功力都羸返風度 歐霸盃方面 今季既畢爾包真係好正 洛蘭迪幾可肯定係最後一季 fing3000萬鎊就可以簽到佢 有頭有腳又當打 最緊要仲要係言行正常 文仙尼想搵佢取代腦殘都好合情合理 只怕文帥又唔識用佢而令佢成為另一個迪施高 佢地今季於聯賽對住馬體會勝負各一 主場嗰場仲少夠3蛋 偏偏馬體會而家既行情略高少少 原因可能係畢爾包仲有場盃仔決賽對巴塞 亦可能係球員既大賽(特別係決賽)既經驗多少少 不過施蒙尼既領軍經驗咪又似少過比爾沙 p.s.: 3大足球先生齊齊宴客 奇景!

2012-4-24

巴塞今季多左踢3名後防 對AC米蘭時更曾經以3-3-4陣式應戰 丹尼爾以及艾迪安奴都係攻強守弱 隊友就算再勤力都有時難免補唔初位 後者雖然可以踢晒兩邊 助攻力以及活力都好過大佢幾年既艾比度 不過最重要既防守能力偏偏唔合格 對皇馬一戰輸既兩球佢都有啲責任 今晚巴塞再鬥車仔 避免好似上場咁中路塞車 加強側擊係合理調動 不過兩閘亦隨時再次成為車仔既偷襲目標 萬一碧基趕唔切傷癒(抑或解凍) 再失制空權就仲大鑊 就算當杜奧巴傷左唔踢得既煙霧係堅料 車仔除左A高以外既後衛都係頂得之人 09年利記於歐聯都係咁而俾佢地頂死 巴塞如果要晉級 關鍵點都係美斯 從未對車仔入波既數據係死既 事實上上場車仔既所謂死守其實唔算特別出色 唔使失波點都因為啲運仔 上場輸俾皇馬 哥迪奧拿既排陣要負上好大責任 忽然要新仔孭重飛對佢地好唔公平 如果成日都有超新星 美斯就唔會係佢口中既球壇佐敦 所以失準都唔怪得啲細路 不過哥帥咁做都無非係留力今晚 只要調整幅度正確 巴塞就算形勢輸蝕都仲有生機 p.s.: 公民力拚下出局 不過拚勁真係攞晒100分 輸波都收貨

2012-4-21

Blogger轉新版 小弟真係唔多習慣 加上公私兩忙 失蹤10日真係唔好意思 1) 紐卡素近日同多名球員扯上關係 當中包括麥克戴維斯,施古臣同埋摩西斯 Comment: 佢3個唔算好紅 不過亦有一定升值潛力 而家入貨都算係合理投資 3人當中施古臣最難簽 因為雖然賀芬咸肯以400萬歐元放人 不過除非歐洲賽資格打動到佢 否則佢俾史雲斯買斷既機會始終最大 而麥克戴維斯踢法上似路蘭 不過波底更好 雖然佢唔似會做到一線土炮 不過保頓都未必可以長遠留得到佢 至於摩西斯 佢既爆炸力係現時紐記前線所缺乏既 不過佢既埋門一腳真係不敢恭維 禾確特都好佢多多聲 值唔值500萬鎊真係見仁見智 2) 尹佩斯早幾日被狗仔隊跟到佢去過巴塞入住既酒店 當時人當然唔認係去傾過檔 當然緊張既雲加就表態想佢於歐國盃決賽週前落實去向 Comment: 問尹佩斯係咪去見新工 等同問男人有冇去滾又或者問球員有冇打假波 死人都答你冇 而除非佢一早已經決定去向 否則雲加想佢於歐國盃表態又係得個諗字 你睇上季法比仔同埋拿斯尼就已經知邊個直正話事 p.s.: 1) 篤定降班既深水埗終於於聯賽開齋 Good Job! 2) 倫敦打呲吸引 不過西班牙國家打呲仲吸引 摩連奴往績仆直都絕對唔係九死一生 萬一碧基趕唔切復出 旨意馬仔等同放棄領空權 上季俾C7偷雞既場面隨時再現

2012-4-11

1)
AC米蘭被指有興趣以2000萬鎊接收巴洛迪利

Comment:
早前斟泰維斯
佢地就係睇死文仙尼想踢走佢而只願意先以借用形式引入佢
而家巴洛迪利嗰case都幾接近
A米近年買人算到咁盡
唔似會因為巴神係年輕土炮而忽然闊綽

話說回頭
叫得腦殘既應該唔知個死字點寫
伊巴謙又自恃抽得而連隊友都唔放過
成事既話都可以買定花生等睇戲

2)
西班牙傳媒指皇馬決定季尾放走卡華路以及迪亞拉
不過如果有球隊想簽後者
就要俾足2000萬歐元

Comment:
防中雖然重要
不過個市又未至於炒到咁誇
除非巴黎聖日耳門又或者曼城肯接貨
否則搵阿水肯咁貴接貨

3)
由於梅迪薩卡既表現未如理想
傳聞雲加打算等佢好返後賣走佢套現

另一方面,丹普西被指成為佢地1000萬鎊既增兵對象

Comment:
早前講到維頓漢咁有機會過檔
哥斯尼慢慢適應英超後既正選位置又越來越穩陣
加上唔多掂既替工又有成籮
就算當華美倫重返左路
中堅人腳仍似乎過多

不過如果真係要換血
掃都掃史基拿斯同埋佐羅先啦

另一方面,中型班大佬去左大球會後隨時只係二打六
睇利記今季嗰3個加埋半億英鎊既人辦已經知

況且下季應該有返韋舒亞
桑治同埋艾迪達已係鐵膽
雲加又咁鍾意4-3-3
丹普西肯唔肯做輪換球員先

p.s.:
88分鐘輸到1:3
補時都仲可以追得返
'好波'如果只講技術實在狹義
公民好波

溫馨提示:
睇完亞協後仲有多場歐洲波
西甲有馬德里打呲
英超亦有多場頭尾對碰
不過最吸引既都係德甲既榜首大戰

2012-4-10

想講下英超......

曼城而家俾曼聯反超前8分
作客走樣一定係原因之一
某程度雖然同運氣有關
不過近5個月只係羸過昆士伯流浪,韋根同埋維拉3隊護級份子
就點都講唔通
而當中關鍵一定係文仙尼

既然球隊主場個勢咁勁
某啲時間其實可以俾個別主力抖下
偏偏文仙尼就用得佢地幾盡
結果主力用到賤既同時
後備亦雪到硬晒
埋下慢慢耗盡領先優勢既伏線

如果條友係NBA教練
勒邦占士又或者Kobe可能每場都要打足48分鐘
而更諷刺既係佢於作客賽事所選用既人腳
其實係略差於主場

而當曾經都承認睇左5分鐘就已經想換走巴洛迪利
條友偏偏繼續盡用佢契仔
俾你係曼城班友又或者係迪施高又會點唸
特別係條友近月已經唔止一次得罪自己既馬仔

當本身已經因為要頂住曼聯後上既壓力而幾乎抖唔到氣
再搞埋咁多內訌
等同搵個膠袋笠住自己個頭去跑步

冇小相公就以為自己識打牌
應碰唔碰又有得上都上錯
有成手好牌都係咁話

雖然講左咁多
主觀願望又堅想摩連奴下季去曼城
不過又唔好以為佢一定冇得撈
事關職場總有好多因為識氹老闆而保得住份工
甚至飛黃騰達既二打六

何況佢雖然唔識教波
但總算有轉移視線既秘技
幾個月前歐聯輸波後識得炮轟泰維斯唔肯出場
季尾為左保住份工
放棄埋契仔絕對唔奇

當然俾你係下任曼城領隊
如果唔係為左向難度挑戰既都應該會踢走巴神
所以契仔走人既機會其實仲大過契爺

另一方面,而家3至6名既變數仲大
兵工廠失分最少
近年又實在有太多於季尾爭第3或者第4既經驗
歐聯席位同埋季軍席位都應該最穩陣

而熱刺方面
佢地後勁不繼既情況更甚於曼城
原因可能係板凳唔夠深度
不過要注意既係上季要兼顧歐聯
同期表現都冇趺watt得咁誇
這方面既影響未必咁大

亦曾經有人認為係作客兵工廠嗰場慘敗既後遺症
不過一場慘敗既負面影響持續個幾月亦唔多 make sense

更可能既或者係哈利連納跳槽傳聞既負面影響
熱刺於卡比路劈炮後3日大炒紐記5:0
表面睇球隊唔受影響
不過其實計埋這場波在內
熱刺近10場聯賽既得勝率急降至3成
同頭23場14勝5和相差甚遠

唔知車仔今晚對富咸會唔會又和波
不過紐記已經率先追左上來
熱刺此刻既壓力肯定比前更大
之後仲要連對4隊護級球隊
就算得失球差仲有少少優勢
歐聯席位都係未許樂觀

紐卡素既賽程亦唔易捱
對車仔既6分波大戰仲要作客
不過紐記近日5連勝後氣勢十足
柏比ABC又好似個on fire既3分神射手咁入到唔識停
同埋佢地並無其他盃賽負擔
例如車仔就要比佢地踢多3至5場硬戰
所以就算班底最弱都有一定機會

不過話說回頭
以紐記既班底要兼顧歐聯或者歐霸都係 overload
偏偏艾殊利唔似會俾好多錢去擴軍
歐洲賽對紐記既正面影響可能只會係財政方面

車仔方面
迪馬堤奧接手後於所以賽事雖然10場羸8場
托利斯同埋魯爾梅利斯既表現雖然 sharp 左好多
不過整體表現其實只屬中上
反彈既最大動力亦似乎源於個別老嘢要 show quali 俾油王睇
但既然一直有風聲老闆又想換血
個別主力為左保住份工而繼續交貨都屬正路預測

不過講賽程原來車仔最大鑊
唔止多仲要超難踢
先後要作客兵工廠同埋利記
如果兩場波加埋失多過4分都幾大鑊
所以對紐記嗰場隨時重要過盃仔決賽

2012-4-6

1)
利物浦被傳繼續為後防中路增兵
人選包括艾比奧爾以及摩辛達

Comment:
艾比奧爾早年拍住艾耶拉既表現算係唔錯
不過近年(特別係轉會皇馬後)發展停滯不前
有時就算有得踢都好似因為雪到硬晒而變得唔多穩陣
加上摩連奴擺明唔睇佢
離隊只係時間問題

佢既踢法有時稍嫌唔夠硬朗
不過擅於補位
由於艾加出名易傷
由佢去夾史基泰爾都有得唸
不過當斯洛伐克人都唔多可靠
更想睇到既係高亞迪斯可唔可以取代佢
始終有啲波底又有6呎5吋高
可塑性真係好高

至於摩辛達雖然被評為有位置感既中堅
又可以客串左閘
不過最怕只係因為希比亞於利記曾經光輝過
而帶俾大家無限幻想

2)
辛達告魯斯表態希望正式轉會貝迪斯

Comment:
佢去左西甲後既發揮其實只係一般
卡斯祖同埋莊拿芬仲搶過佢
不過總好過於曼城長坐冷板

佢下季尾約滿
今個暑假幾乎係曼城想收返啲錢既最後機會
貝迪斯賤價接貨既可能性真係最大

高士路早前其實亦斟過佢
當時仲肯用個17歲既所謂新星作為交易籌碼
只係佢表明為貝迪斯保住西甲席位先最重要而唔想走人
某程度反映佢一早已經心繫貝迪斯

p.s.:
歐聯4強雖然最鍾意巴塞
不過踢淘汰賽一次意外就足以致命
防線有隱憂唔似可以衛冕
而由以前靠大細哨到而家越來越靠黑哨
坦白講亦幾失望

歐霸方面
最弱既士砵亭唔似可以以一敵三
西甲球隊捧盃幾成定局
當中畢爾包最重歐霸而輕西甲
加上踢法最好睇
主觀願望佢地捧盃

不過比爾沙向來鍾意見好就收
隨時又再搵工跳槽
加上路蘭迪同埋查維馬天尼斯等主力有價有市
下季既畢爾包隨時改頭換面

2012-4-4

1)
邦路斯同埋馬特尼落實同祖雲達斯續約到2017年

Comment:
兩個冇咩星味既球員加盟以來都算交到貨
都算係祖記近年既成功收購

祖記今季於意甲只失17球
邦路斯雖然冇保方同埋基亞連尼咁搶鏡
但始終功不可沒
而佢既助攻效率亦係祖記3大中堅中最好
無論球會同埋國家隊都應該幾有前途
不過被傳打假波單嘢就未知會有幾大影響

而馬特尼雖然係祖記前線最冇星味既一個
但偏偏係最交到貨既一個
胡仙歷同埋波里路似乎仲未完全適應祖記踢法
祖記又已經同迪比亞路講明係最後一季
加上世界波王子基利亞雷拉既傷又唔多受干地重用

只要胡仙歷keep住進步
馬特尼同佢亦都向來肯供應俾隊友
下季意甲最強既雙箭頭可能就係佢兩個

2)
紐卡素同埋曼聯都被指睇中里爾右閘迪比治
傳聞轉會費約600萬鎊

Comment:
其實利記年半前已經被指想以250萬歐元收購佢
不過最終冇下文
這名新晉法國國腳其實亦可以串演中場
因為佢初出道既時候都試過踢這個位置

p.s.:
1)
睇完巴塞有驚無險連續4季入歐聯4強
拜完山後如果冇搞作
不妨入將軍澳睇傑志對宋蘭義安
當然如果你掛住萬能鍾把聲又或者入唔到場
J2都有得你睇

2)
Nike廣告
拿度對C7
前者原來都幾勁
http://www.youtube.com/watch?v=1Y_wJR1I-9s

2012-3-29

1)
唔介意減人工既雲邦美
表明如果當日同佢於拜仁不和既雲高爾接手燕豪芬
佢就唔會考慮回歸

Comment:
兩條友當日幾乎開拖咁滯
如果雲高爾真係接手
就算雲邦美簽左約都只會解約收場
反正於拜仁已經試過一次

另一方面,雲高爾這類所謂既強勢教頭其實功力一般
最叻已經算係阿積士年代
某程度都因為牛奶咀未夠本錢搞對抗

之前傳佢教車仔都真係得啖笑
除非阿巴肯為佢踢走晒幾個大佬輩
否則肯定繼續家衰口不停
不過由摩連奴到保亞斯都唔似有過阿巴這種待遇
又幾時輪到佢

2)
法芬被指可能以自由身加盟利物浦

Comment:
法芬唔係唔好波
不過今季未約滿個心就已經似走左
職業道德成疑既就免費都係咁話
而下季仲係唔係杜sir話事都成疑問
仲講咩買人

3)
紐記被指想從法乙 Reims 搵18歲中場 R.Amalfitano 以自由身加盟
而佢地亦被指有興趣以800萬鎊羅致韋拿杜姆

另一方面,雖然告魯爾已經續約
不過紐記依然被傳留唔到佢幾耐
報導仲話佢地已經視賓科士打為600萬鎊既替補人選

Comment:
雖然位置唔同好難比較
不過如果買賓科士打都要600粒
800粒可能只係夠買半個韋拿杜姆

p.s.:
邊睇港甲邊寫blog
真係堅正
有入波睇仲補返尋晚既遺憾

2012-3-28

1)
隨住近10場只羸1場既劣績
雲尼亞里最終冇得留低
表訓教練將會接手到季尾
而佢地隨即被指同車路士爭奪白蘭斯

Comment:
都係嗰句
隊波明明要換血但老闆又開始學人慳家
翻兜到摩連奴都冇用

而先後有傳聞指佢地想同車仔
爭奪白蘭斯同埋哥迪奧拿亦係笑話
因為當佢地連車仔棄帥保亞斯既500萬歐元年薪都已經覺得貴
仲憑咩去同車仔搶人
畢竟意大利油王可以同俄羅斯油王level既
只係干預內政既程度而唔係銀彈

雖然比爾沙,古杜連,甚至費高同埋巴治奧都係傳聞人選
不過個人估計同意大利油王有啲交情既柏蘭迪利應該最有機
一來佢雖然同意大利足總簽約到2014年
不過大賽後提前解約既例子實在多不勝數
二來亦係更重要既係佢人工應該唔高

2)
英國傳媒指阿仙奴既薪金支出增加左2000萬鎊
報導仲話雲加打算踢走多名瘀血以慳返2300萬鎊人工

Comment:
當朴主永要4萬鎊(週薪)
史基拿斯,賓特拿,卡路士韋拿同埋丹尼臣都5萬鎊
查馬克同埋艾蒙尼亞就6萬鎊
艾沙維仲要7萬5000鎊
養佢8條友每星期就已經要43萬5000鎊
離譜程度絕不下於我地無能政府養埋咁多高級廢柴

就算已經補貼借走幾件
朴主永既人工支出亦可能有贊助商補貼
餘下條數都依然大檸樂
而成日冇錢買人亦或多或少因為咁

不過話說回頭
如果波糧係同表現掛鉤
尹佩斯叫價20萬鎊都唔過份
12萬鎊續約既報導真係唔多可信
而桑治同埋張伯倫加薪到7萬5000鎊亦可能嫌少
施捷斯尼只得3萬鎊就更加無天理

p.s.:
1)
錯過皇馬零封尼科西亞
就係為左今晚A米對巴塞既入球騷
兩條都唔齊腳既防線應該會爆鑊

那些年主隊中後場唔齊腳都靠穩守突擊於歐聯決賽大炒巴塞4:0
不過而家無論係教練同埋人腳都唔係當年嗰皮
作客兵工廠既上半場亦可以用慘不忍睹去形容
雖然巴塞作客一般兼後防穿窿
不過A米靠個A貨雲巴士頓唔似可以羸到巴塞
既然鬥攻同埋死守都似死路一條
地頭唔輸其實已經有交代

2)
近年有睇小弟個blog既
可能會對一個有時留言叫wts soccer既兵迷有啲印象
原來佢而家走左去ESPN講波
尋晚熱刺對保頓既足總盃就係佢既第一擊
祝佢發展順利

2012-3-25

1)
皇馬被指想用紐尼沙軒作為交易籌碼
向賓菲加收購韋素爾

Comment:
雖然摩連奴講過唔唸住放棄紐尼沙軒
不過出場時間咁少
除非卡卡走得仲早過佢
否則下季繼續留隊都唔似係坐多過踢
不過返德甲似乎好過轉戰葡超
一來賽事水準較高
二來又冇識應問題

2)
雲加表示普度斯基單嘢仲未成事
而阿仙奴,多蒙特同埋皇馬都被指對迪施高有興趣

Comment:
迪施高適應英超後既表現明顯有進步
於曼城唔夠出場機會只因競爭太大
其實佢既高波能力絕對幫到兵工廠

不過雲加近年對4-3-3陣式情有獨鍾
迪施高同尹佩斯組成雙組頭既機會唔大
要後者多啲時間去邊線搵食又唔似可以發揮最大效用
希望佢唔會係曼城收購後者既交易籌碼

p.s.:
狼來了!
1200人既選擇比超過22萬人既選擇更有決定性
幾時先可以唔使咁無奈

2012-3-23

1)
杜奧巴個老婆被指下星期將到上海
以視察當地既生活環境
而上海申花又騰空11號波衫
令佢過檔既傳聞越傳越熱
而車仔就被指想從紐卡素一併收購迪奧迪同埋丹巴巴亞
後者當然被視為杜奧巴既替補

Comment:
咁多隊歐洲賽常客都想搶丹巴巴亞
仲要話贖身價錢唔高
紐記真係幾難打動當時人留隊
就算而家把口話冇唸過走都唔好信

另一方面,如果迪奧迪真係加盟
就似乎意味車仔實有防中會走
最冇料既米基爾走人既機會當然最高
不過佢有既選擇唔多之餘亦唔見得會有勁隊

而養傷多過踢波既艾辛同埋冇左後台既羅美奧都隨時走人
祖雲達斯對前者有意思
巴塞亦一早留定後路贖返佢

2)
文仙尼於曼城以2:1反勝車仔後勁讚泰維斯

Comment:
拿斯尼同埋大衛施華既表現始終唔夠穩定之餘
亦好似有少少互相排斥
印象中佢地好少同時有好表現
文仙尼亦可能因為咁而明知泰仔係炸彈都要攞返上手

雖然作用有唔同
不過俾你係入球率唔低既迪施高又會點唸
所以都幾信佢季尾走人
特別係如果去拜仁
可以重返冇識應問題既德甲之餘
又唔憂冇供應

3)
貝碧托夫既經理人表示這名保加利亞射手將於季尾離隊
亦一定會離開英超

Comment:
費sir以增加前線速度為由而唔要hea碧
考慮埋佢既身體質素同埋人工都算合理

不過佢既二傳能力其實於陣中其實仍有作為
特別係唔可能每個對手都會俾足空位曼聯發揮速度

p.s.:
排長龍後終於投到想投既白票……
未投票既仲有聽日!

2012-3-19

1)
馬甸尼被傳考慮加盟巴黎聖日耳門
出任防守教練

Comment:
單係馬甸尼去教點去盯人,補位同埋佈越位
已經有十足保證

正如廠迷望到頸都長都想基昂可以幫手執下條防線
單係哥斯尼,佐羅等蛋散學有所成後
佈越位佈準少少已經值回票價
偏偏基昂而家主力講波
閒時只係為兵工廠做下宣傳真係超級浪費人才

其實小弟都想魯殊得閒訓練下利記班人點樣做好埋門一腳
偏偏佢又只係宣傳部既人肉佈景版

2)
英國傳媒指古費里已經決定唔同紐卡素續約

Comment:
一個只係於英冠先可以成日入波既中場
如果要做英超球隊正選
選擇大抵只得榜尾嗰三兩隊
所以下季多數同佢英冠再見

p.s.:
唔明點解近年越來越多球員有隱性心臟病
究竟係以前查唔出
抑或另有原因
Anyway,頂住!梅姆巴!

2012-3-14

1)
紐卡素被指與阿積士爭奪巴西中堅杜格拉斯
而畢達菲特雖然仍然長抖
不過亦繼續同紐記扯上關係

另一方面,可能由於丹巴巴亞一直都被傳離隊
紐記亦繼續被指斟緊射手
傳聞人選包括古達迪同埋盧克迪莊

Comment:
最近紐記似乎改去荷甲挖角
杜格拉斯被形容踢法似阿歷士
賣點都係制空力同埋助攻力
不過當年後者踢燕豪芬亦好似幾掂
去左車路士有咩表現有目共睹
就算有阿積士爭埋一份都唔好過份高估
不過約滿唔使轉會費就似乎會特別吸引紐記

至於古達迪自從於飛燕諾起勢入波後
已經先後吸引好幾隊波打佢主意
當中好幾隊都係英超
曼城隨時來一招'借刀殺人'
紐記今次未必冇機

反而盧克莊臣就難攪得多
因為爭既隊實在太多
而如果蘇亞雷斯真係過檔巴黎豪門
利記肯定搶人搶得仲狼
而雖然荷蘭正選雙箭頭應該都係尹佩斯同埋亨特拉爾
不過萬一佢於歐國盃突然有個好機會而忽然彈起
身價只怕更高
肥佬絕對唔似肯於幾個月內兩度放水成千萬鎊去買個箭頭

2)
哥連泰斯宣佈同阿祖安奴解約

Comment:
傳聞肥到220磅
自我放縱到咁都冇咩好怪人
當年希福特到港甲守龍門出名肥獅大隻都未必有佢而家咁誇
而佢而家好彩冇吸毒
否則隨時大鑊過當年既肥馬

冇實際數據而只憑印象
佢應該係睇波咁耐見過腳頭最重既巴西射手
話佢係森巴小志強都不為過
不過心理質素真係差到同外殼完全唔成正比

佢身邊應該有既唔係一個食得住佢既名帥
而可能係一個心理專家又或者情緒病醫生
否則一係越踢越沉
一係索性提早掛靴

p.s.:
雖然預左唔慌強陣
尹佩斯到時仲可能走埋
不過終於有機會現場睇兵工廠都好興奮
更興奮既係可以問雲加攞簽名

今晚同人吹水
先知原來上年摩連迪斯到過香港為喜力做show
不過PR公司偏偏事後先出新聞稿
真後吹到啤一聲

2012-3-7

想講兩場波

傑志尋日真係化表作
搓住對手去踢之餘
仲有好幾次搓到入禁區
如果唔係佐迪欖球員上身同埋球證兩次誤判
傑志羸多兩粒都仲得

美中不足係列文既發揮仲係好一般
有時解圍失準都仲可以賴未慣唔好一腳清既踢法
不過失位同埋盯人唔緊就點都講唔通
希望這個英超兵唔好又係水貨

另一方面,傑志今場雖然贏得輕鬆
不過某程度係因為對手於當地聯賽開咧唔耐而未上力
之後作客可能係另一個故仔

夜場兵工廠輸4粒先識生性
今舖仲算輸波羸口碑
與其話上半場既AC米蘭打穩守突擊
倒不如話佢地一心龜縮
其實佢地絕對唔似90年代初咁有條鋼鐵防線
根本冇本錢學人死守

與其賴尹佩斯chip射失手太高章
倒不如怨謝雲奴實在太廢
三個打兩個兼咁多時間都可以處理得咁差
寧願佢好似上季咁先傳後射
尹佩斯隨時單計英超都入到超過30球

P.S.:
公民先勝後敗
失望但未絕望!

2012-3-6

車路士最終決定開除保亞斯
而副手迪馬堤奧就會 act 佢嗰位到季尾

Comment:
迪馬堤奧係咪真係好似英國傳媒咁講
因為原來仲串兜過保亞斯而唔慌搞得掂隊波
即管放長雙眼等睇戲
因為真係唔係好信條友囂得起

而歷史話俾我地知每逢有犯眾憎教頭落台
隊波通常都會反彈
原因未必係接手嗰個有料
而係班波要證明冇舊教頭都掂

迪馬堤奧當年連西布朗都教唔掂
但而家偏偏升呢做到車長
等同叫個單車都踩唔掂既人越級挑戰格蘭彼治
阿巴同埋其他高層無理由唸唔到
唯一 make sense 既解釋係現階段冇合適人選

卡比路一來講過英格蘭足總係佢最後一個老闆
二來一個條頸可能仲硬過把刀既人唔似頂得順干預

賓尼迪斯又係 available
不過條友唔似食得住班友之餘
亦唔會肯同車仔只係簽住幾個月試用合約
倒頭來賠過千萬鎊同佢解約又係笨實

其實無論哥迪奧拿,軒迪克,迪保斯基,路維甚至摩連奴
都有一個最快要季尾先可以過檔既共同點
軒迪克同安捷既年半合約原來只有頭幾個月係死約
幾個月後重返英超幫老友阿巴打江山絕對唔奇

至於迪保斯基同埋路維雖然都係14年約滿
不過過左歐國盃決賽週都可能唔係咁講
過去亦有類似例子

其實波亞斯撈唔掂
最關鍵既唔係唔識教波
而係唔識做人

文仙尼教波唔叻但識氹老闆
又識因應形勢去搵人孭鑊
國米同埋曼城既兩個油王肯用佢原因莫過於此
所以當你冇摩連奴,軒迪克同埋哥迪奧拿咁堅
大會教頭最少都要夠圓滑

論功力迪保斯基其實唔算特別勁
不過無論當年教皇馬又或者而家教西班牙都風生水起
就係因為平均滿足到各方要求
而家保亞斯大把時間參透這個做人道理
反正佢於14年6月前只要未搵到新工
每個星期都仲可以出糧9萬鎊

2)
雲加忽然被指有興趣引入迪比亞路
希望佢可以傳授經驗俾陣中既小將
而兵工廠亦被指同其餘幾隊 Big 4 球隊爭奪柏度洛迪古斯

Comment:
37歲先去初戰英超?
如果做後備殺手都應該仲得

另一方面,柏度洛迪古斯無論去邊隊 Big 4 球隊都岩踢
兵工廠同埋車仔踢4-3-3就直情 fit 晒
不過巴塞係咪真係捨得放人先
而冇左沙維同埋美斯同佢夾
仲有冇咁勁亦係疑問

p.s.:
1)
邊寫 blog 邊睇亞協真係正!
唔使聽寶珠姐個仔講波就仲正!

2)
雖然唔抱好大期望兵工廠可以
重演8年前拉科主場數AC米蘭4:0既好戲
不過艾朗藍斯繼續養傷總算利好消息
加上尹佩斯同埋施捷斯尼最近又繼續咁神
羸返場波攞個尾彩都唔算妄想

2012-3-3

1)
紐卡素落實同告魯爾以及高路仙尼續約
佢地近日亦同幾名球員扯上關係
當中包括保羅普巴,B.Corgnet同埋A.Nicki

Comment:
紐記總算氹到告魯爾續約
就算將來佢真係繼續成為熱刺既挖角對象
嗰價都可以叫高啲

另一方面,睇過保羅普巴踢盃賽既表現
又唔覺大大隻隻既佢真係特別勁
至少當年初到兵工廠既韋拉肯定勁過佢
唔明點解咁多隊波都打佢主意
仲要通通都係名牌

2)
西班牙傳媒指皇馬有興趣引入雲達韋爾

Comment:
摩連奴一直有唸過將沙治奧拉莫斯移入中路
只係年幾前帶唔走舊部屬馬干

而家無論艾比路亞抑或艾比奧爾既表現都唔合佢心水
佢應該仲會想買右閘同埋中堅

不過一來同當時人傳得最勁既始終都係華倫西亞
二來於南非世界盃後其實冇咩大進步
唔多信摩連奴真係睇中這名荷蘭右閘

Comment:
利記上半場羸唔到係冇運
下半場贏唔到之餘仲臨尾香就抵X死

以前睇達寧踢米堡同埋維拉
已經覺佢幾場好波先得一場好波
既然上場對卡迪夫城忽然好波
今場已經預左佢又冇料到

加上杜sir繼續為左安置另一契仔軒達臣而擺佢於右路
但問題係一個速度,盤扭能力同埋斬波都唔特別醒既人
於右路既威力其實唔好得過當年既加利仔幾多
更奇既係古治忽然正選但又忽然要踢輔鋒
唔多適應又係預左

不過上半場整體發揮尚算正常
史比寧算係踢得唔差
雖然個別攔截略嫌過火
不過至少壓制到兵工廠幾名技術型中場
令利記個勢真係唔差
羸唔到只因羸唔到施捷斯尼同埋佢既好朋友

但問題係當下半場戰局冇咩好轉
杜sir拖到臨完場前先變就好有問題
結果成個利記下半場只有兩次攻勢特別有威脅
不過都俾馬田基利浪費晒
佢勤力有餘,質素不足
未來無論於球會同埋國家隊既發展都應該會俾格連莊臣食住

成隊兵工廠踢得比較好既其實只有施捷斯尼,沙格拿同埋尹佩斯
後者又入世界波真係唔奇
不過其實加歷查兩次走甩佢都要負上好大責任

既然穩健先生既平均分已經由6.5分下趺到5分
艾加又出名多傷病
及早俾多啲機會高亞迪斯可能先係上策
不過而家既杜sir無論用人同埋變陣仲慢過當日既賓尼迪斯
要等到佢變都要特別有耐性

而家輸埋場6分波大戰
打少兵工廠一場但少10分
已經有晒心理準備連續3季缺席歐聯
就算季尾做到雙冠盃仔王都冇用

2012-3-1

1)
利物浦捧走聯額盃後
高莫利表示暑假會為球隊引入星級球員
而夏薩特,基達,查維馬天尼斯同埋洛特維特都同利記扯上關係

Comment:
印象中拉爾拿加盟後首次於互射12碼期間冇 save
利記咁都仲羸到12碼真係大話夾好彩

成隊得個忽然好波既達寧算係交到貨
中前場無論節奏同埋入滲其實都唔對辦
不過今季其實已經睇到慣晒
當中原因一定同杜sir未安置到幾個新兵有關
如果季尾再入市掃貨
達寧,查理阿當同埋軒達臣當中隨時有人要走
古治這個前朝遺物就更加前途似'咁'

當然以利記現時人腳
除非謝拉特偏右發展
否則利記可能最要買人既位置就係右中場

而由於進步後既盧卡斯利華仍然唔算好勁
仲要未知復出後交到幾多貨
加上又冇咩合適替工
防中亦係唔買唔得
不過如果諾特維特兜左個圈後過檔利記
當年放棄佢既雲加唔知會唔會嘔血

2)
英國傳媒指阿仙奴已同普度斯基傾好轉會
而蘇巴根亦表示這名德國射手走硬

Comment:
佢下季尾就約滿
如果唔肯續約既話
科隆暑假賣人絕對正路

另一方面,但願雲加係想靠佢於左路輔助雲佩斯
而唔係做後者既替補
因為一直都覺得佢舖橋搭路叻過入波

p.s.:
香港大炒中華台北五個一皮
不過整體表現只係一般
陳七係就係入左3粒
不過其實失機次數多不勝數
講搶鏡肯定唔及睇到又俾到既香港沙維
半場陳文輝入替佢後
球隊既組織力明顯差走
可見佢對新港隊有幾重要

新陣4-2-3-1多左黃洋去夾香港謝拉特
前者肯定幫到球隊控球
不過佢雖然上腳少左
但節奏仍然緩慢
唔知係默契問題抑或佢本身真係咁慢
加上佢攔截能力一般
如果球隊將來對住強隊
白鶴可能比佢更適合做正選

而遠在歐洲又有愛隊德國練兵
一見正選陣容既幾個後防已知冇好下場
如果因為畢斯杜巴係拜仁系而有正選
德國6月幾近死硬
既然梅迪薩卡唔知趕唔趕到決賽週
倒不如試下賀維迪斯又或者將謝路美保定移返入中路

2012-2-25

1)
俄超轉會市場關閉前
艾沙維以借用形式回歸辛尼特
而森巴亦跳船到安捷

Comment:
雖然雲加有時用人都幾固執
不過見艾沙維既狀態冇最差而只有更差
加上又有其他選擇
最終由踢佢出正選到踢佢出廠都好正路

換個熟識既環境再搏反彈
對佢同埋國家隊都係好事
特別係歐國盃決賽週6月就到

另一邊既森巴玩到罷工咁冇品
布力般雖然後防選擇唔多
護級路途又依舊遙遠
都無理由向咁既人屈服

雖然踢波都係打份工
人望高處或者睇錢份上都好正常
不過職業道德都係專業既一部份
何況當日仲係白紙黑字簽約

法比仔上個暑假重返巴塞
反轉豬肚既兵迷一定多
不過心存感激,默默祝福既應該更多
因為佢地都記得佢當年著住兵工廠波衫都搏盡

2)
費托5年來首次於冇傷病既情況下落選西班牙國家隊

Comment:
咁既狀態唔入選都好正路
加上韋拿就算趕及復出都唔知操得返幾多成狀態
以4-3-3陣式而言
洛蘭迪會係最佳替補之餘
兼可以打多瓣高波
不過迪保斯基仍有必要繼續測試蘇爾達杜既作用

而洛蘭迪既球會隊友蒙尼恩首度入選
這名小將雖然同洛蘭迪有默契上既優勢
不過而家既西班牙中前場實在有太多這類好波之人
加上佢又應該會代表西班牙踢奧運
歐國盃決賽週應該見唔到佢

2012-2-24

1)
告魯夫即將落實加盟瓜達加拉加
出任顧問

Comment:
佢同雲高爾同歸於盡後就咁快搵到新工
名氣既嘢真係冇得好講

不過佢自從離開夢幻一隊年代既巴塞後
做嗰咁多個唔同名目既技術性位置其實都冇好下場
當中原因或者係佢有料得來實在太臭四
好難想像佢去到墨西哥咁遠先忽然交到貨

2)
米基爾承認同安捷有接洽
而艾殊利高爾就忽然被傳成為曼城既新左閘人選

Comment:
米基爾當年同美斯同屆踢世青盃
成名前後其實都冇咩佳作
無論於車仔踢防中
抑或返到國家隊負責派牌
都覺得佢只係一個平平無奇,負責駁腳既工兵
幾咁密密腳傳波都係咁話
而發覺佢原來已經見底
邊個做'車長'都唔會重用佢

至於A高自從同波亞斯反枱後
下季擺明有你無我
不過就算波帥真係落台
有名你叫 Cashly Cole 亦絕對有可能因為曼城俾得起錢而過檔

加上高拉洛夫亦已經唔上一次被傳重返意甲
真係有理由相信文仙尼想簽佢

p.s.:
納比真係為拉素而出山?!

2012-2-22

1)
哥迪奧拿暗示可能季尾約滿走人
西班牙傳媒指安歷基,O.加西亞,甚至沙維都可能接手

Comment:
雖然傷患影響出場次數
不過巴西世界盃前
沙維都唔似會從國家隊以及球會一線退落0黎
要佢身兼教練球員兩職似乎唔多可能

加上對上一間一線球會肯俾球員兼任教頭
已係廿幾年前既利記
可見近年教頭越來越大既工作量唔容許佢地分身踢波

安歷基方面
佢雖然教巴塞B隊教得唔錯
不過今季教羅馬既表現始終只係一般
執教更高班既巴塞更難俾到人信心

而O.加西亞更加只係青訓出身
巴塞好多主力雖然同佢好熟
不過青訓做得好從來都唔係教得掂一隊既保證

2)
車路士被指想用史杜歷治向阿仙奴交換禾確特

Comment:
史杜歷治今季有明顯進步
論名氣同埋星味佢雖然仲未及禾確特
不過講埋門一腳就肯定羸晒
禾仔單刀失機既鏡頭其實唔少過廢托幾多
最終有著數怕且會係兵工廠

p.s.:
車仔積弱既防線再一次出醜人前
好彩A高護到空門
次回合仲未變成例行公事
出線機會亦仍然高過兵工廠
不過當務之急可能係先解決內訌

話時話8強就冇晒英超隊
季初真係唸都冇唸過

2012-2-20

好幾日冇講過新聞......

1)
軒迪克落實執教安捷
雙方簽約18個月

Comment:
咁多個 available 既名牌教頭當中
軒迪克肯定最熟俄羅斯球壇
安捷總算冇搵錯人

不過佢份約好似只係頭幾個月係死約
可能軒帥想睇清楚會唔會俾老細干預
萬一勢色唔對就即刻跳返去歐洲主流球壇

2)
阿仙奴被指睇中圖盧茲既突尼西亞後衛 A.Abdennour

Comment:
近幾季佢地每場平均失波都超過一球
已係英超前列球隊當中最差既一隊
雲加想搵新後衛都好正常
不過又玩青訓就難免令人失望

早年列強冇而家咁重視引入幼齒
雲加自然多選擇
不過而家嗰啲新星已經炒到貴晒
佢又要比其他買家更加睇住盤數做人
有好嘢已經好難輪得到佢

另一方面,英國傳媒話兵工廠高層想升雲加上神枱
再搵季尾約滿巴塞既哥迪奧拿過檔

不過小弟就打死都唔信
因為論地位佢同費sir邊似有高層會郁得到

3)
利物浦被指想從西甲增兵
艾菲利以及基迪拉都被指係杜sir既心水

Comment:
兩個都肯定幫到隊波

艾菲利既威力肯定大過今季買入嗰幾個名大於實既土炮
佢 top fit 既時候
一場比賽既數據可能已經好過佢地幾場既總和

傳聞價仲只係1300萬歐元
早啲識咁唸真係慳返好多

而基迪拉既級數亦肯定在盧卡斯利華之上
不過摩連奴同佢不和既傳聞未必信得過
事關近兩年同串王傳過不和既主力
其實到而家都冇一個走過

4)
波亞斯同埋雲尼亞里都被指
一旦週中歐聯有咩閃失就即刻冇得留低

而車仔同埋國米既球迷亦於早前比賽高呼摩連奴嗰名
擺明唔撐而家既教頭
意大利傳媒就指國米已唸定用G.巴里斯同埋費高聯合接手

Comment:
G.巴里斯如果真係咁掂
就唔會只係做左咁多次替工
而費高有既只係星味
退役之後做極都只係大使之類既休閒工
旨意佢忽然領軍上前線真係幾牙煙

p.s.:
近幾日病到死下死下
不過 office hr 以外都仲依然有限度睇波

印象最深係南華輸波
咁多時間打多人一個都咬唔入
明知冇咩空位都要換入只得速度既李威廉
變相讓賽踢少個
而生波既時候多數只得一個大眼仔開上前線
後防有咁多人睇波又係令人莫名其妙

晨曦既3防中陣式令利馬既威力減到最低
而佈防好深減少左高尼路既活動範圍
38歲既佢今場絕對有教材級數既表現

而利馬冇料到即係成隊南華冇料到
迪亞高冇空間俾佢走
陳7又向來錫身
高世安靠佢咁既球星同兩個大隻佬爭高波
倒不如搵其中一個中堅同佢調位踢

加上南華不出所末又輸高波
晨曦守到120分鐘都算合理戰果
當然有人又會賴廖國文臨尾犯錯唔吹極刑
不過香港球證向來都係庸哨而唔係黑哨
邊有咁多人同事去反南

如果好似兵工廠嗰晚咁
對住個好似只係識俾曼聯12碼既韋比
加埋輸嗰兩球都咁冇運
賽後呼冤都可能仲有多幾個人應同
不過佢地踢得咁屎其實都係唔抵可憐

運氣向來都係比賽既一部份
白禮頓上場多得威廉臣擺老烏
普耶點唸到一圈之後就要3倍奉還
唔講仲以為佢走左幾個月卡數

另一方面,睇波其實都唔夠賤豬唐好睇
人蠢又唔自量已經大檸樂
衰到擺老婆上台就更加抵人鄙視

修身齊家都未掂
又點俾得個天下佢
家事衰左搵得老婆孭
難保將來爆鑊要700萬人同佢孭

今日有人吹水話唔明點解咁多奸商銀行佬由始至終都死撐佢
咁難得有條死蠢將來可以俾你為所欲為
忠心程度梗係更甚於對住老婆

2012-2-15

1)
拿維斯既經理人放風利物浦有興趣羅致這名阿根廷前鋒

Comment:
佢雖然唔多識入波
不過佢既走動同埋突破能力就幫到而家既利記

大抵古治只係一隻勤力既牛
比拿美就幾乎只得一招突然加速
達寧更加不值一提
如果要謝拉特,查理阿當或者軒達臣打邊亦唔係上策

2)
英國傳媒指卡比路上星期六曾到俄羅斯同安治接洽
而佢亦被傳係馬拉加既下任故頭人選

Comment:
兩隊波係就係俾得起錢
不過人腳同冠軍級數仲有明顯距離

當年卡比路故羅馬都先要用一年時間執靚隊波
到第二年先羸到任內唯一一次意甲
問題係嗰啲有錢老闆有冇咁好耐性先

3)
比耶落實以自由身加盟唐卡士打
雙方簽約年半

Comment:
佢雖然因為傷病而肯定不復當年勇
過左維拉後仲要睇波多過踢波

不過紐記後防咁等人用
搵佢回巢其實冇壞
至少右閘同埋中堅兩個位置都可以多個替補

另一方面,唐士卡打而家係榜尾之餘
比利沙柏又俾修咸頓挖走埋
最驚下季佢地降到去英甲
睇收費電視都睇唔到佢,迪奧夫同埋前利記名宿桑達斯

4)
雲加被指想搵費文尼季尾以自由身回巢

Comment:
唔夠防中既兵工廠想搵佢回巢都唔奇
不過如果佢唔減人工
真係唔信雲加肯咁大手筆去簽佢

p.s.:
雖然怕且又係下半場中後段先落場
不過都望亨利臨尾攞個尾彩

2012-2-13

幾場波想講......

1) 曼聯對利物浦

3個入波都係來自後防失誤
成場波真係唔算精彩

利記落後兩球下竟然有超過30分鐘 hea 住去踢
唔講仲以為佢地先係領先嗰隊
坦白講真係唔覺自己睇緊雙紅會

明知曼聯一對中堅都咁唔掂
衝撞多幾次就自然會出事
換入卡路爾後都竟然繼續於外圍搓下搓下
曼聯仿佛就成為一架重型轟炸機既停機坪
如果唔係因為里奧費甸南既果然出錯而追返球
利記仲好似唔識醒咁
如果狂攻既表現唔係只維持得最後嗰幾分鐘
和波絕對唔奇

賽後招點都係嗰兩條友
真係唔覺阿蘇唔肯握手係錯
如果俾人老屈完8場冤獄後
都仲要扮大方同嗰個真正種族歧視既人渣握手
咁使唔使順便俾埋個籮柚佢插呀

不過阿蘇事前老點杜sir同埋球會就爭唔落
但真係唔信利記會好似傳聞咁講賣走佢
一來佢係中前場最交到貨既一個
二來今次既錯未致於要判佢死刑

'嚴重影響球會聲譽'不過只係費sir出既口術
當年簡東拿起飛腳踢球迷
堅尼立心不良咁踢到人收山
佢老人家咪一樣隻眼開隻眼閉

2) 熱刺對紐卡素

俾艾迪巴約咁樣助攻大四喜
佢同沙夏好似踢緊練習賽咁輕鬆咁培養默契
一對中堅固然責無旁貸
不過一條中場線更令人失望

森遜睇巴里本身已經唔夠班
有時仲俾人扯埋入中路
偏偏右路既奧巴坦成日都唔知去左邊
當艾確圖少有落到咁底
摩達歷亦曾經去過嗰邊搵食
可想而知右路有幾真空

中場嗰兩個人肉雪糕筒又係無甚作為
技術同埋效率都輸
結果紐記禁區就成為熱刺上下玩波既後花園
如果唔係佢地下半場hea去踢
紐記肯定輸多過半打

就算史堤芬泰萊未提早收咧
紐記後防已經等住要買人
偏偏1月加盟既就只有柏比斯施斯

其實買個後防有幾難
就算唔甘心俾里昂當水魚而唔買A.施素高
咁傳左好耐既烈治維最終亦只係250萬鎊
巴斯桑,尼爾遜,沙加度等人根本長期 available
既唔買又唔借都唔知佢想點

唔好以為今場大敗係特別例子
其實紐記近兩個月既後防已經幾唔掂
早前如果唔係布力般流浪既埋門一腳更得人驚
最終戰果一定係紐記輸到仆直

另外,柏度好似只係會考慮賓艾化既體能狀況
其他既可能於佢心目中都係'鐵血戰士'
例如古迪利斯12月頭已見疲態
偏偏出場時間依然高企

單靠一對強勁雙箭頭就有運行既情節
近年連足球小將都冇啦
塞內加爾本身除左紐記黑雙煞外仲有蘇維同埋尼安
如果單靠前線勁就有運行
隻獅子就唔會做左差唔多10年病貓啦

3) 天水圍飛馬對傑志

高梵先列後備
究竟係戰術定係上半場排錯陣
怕且只有陳曉明本身先知

而雅高踢得好過佐迪
偏偏早過後者被換走
究竟係咪因為前者體能唔足以應付全場
而中場最初3人全部唔太擅長截擊又係咪蝕章
亦係唔知甘巴爾唸咩

主隊羸波
不過表現唔算突出
伊達攞唔到12碼之餘仲無辜俾人話佢插水
不過入返兩個烏龍波就咩都補返數

另外想講王振鵬
佢近期整體表現其實好左
上半場救伊達既笠射亦見功架
偏偏一次低級失誤又再洗底失敗
打龍門有時就係咁慘

4) 科特迪瓦對贊比亞

咬唔入就係咬唔入
贊比亞擺明搏和射12碼
連個龍門都射得咁靚
話冇練過就打死都唔信

科特迪瓦整體發揮唔比平時差
唯獨埋門一腳唔合格
合理解釋可能只有心理壓力
零失球都係冇盃捧
印象中近年大型賽事都係第一次

2012-2-11

幾日冇交功課......

卡比路最終因為英格蘭足總干預佢任命泰利做隊長既決定
而決定劈炮
佢最後5個月既人工原本係250萬鎊
而家英格蘭足總肯俾返150萬鎊佢
不過條件係佢唔可以再同傳媒講返件事

而由於件事係哈利列納打甩逃稅官司後6個鐘頭
令人攻加相信哈利叔就係接手既頂頭大熱
賭波公司紛紛將佢接手既賠率大幅降低
更有部份索性封盤

英國傳媒指英格蘭足總願意以1000萬鎊為佢贖身
亦準備以原屬卡比路既600萬鎊年薪利誘佢
不過佢就表明現階段只想專注教好熱刺
而決定權就只會在熱刺主席利維手中

另一方面,卡比路原本講明教埋英格蘭就會退休
不過而家就有指車路士想搵佢取代保亞斯
而佢講明唔考慮重返意甲既言論就更令英格蘭傳媒有無限既想像空間

Comment:
卡比路同埋哈利列納都不愧係老江湖
處事同埋言論都果然冇失佢地高手既身份

先講卡比路
出手唔高既老闆佢向來唔理
但佢亦唔介質同俾得起錢但唔俾佢話事既老闆開火

因為最後5個月人工而要個員工徹底聽話
好似你同我此等員工甲乙丙都未必肯制
仲何況係衣食無憂既佢

更何況英格蘭今舖歐國盃都唔慌係咩真正既爭標份子
與其6月又俾全英國國民同埋傳媒重插
倒不如而家型啲咁走
加上仲有3個月補水
豪100萬鎊就可以保住面子既選擇對佢而言絕對係好路數

而家英國傳媒吹佢接手車仔
小弟始終唔多相信
一來佢既然忍唔到英格蘭足總
又何來忍得到隨時更多干預既阿巴
二來而家 available 既軒迪克同阿巴咁 fd
小弟列而家都堅信一旦保亞斯冇得撈
臨時高薪替工非軒帥莫屬

另一方面,形勢大好既哈利列納就更精
難得英超冠軍夢仲未幻滅就梗係唔會離開熱刺
唔想得失英格蘭足總同埋球迷就拋個波俾利維

但季前曼聯同車仔開個筍價買摩達歷都打動唔到利維
而家英格蘭足總既所謂1000萬鎊'誠意'
其實有幾大作用真係心照

不過英格蘭堂堂名牌
段估唔想搵個臨時工領軍踢決賽週
市面上亦唔見得有咩名牌教頭肯客串幾個月
仲要係一隊唔少內部問題既球隊

哈利叔亦當然知道英格蘭足總一旦而家搵到人全職任教
佢就肯定冇行
佢而家想先行兼職都絕對正路
況且佢話利維話事唔代表佢私底下唔同利維講數咩

更正既係哈利叔其實已經留定後路
佢同傳媒講明教一隊波已經好難
即係話教埋英格蘭就仲難
萬一接手後歐國盃仆直都唔好入佢數
因為而家只係英格蘭足總搵佢求救

p.s.:
1)
二奶台新聞部搞咩呀
唔講仲以為莫耶斯又係王征啲遠房親戚
http://www.youtube.com/watch?v=YuN1fDVvkDE&sns=fb

2)
近幾日睇到最多既除左卡比路
其實就係林書豪
加埋踢波既林志堅
阿Lam同阿Lin都真係堅正
有冇人話俾小弟知香港幾時會有後者既波衫賣呀

2012-2-8

1)
哈利列納既逃稅官司獲判無罪
佢公開感謝熱刺主席利維同埋球迷

Comment:
佢咁樣自辯都居然甩到身
唔怪得有前高官夠膽死偷步買股票後
死撐話係因為飲醉酒

2)
國米被指下季想搵保亞斯接手

Comment:
兩地油王一樣咁無耐性
打佢地工都幾無安全感

不過國米後防嚴重老化
偏偏莫拉堤而家又唔多肯俾錢買人
就算搵到摩連奴回巢都肯定惡搞
仲何況保亞斯只係著衫似佢既A貨

3)
辛尼特被指只肯出價700萬歐元收購卡錫

Comment:
雖然歐洲主流聯賽都過左轉會限期
俄超已經成為祖記近幾個月最有可能既買家
不過祖記年幾前先用左1500萬歐元收購佢
而家點肯賣得咁賤
大不了擺多幾個月後再兜售過佢

4)
蘇巴根暗示即將離開科隆

Comment:
佢同球會經理芬克已經唔妥左幾個月
後者朴槌買鄭大世前直情冇單聲佢知
德國傳媒話佢直情係靠睇帶先知北韓朗尼係邊個
無癮指數絕對爆燈

其實科隆而家雖然而家排第9
不過實情只係多尾3既凱沙羅頓6分
護級路途隨時再現暗湧

p.s.:
'存錢妥'吞左我成疊銀紙後居然hang機
仲要出張通知書話我冇入過錢
想當年仲係鐵拳無敵既時候
肯定機都打爆佢

2012-2-7

1)
英國傳媒指卡比路因為唔滿意高層未得佢同意
就禠奪泰利既隊長臂章
隨時決定提早劈炮

Comment:
卡比路於南非世界盃後用多左新血
2014年就算羸唔到世界盃
都有力成為近年最勁嗰隊
擺明係前人種樹,後人乘涼既格局

英格蘭充斥球星少爺兵
班友就算遇到摩連奴同埋軒迪克都隨時敢玩嘢
又何況係退休倒數既卡比路

佢老人家今次撐泰利雖然都好有 point
不過咁樣隨時得罪更多球員
如果嗰班高層搵到人臨危受命
佢地隨時等唔切卡比路劈炮就同佢提早解約

2)
卡比耶即將落實同紐卡素續約到2016年
而紐記就被指同曼聯爭奪水晶宮右閘 N.Clyne

Comment:
爭新星唔同爭冠軍
強隊從來冇話一定著數

特別係丹尼森遜硬係唔肯續約而隨時季尾俾紐記賣走
相反曼聯1隊印象中隨時有半打球員可以同佢爭位

3)
黑池既M.菲臘斯被傳成為利物浦既1000萬鎊新翼鋒人選

Comment:
當中前場多人到可以分A,B隊
當杜sir好似仲未試到最佳陣式同埋人腳
真係已經聽厭利記中前場既增兵傳聞

話時話如果蘇亞雷斯,卡路爾,比拿美少啲搞事
驚喜程度肯定更甚於增兵
特別係前者停賽8場後既見面禮竟然係無影腳
抽後算帳再停3至4場都抵X死

p.s.:
1)
原來韋比歷年來於英超判過54個12碼
當中曼聯就已經佔左1/6(即係9個)
而佢今季判既7次極刑
曼聯更加著數左3次
咁既數據想唔認係黑哨都幾難

2)
兵工廠有機訪港
不過訪港魔咒咁得人驚
下季英超同埋歐聯咪更加冇機

2012-2-6

1)
雷丁被指想借用夏格維斯

Comment:
佢上季尾雖然已經講明唔肯屈就英冠
不過而家就算耶耶托尼踢緊非國盃
文仙尼都唔多肯用佢就擺明唔睇佢啦
降格踢英冠已經係爭取出場機會既最佳選擇

2)
米爾頓凱恩斯領隊 K.羅賓遜透露有意搵阿倫史勿夫下季以自由身加價

Comment:
除非佢肯大幅減薪
否則真係好難成事

不過如果係咁就倒不如表明出場先有糧出
可能仲有英超球會敢搏下
雖然段估佢都會係另一個戴亞

3)
洛杉磯銀河被指睇中艾利蘭

Comment:
條友只要唔傷又唔玩嘢
其實夠料做個中型班大佬
就算過檔都唔慌踢得耐

其實類似羅比堅尼這類三十出頭但仲有卡士既球員
可能先最岩佢地

p.s.:
紐記羸到維拉唔意外
畢竟麥利殊這名當年咁硬朗既中緊
而家連維拉後防都竟然搞唔掂
有個基雲咁勁既龍門都可以至少10場keep住失波
可想而知幾咁唔掂

紐記羸波
不過表現唔算理想
當中關鍵可能係冇左近日踢到殘殘地既賓艾化
而紐迷最開心既未必係柏比斯施斯地標戰就入世界波
而係賴恩泰萊冇斷腳收場
紐記中後場已經唔多夠腳
如果再少一件都唔知點算

另一方面,車仔羸3球都可以俾曼聯逼和
韋比既執法當然係 key point
條友雖然係英格蘭首席球證
不過出晒名執法水平一般
當年見親C7跌低就老馮吹12碼已經知佢無能
不過上半場佢亦同樣放生左加利卡希爾
車仔捉到鹿都脫唔到角又唔怪得晒佢

關鍵其實係雙方領隊既臨場調動
波亞斯見球隊俾曼聯追返2:3後失勢
換多個防中無可厚非
不過換走既竟然係史杜歷治
而唔係廢到無朋友既托利斯又或者馬路達

前者而家連起腳埋門都好似冇咩信心
尋晚明明有次有位都要再扣多下就係唔夠信心既表現
一個唔敢起腳既射手
其實同一個不舉既AV男冇咩分別

相反費sir換小豆入場真係打亂晒車仔既防守部署
大衛雷斯這類唔擅長緊身盯人既中堅真係唔得佢死
朗尼亦可以有更多機會返中場幫手搶中場
追返3粒都唔係運氣兩個字就解釋得晒

當然佢地最終保得住1分都要多得迪基亞
條友原本最弱就係應付高波同埋遠射
但過左半季後佢處理遠射既能力明顯有進步
關鍵正係集中力好左

2012-2-4

1)
祖爾透露因為森莫拉半年前就已經嘈住要轉會
所以最終賣走佢
而因為巴里奧斯唔肯離開多蒙特
所以佢最終從史特加接收普格恩耶克

Comment:
普格恩耶克如果係掂
史特加就唔使買伊比斯域拉
加上東歐箭頭出名多水貨
由拉度斯奧,杜米迪斯古,列布夫,舒夫膠刀,
禾路連,柏夫奴真高到艾沙維全部冇個合格
真係好難想像祖爾點解反而覺得佢會撈得掂

成日都話季中買人可能因為唔夠時間而入錯貨
今次好可能會係另一例子
其實拜仁雷斯既表現已有改善
祖爾靠佢成為丹普西後既另一攻擊重心
可能仲有運行

2)
芝加哥火焰被指有興趣搵杜奧巴以及波歷克以自由身加盟

Comment:
唔係話美職盟球會俾唔起錢
不過佢地既質素只屬英冠
未必個個明星球員都肯屈就

如果佢兩個以收入為首要考慮條件
索性去中超同埋中東好過啦

不過杜奧巴而家又話考慮同車仔續約
究竟係真心抑或等其他潛在買家加碼
就不得天知

3)
文仙尼最終將泰維斯納入英超註冊名單
而佢仲話如果條麻煩友夠fit又肯向全隊認衰
於球隊仍會有出場機會

Comment:
條友已經唔止一次玩嘢
俾佢歸隊等同埋左個唔知幾時會爆既計時炸彈

4)
前國米隊醫透露大哨98年世界盃決賽夢遊球場
係因為扭傷頸動脈而搞到心臟出事
偏偏當時主診醫生斷錯症
以為佢癲癇症而俾錯藥佢食

Comment:
如果屬實既話
佢都算唔黑仔得晒
亂咁啪藥都仲保得住條命

p.s.:
今日下晝去左旺丁場睇銀牌決賽預演
眼前南華既進攻應係今季最好

迪亞高有速度又成日走位
利馬 key 到波之餘仲勤力緊逼對手
佢既死球能力功夫雖然及唔上強哥
不過對球隊真係有更大作用
而佢地有料到
亦進一步激活陳7同埋歐沖

如果真係要挑剔
就只有多數於左路出現既威廉王子因為冇左腳而冇咩表現
不過Edison今季表現一般
蘇沙既傳中能力亦繼續強差人意
將迪亞高移去左路可能係最好既解決辦法

天光隊既人腳及唔上少林寺
當個別球員傷停以及傷癒狀態唔夠
再加埋卓卓又玩失蹤
情況都幾濕滯

不過波係一場一場計
只要19號場決賽唔好好似今場頭段咁發夢
晨曦死守都會俾到南華一定麻煩
當然如果到時已經38歲既高尼路仲要繼續單靠路數去死頂
就肯定有隱憂

南華亦唔係毫無弱點
對廣州富力同埋尋日其實都頂輸好多高波
到時再輸高波絕對唔會令小弟意外
大抵列卡度都知巴利有機會再次偷雞
所以都提佢故意除衫慶祝攞牌洗底
但做到咁明顯其實又幾肉酸

另一方面,亨利自從省港盃後真係幾沉
佢無份入選港隊都好正路
畢竟新教練根本睇唔到佢上半季有幾勁
但如果佢仲係咁既水準
冇左佢同梁子駿四圍走搵機會
到時晨曦對南華既威脅只會局限於死球

2012-2-1

上次轉會市場關閉後
講過哈利列納於賺錢後成功增強球隊實力
熱刺今季唔講得少

而家精明既哈利叔幾個月後又重施故技
佢出庭時講到自己咁低B真係阿水都唔信佢

柏夫奴真高兜兜轉轉後都係走人對球隊影響唔大
始終佢可能一直已有離心
加上又可以收返750萬鎊
現階段睇絕對係3羸既交易

而家用派拿換沙夏對球隊仲著數
要知道佢地經常利用單箭頭為中場開路同埋做二傳
踢最前嗰個入波唔太多都唔係問題
所以就算沙夏埋門一腳既水準唔夠穩定
兼且可能養傷多過踢波
不過只要佢落場發揮到佢唔錯既二傳能力
佢對球隊既作用仲大過'柏高'

後防方面
借走有離心既哥魯加同埋巴斯桑治
而免費引入搏晒命既大隻佬尼爾遜
又係有著數
因為熱刺防線有時就係衰唔夠硬朗
唔寄望佢搏足咁多場
只要佢同京治可以輪流出場
兩個老鬼都應該可以繼續有水準表現

隨住曼城尋晚輸波
佢地又重燃爭標希望
不過始終覺得佢地唔夠曼市嗰兩隊咁疊馬
所以真係唔覺佢地可以爆到冷
不過要首度於英超成為倫敦一哥就幾審慎樂觀

2012-1-31

1)
車路士落實以900萬歐元引入迪布尼
不過隨即將佢將返去亨克

Comment:
波亞斯追左個小將幾個月終於追到手
一於繼續為長遠換血而做定準備
不過咁唔代表佢一定做得長

因為信油王有心搞青訓
不過更信佢對領隊冇咩耐性

2)
曼城被指打算以先借後買既形式羅致大衛比沙路
而布歷治就終於離隊,加盟新特蘭

Comment:
佢好波得來亦算幾有效率
又同文仙尼合作過
加上拿斯尼經過季初虛火後表現唔算好穩定
文仙尼可能旨意佢做大衛施華既替補

另一方面,曼城今個月真係勒緊褲頭帶做人
高層總算肯正視如果盤數唔掂
將來成績幾好都冇得踢歐洲賽既問題

3)
消息指伊亞昆達即將轉投錫耶納

Comment:
由阿馬利,東尼,馬高莫達,富斯圖羅斯......再輪到佢
干地由暑假等到而家
總算掃得七七八八
如果基利亞雷拉唔係傷左都怕且已經走埋

不過最搶手既卡錫反而仲留隊
原因怕且係祖記錯估轉會行情
將佢既2000萬鎊身價定得過高

4)
多蒙特同意以60萬鎊出售季尾約滿既19歲進攻中場艾斯菲特
佢只要通過體檢就落實轉戰英超,加盟阿仙奴

Comment:
馬高列奧斯加盟在即
加埋馬里奧葛斯傳左咁耐都未走
19歲仔既然冇機會上位仲唔出走咩

另一方面,兵工廠現時真係信得過既中場中球員
其實加埋只得桑治,艾迪達同埋韋舒亞3個
當中主力進攻既後兩者都係出名既玻璃腳
雲加俾60萬鎊買個希望都算搏得過

但問題係等到佢掂既時候
雲佩斯同埋禾確特可能已經過檔巴塞同埋車仔

p.s.:
今晚睇轉會市場 deadline 可能仲好睇過各地快車檔
雖然最終可能平淡告終......

2012-1-30

1)
利物浦被傳曾提出用卡路爾交換泰維斯或者丹巴巴亞

Comment:
級數更高既迪施高都要坐冷板
文仙尼又邊會肯接收狀態跌watt既卡路爾
始終佢有太多方法去踢走泰維斯

另一方面,哈利列納早前爆響口
暗示隨時唔使700萬鎊就可以挖走丹巴巴亞
如果利記咁樣換人
肯定蝕得仲慘過3年前羅比堅尼嗰鑊

其實佢近一個月既表現其實已經叫做有啲進步
上場羸曼聯既兩個入波都亦總算有間接功勞
與其現階段賤價放走佢
倒不如俾多啲時間佢

2)
雲加上星期被發現去睇熱刺對屈福特既足總盃賽事
英國傳媒指佢係親身觀察後者中堅馬里亞柏既表現
不過雲加就繼續聲稱唔會買人

而紐卡素早前亦被指打算以150萬鎊收購這名屈福特隊長
不過最終因為屈福特獅子開大口索價400萬鎊而告吹

Comment:
只係25歲既佢既可以踢中堅同埋右閘
英國傳媒話200萬鎊可以成交又好似幾抵買
不過佢既質素頂多岩踢英超中型班
對阿仙奴既幫助唔慌會大

反而另一邊比兵工廠更等人用既紐記
可能加碼後搞得掂佢
始終紐記既吸引力一定大過另一可能買家史雲斯

3)
紐卡素被指再次考慮引入艾利亞
甘崗既法國翼鋒 A.Knockaert 就自稱紐記打佢主意
而仲未搵到後衛既紐記就被指睇中丹麥新晉國腳奧高利

另一方面,阿倫史勿夫就被放逐到英甲既米爾頓凱恩斯
而出場機會不足既貝斯就可能轉投狼隊
不過究竟係借走抑或以300萬鎊賣斷就仲未知

Comment:
艾利亞勁到連利物浦同埋祖雲達斯都一直打佢主意
紐記成功機會真係唔高

最想講既係奧高利
據聞這名科特迪瓦裔19歲中堅用波唔錯
唔係嗰啲只係識大腳清波既一般貨色
過多幾年可能係另一個艾加
趁低吸納真係有得唸

不過隨住佢火速上位
佢既丹麥球會 FCN 兩個幾月前已經拿拿臨同佢續約到2016年
紐記唔俾多啲'誠意'都好難成事

2012-1-29

近幾日係咁睇波

英格蘭方面
利記接連橫掃曼徹斯特雙雄
論表現和曼城嗰場係比較好
羸唔到又係因為祖赫特好嘢

至於米卡李察士嗰下爭疑性手球就100%冇判錯
佢雖然係擋左嗰波落隻手到
但問題佢本身大字型咁舉高手
明顯有心想用手擋波
為左平衡根本唔係合理解釋

類似情況尋晚都有發生
艾加又係擋左個波落自己隻手
不過佢全程雙手垂低
球證見佢冇心手球而網開一面
當然執正既話就一定會輸12碼

講返尋晚場波
雙方整體表現都只係一般
大家都疊馬於中路搶波
令雙方多數以側擊為主
再加中距離遠射同埋死球偷雞
係好緊張但就好難話場波精彩

杜sir再次排出一個介乎3-6-1同埋5-4-1既陣式
好處係史基泰爾同埋艾加多左機會引球出擊
但後防中路人多唔代表防守有保證
分工唔好反而隨時走甩對手
尋晚又係好例子
當然左路兩條友失晒位又係抵鬧

兩隊中場既組織又係有問題
曼聯都仲算好啲
墮得最好既卡域克負責包底
前少少但都唔算上得好前既史高斯就主打控制節奏

而傑斯就當然四圍走搵機會
不過利記中路疊馬
就算移去左路又過唔到馬田基利
加上艾夫蘭助攻成日走左去啲死位
曼聯既左路明顯冇右路咁有威脅

曼聯於頭一個鐘既表現都好過利記
不過杜sir總算知錯能改
換入古治同埋查理阿當後明顯搶返個勢
雖一要彈既係佢之後換入比拿美
冇得留低既點都應該係似踢右閘多過右中場既唐寧
條友踢維拉都做唔到大佬
何況去到級數高唔止一班既利記

利記而家話就係挑戰雙冠
向好嗰方面睇就話球隊士氣好
至驚杜sir同埋班友過份集中搶盃
萬一再次返唔到前4
羸晒兩個盃仔都補唔返

西班牙方面
皇馬雖然輸左隻盃
不過今次真係輸波羸口碑
放手一縛縛得真係精彩
出局真係只因球證明顯偏幫

巴塞就算好似練左金鐘罩咁勁都總有佢既罩門
大巴士陣式可以修死佢地
好似畢爾包既前線餓狗搶屎咁對住佢地條防線又有得唸

唔好理佢地踢3個又或者4個後衛
總之隻翼唔好因為丹尼爾艾維斯既威脅而過份拉邊回防
否則最前既賓施馬又或者希古恩都變相會被孤立
要佢地人少打人多就肯定唔化算

而同巴塞鬥攻都唔係一定冇得唸
不過重點一定係兩側而唔係中路

巴塞防線始終唔算好穩
季初已經講過今季盡失西甲同埋歐聯唔係奇事
特別係西甲對手已慢慢搵到竅門對付佢地
加多少少運氣就足以令佢地唔見兩分
少數怕長計
摩連奴既頭號任務從來都只係捧盃
羸埋巴塞只係 bonus 同埋一啖氣

香港波方面
城南一和羸到嗰個另類既賀歲盃真係實至名歸
以波論波本身已經係最高
集訓亦早過其餘兩隊外隊
富力高原集訓後仲要未調整好狀態就到港

韓青雲應該上位在望
至於巴黎聖日耳門借返來嗰個山度士反而只係一般
其實眼前既城南一和仲未齊腳
加埋兩個本土主力同埋亞洲足球先生 Sasa
亞冠盃應該有料到

清水心跳方面
冇左龍格堡對佢地影響唔大
因為條友加盟以來只係踢得8場
隨時連默契都未夾到

佢地前線靠晒高原直泰同埋大前元紀
高木俊幸同埋伊藤翔就搵位後上
大腦當然係小野伸二

論組織力真係好好
真係有本事搓到入禁區
不過中前場幾乎盡係土炮就始終蝕底
所以佢地於J-League既火力只屬一般

南華今次繼續試陣
利馬初步睇來算係對辦
華人人腳其實就試無可試
佢地既人腳本身亦已經夠爭港甲有餘
上半季係咁試陣兼用少左外援
究竟係為左下季重返亞協而舖路
抑或真係高世安畫蛇添足
季尾自有定論

不過吳偉超過檔飛馬就有隱憂
祖爾同埋陳偉豪萬一有咩冬瓜豆腐
唯一可靠既替補就只有李志豪

不過既然冇得出場
小弟都同意吳偉超唔應該浪費時間
而家飛馬多左佢同埋同深水埗解約既細綽
後防既老問題真係有望解決
睇人腳同埋形勢肯定係最接近聯賽冠軍既一次

尋日下畫去左睇U-17鬥新加坡
由於對手質素一般而見唔到真章
不過謝朗軒,羅曉聰,菲臘比同埋黃駿軒都似乎唔錯
稍後有時間會再跟進多啲這班小將

而印尼仔似乎質素最高
尋日見到既羅沙同埋禾達拿幾好波既小朋友
原來星期五羸香港嗰場只係後備入替
而拿素遜既身體質素同埋埋門一腳都唔錯
唔知過多幾年會唔會成為另一個佩迪里
不過怕且佢唔會好似前輩咁來港搵食
因為當地聯賽發展而家仲好過香港

另一方面,尋日睇波最特別既係覺得自己去左印尼睇波
因為都有幾多印尼人去左睇波
仲要睇得勁投入
唸都冇唸過

2012-1-25

1)
前馬體會教練列仙奴落實接手格林納達

Comment:
格林納達既最大問題係攻力超唔掂
19場入12球既水準返西乙都唔掂
列仙奴當日教馬體會同埋華拉度列既時候
球隊既攻力都唔見得特別出色
佢可能只係格林納達高層臨急臨忙搵到既人選

2)
柏夫奴真高令人意外地同熱剌續約到下季尾

Comment:
既然冇大球會肯收留艾迪巴約
條友其實只係得返熱刺一個好選擇
季尾減人工,再被買斷似係必然結局

加上哈利列納一直都再想簽射手
以及而家柏夫奴真高又竟然續約

迪科爾就算把口話唔走
月尾前離隊既機會依然唔低
前題當然係哈利叔真係搵到替補
因為佢地雖然多數只係踢單箭頭陣式
不過依要有3個信得過既射手

3)
比耶列甸諾夫落實重返俄羅斯發展
加盟莫斯科斯巴達

另一方面,麥法頓就可能以借用形式加盟般尼

Comment:
比耶列甸洛夫當日身價高達890萬鎊
但近兩季明顯唔受重用
拖肥糖肯定蝕幾多
不過好彩莫斯科斯巴達俾得起錢
5至6折既價錢都應該收得返
隨時夠佢地為前線增兵
不過咁既價錢夠唔夠向史篤城收購堅韋尼鍾斯就係後話

事實上愛華頓今季火力一般
平均每場只係入到1球正好解釋佢地點解長期處於中下游
卡希爾踢到上場先開齋
耶高保又過檔布力般流浪後先識入波

球隊既頭號射手竟然只係入得嗰3球
仲要係巴尼斯,奧士文同埋維尼奧斯
一個係負責死球兼12碼既左閘
另一個係永遠既中場二打六
最後一個係臨時拉伕既希臘牛奶咀箭頭
點睇都唔可以下半季倚靠佢地太多

另一方面,麥法頓重創後可能真係一沉不起
莫耶斯簽左佢3個月以來都只係用過佢3次
當中仲有兩次係英超後備落場
中前場咁等人用都唔肯用佢
狀態擺明有問題

既然同佢只係簽約到季尾
佢對球隊又冇咩貢獻
放走佢鬆磅都唔出奇

2012-1-24

幾場波想講......

1) 富咸對紐卡素

格夫里雖然入左個世界波
不過論攔截
佢作為一個防中其實唔算稱職
佢既攻守水準其實只屬英冠水平
唔值得一個正選席位

其實高士寧活動範圍仲大過格夫里
加上俾波亦準過佢
係衰有時攔截會忽然過火同埋身體質素唔算太好
於迪奧迪未回巢前
柏度或者值得考慮俾佢試下

2) 阿仙奴對曼聯

由於兩邊防線都唔多穩陣
場波其實都多精彩攻門
只係雙方既埋門一腳都唔理想
當中失左較多 easy 餐士既兵工廠亦因為咁而聯賽3連敗

沙格拿斷腳已有100日
臨時拉伕既佐羅同埋史基拿斯爆鑊頻頻
雲加都唔肯去預備組搵個替工右閘
而家先終於等到佢提昇恩拿尼斯上一隊
但偏偏沙格拿原來已經復出在即
真係諷刺

講起恩拿尼斯
這名好似係中國同埋希臘既混血小將
細個既時候其實踢過中堅,右閘同埋防中3個位置
不過由於身高問題
佢近年已經專注踢右閘
今場英超地標戰雖然唔算踢得好好
不過肯定好過佐羅

場波賽後既主角始終係
換走張伯倫令球隊反勝為敗既雲加
佢明確犯左雙重錯誤
一係佢以張伯倫狀態唔足
而已有疲態為由而換人
但肉眼所見嗰刻佢當時既體能其實唔比其他球員差
而更重要係佢係當晚兵工廠踢得最好嗰個

二係換入既點解會係艾沙維
佢既狀態仲差過班拿約
既幫唔到前線既雲佩斯
亦幫唔到後面既華美倫
佢入場後球隊反而死晒火
加埋失波前只係好 hea 咁做樣追下華倫西亞
完全反映雲加今次換人有幾失敗

另一方面,韋碧克再次於大戰有波入
反映佢真係有條件同小豆爭正選
續約條件只要唔好企硬咁高
費sir點捨得唔要佢
但這亦意味奧雲更加冇定企
不過段估佢唔肯屈就白禮頓掛

3) 南華對清水心跳

狀態佔優既南華同客隊各踢半場好波
但諷刺既係反而入唔到波兼有失波

南華上半場以最擅長既陣式4-2-3-1打突擊
大把發揮空間
李威廉同埋歐陽耀沖都好活躍
而新兵利馬因為有兩個防中為佢做晒粗重嘢
專心分波亦有唔錯既表現
最終入唔到波只因基士文真係冇態

下半場南華收起白鶴而用多個箭頭C7
表現其實冇上半場咁好

一來心跳因為有小野伸二後備落場而改善左用波
二來佢地亦冇上半場壓得咁前
南華亦因而少左機會反擊
佢地下半場既主要威脅都來自死球
但利馬既死球落點冇強哥咁有威脅
最終反而入到一球已經算有交代

南華下場同廣州富力爭季軍
考慮到後者早前進行高原集訓
而家處於適應期而狀態不足
加上龍門唔穩
雞屎文雖然冇態
不過入返球波賀收山都唔係冇得唸

p.s.:
新年快樂!!!

2012-1-21

1)
盧森保高因為細哨於集訓期間帶女返集宿酒店爆房
加上近日多次以訓得唔好為理由而唔出席操練
頂佢唔順下而要求法林明高同佢解約
不過球會高層已經拒絕咁做

Comment:
南美球會簽星級球員又或者搵名宿出任管理層
好多時都要靠贊助商泵水
不過今次贊助商已經拖數5個月
已經令球會要拖糧至少160萬歐元
咁既情況下佢地又邊有條件同細哨解約

2)
利物浦再次被傳睇中高路仙尼
而狼隊就被指以正選席位吸引格夫里過檔

Comment:
紐記中後場增兵已經唔算順利
史堤芬泰萊同埋迪奧迪又因唔同原因而缺陣
萬一艾殊利再次認錢唔認人
告魯爾守得再好都冇用

話說回頭
杜sir近月咬住唔放既高路仙尼只係得返15個月合約
格夫里更加係季尾就約滿
點解一路都冇風聲紐記同佢地傾續約

3)
大連阿爾濱落實以50萬歐元從奧丹斯引入 P.烏達卡

Comment:
佢雖然冇佢阿哥咁勁
埋門一腳亦平平無奇
不過總算係一個高速既尼日利亞新晉國腳
以咁既價錢就買到都算係咁

2012-1-20 (2)

1)
洛杉磯銀河以及紐約紅牛都被指打算引入迪比亞路
而前者就承認有興趣接收林伯特

Comment:
你估而家踢表現賽咩?
使唔使咁多老嘢呀!

2)
英國傳媒指巴黎聖日耳門有望羅致泰維斯
而曼城亦準備盡快 close file
而肥安更話15日就夠條麻煩友操起狀態

Comment:
佢係就係 keep 到身型冇走樣
不過始終近幾個月打 golf 多過踢波
等到佢上力可能已經到季尾

3)
羅拔斯可能被布力般流浪外借去雷丁一個月

Comment:
條友以球員身份都居然可以有咁多時間客串講波
有幾唔受重用都真係好明顯
加上佢都已經34歲
返英冠應該已經係佢於英格蘭既最好出路

p.s.:
龍格堡果然甩底......

2012-1-20 (1)

1)
報導指曼城雖然加尼祖迪莊1/3人工
週薪由7萬5000鎊加到10萬鎊
不過佢依然滿意
消息指文仙尼覺得佢太貪而決定季尾賣走佢

Comment:
只係做耶耶托尼同埋巴利既替工都有10萬鎊週薪
咁既條件仲可以去邊到搵呀?

2)
昆士伯流浪已經落實以300萬鎊接收奧奴夏
而佢地亦被指就泰禾既轉會費同AC米蘭傾掂數

Comment:
加埋應該會成事既阿歷士
成條防線忽然間多左3個新兵
質素問題係降決左
不過默契又係另一個問題

3)
英國傳媒指莫耶斯要求愛華頓董事局籌旗500鎊
令佢可以於月尾引入堅韋尼鍾斯

Comment:
自從佩利斯簽左哥治
堅韋尼鍾斯就多數只係有份睇波
就算佩利斯把口講到佢有幾重要都係假
離隊只係時間問題

不過拖肥糖高層如果係撲到水既話
就一早撲左啦
除非當時人仲想踢英超
否則佢地點同中東球會爭呀

p.s.:
雖然香港嗰邊公布既名單包括龍格堡
不過直至前晚
佢應該仍然以養傷為由而仲未返清水心跳報到
除非佢出人意表咁直飛香港同球隊會合
否則真係要有心理準備睇唔到佢
兩個字:失望!

2012-1-18

1)
利物浦最近搵左加納U-20隊長 M.Abubakar 試腳10日
而佢地亦被指同意以100萬鎊接收 J.卡路士

另一方面,杜sir亦被指有興趣用500萬鎊引入冼佳亞

Comment:
加納小將18歲就已經當選國內聯賽既最佳球員
而後者俾傳媒形容為新迪高
士砵亭都係因為財困先焗住放人
雖然未睇個這兩個中場踢波
不過個履歷表真係幾正

2)
紐卡素落實從弗賴堡引入柏巴斯施斯
消息指轉會費約1000萬鎊

Comment:
這宗遲左幾個月既交易終於成事

塞內加爾3大射手
紐記已得其二
丹巴巴亞二傳比較好
只要分工清晰
威力絕對令人期待

最怕既只係丹巴巴亞可能真係唔使700萬鎊就可以走人

3)
史尼達既經理人宣佈這名荷蘭中場唔會於1月走人

Comment:
球隊最近打得咁順
佢同埋科蘭咁堅都要暫時做後備
加埋泰維斯可能加盟
意味薩拉迪更大機會走人

p.s.:
話說早前提及港甲有勾義嫂傳聞

之後有人將嗰故仔越寫越大
仲擺上人地隊波既面書
但又留低小弟嗰post條link

特此聲明嗰條友寫咩都唔關小弟嗰 blog 事
敬希注意

2012-1-16

1)
利物浦被指有多個新箭頭人選
杜sir既被指想用卡路爾作為交易籌碼羅致戴倫賓特
又被指睇中迪科爾同埋洛蘭迪

Comment:
3個都係正箭頭
某程度反映而家球隊既箭頭幾咁唔掂

英超難踢過荷甲超多
阿蘇唔能夠好似以前咁食波當食生菜都好正常
不過佢同其餘幾個射手既埋門一腳始終真係不敢恭維
特別係考慮到球隊兩邊傳中其實比上季做得好左

2)
韋根被指準備以200萬鎊向些路迪收購森馬拉斯

Comment:
踢成20場先入得18球
攻力同上季相比毫無進步
增強火力一定係馬天尼斯今個月既指定動作

不過這名希臘射手向來入波唔多
好似今季到而家踢左成23場先入得嗰3球
點睇都幫唔到韋根幾多

3)
英國傳媒指摩連奴派球探觀察史堤芬費查

Comment:
由三年幾前佢為喜伯年第一場波就連中三元起
這名蘇格蘭射手就成日同皇馬扯上關係

不過如果佢真係咁堅
買佢既又點會只係般尼同埋狼隊呀

p.s.:
日之泉JC晨曦搵到阿古路師兄?!

2012-1-15

1)
曼聯被指已經拒絕紐卡素對摩利士既50萬鎊出價

Comment:
雖然佢早前同巴塞既傳聞擺明係英國傳媒既自我幻想
但這名18歲進攻中場可能真係個寶
否則費sir都唔會仲想同這名麻煩友續約

就算曼聯最終同佢傾唔掂續約
唔肯咁平放人都好正常

2)
隨住加利卡希爾同車路士傾掂4年半既合約
保頓就被指想從紐約紅牛引入 T.Ream 作為替補

Comment:
冇左加利卡希爾
旨意禮特同埋韋達真有更大鑊

搵新人確係出路
問題係這名新晉美國國腳係唔係堅料先
因為美職盟雖然有個別球星
不過整體水準只係同英冠差唔多

3)
昆士伯流浪同阿歷斯,占士哥連斯,派拿同埋辛達告魯斯扯上關係
不過車路士以及熱刺已經拒絕佢地既出價

Comment:
既然車仔已經搞掂加利卡希爾
擺明只係睇死昆士伯流浪急住增兵而乖機托價

至於簽唔簽得到派拿
就或者要睇埋卡蘭積卡會唔會真係轉投莫斯科中央陸軍
因為哈利列納雖然唔重用佢兩個
但總唔會一次過放晒佢地走

4)
祖雲達斯準備出價1600萬歐元收購高拉洛夫

Comment:
左閘係祖記正選陣容最弱既位置
搵以前於意甲有好表現既高拉洛夫絕對冇錯人

問題係雖然基治算係正宗左閘
薩巴利達同埋尼史葛亦做到替工
不過佢地既水準唔見得高過高拉洛夫
曼城冇必要季中蝕讓

p.s.:
想講尋日本地波既雙料娛樂
SSP果然越踢越好
抵佢地開到齋

至於海豚隊雖然可以7鬼拍門
但戰鬥力都只係咁一般
關鍵好可能係教波既冇料到

先唔好講點解對住標準流浪都唔敢同人鬥攻
球壇張學友既然想打反擊
點解偏偏要收起陣中速度最高既馬高遜?

2012-1-13

1)
文仙尼透露由於中堅慌
必要時智派17歲荷蘭小將基列克出場

Comment:
老闆又唔係唔放水
臨時臨急頂爛市搵個中堅有幾難呀
反正加利卡希爾同埋森巴都準備走人
但落筆之際佢地既轉會又仲未落實

但相對於中堅
仲有人用既防中位置其實亦可能要買人
迪羅斯真係冇機?

2)
利物浦否認會以賤價將卡路爾送返去紐卡素
而紐記就被指有興趣同熱刺爭奪凱烈特

Comment:
無論係1000萬鎊定係1500萬鎊
再加唔知值幾錢既 variable
都幾可肯定蝕到入肉

卡路爾其實近幾個星期既表現已有少少改善
杜sir值得再俾機會佢
更何況阿蘇有排都未坐完佢既’冤獄’

3)
巴黎聖日耳門被指出價2800萬歐元
另加價值700萬歐元既附加條件
向AC米蘭收購柏圖

Comment:
原本冇左卡斯辛奴
曼城又拒絕佢地對泰維斯既2000萬歐元出價
新人都未斟得掂
而家又話有舊人可能會走
伊巴近期雖然著火
不過總唔可能旨意佢一個到季尾

講開又講
而家國米又想爭泰維斯
俾你係文仙尼都企硬3500萬歐元啦

4)
卡奴被指由國家隊集訓地杜拜請假返倫敦
英國傳媒就話佢係要處理佢嗰單價值300萬鎊既轉會
報導仲話阿仙奴同埋利物浦係最有可能既買家

Comment:
兩隊前線雖然唔多夠人
不過卡奴講真於英超無甚佳作
為左盡快簽佢而用300萬鎊未免唔化算
車仔為求甩手應該仲有講價空間

p.s.:
1)
都話冇左耶耶托尼既曼城大鑊架啦
如果唔係祖赫特有料到
佢地唔使10分鐘已經再嘗主場落後3球既滋味

2)
謝拉特踢利記踢到掛靴
預左不過知道落實都覺得好正!

3)
近日 youtube 有兩條片都堅正
關鍵字分別係’雲加無知’同埋’Shunsuke Nakamura amazing free kick’

2012-1-10

1)
史雲斯落實從車路士借用麥伊治蘭

Comment:
史雲斯算肯攻但效果一般
關鍵就係冇一個高質球員派牌
而家總算搵岩人

2)
法國傳媒指巴黎聖日耳門即將從巴塞接收麥士維

Comment:
自從哥迪奧拿多左用3-4-3陣式
正宗兩閘對巴塞肯定冇咁重要

丹尼爾艾維斯踢法似隻翼多過似個閘
推前一格仲岩佢發圍

艾比度雖然走緊下坡
不過夠高又有踢中堅既經驗
至少今季內都唔憂冇得踢

麥士維同艾迪安奴相比
雖然守得比較穩
但助攻唔掂兼唔可以踢埋右邊
於哥帥心目中當然更加冇地位

3)
利物浦被指同羅馬都有興趣羅致南特既17歲射手 J.Boukabous

Comment:
杜格利殊上任後都有好幾個年青球員多左出場機會
不過清一色都係來自中後場
反而中前場就明顯主張即食

不過佢幾個月先後羅致 J.Ibe 同埋 S.Ojo
而家又想郁郁想出手
反映佢都想為球隊中前場做好青訓

http://www.youtube.com/watch?v=BF-Tjn_PvF8
這名法國U-17射手似乎唔錯
真係有得唸

p.s.:
1)
早兩日曼城輸波
球證科爾涉嫌今季第3度吹死某一隊波
當然有排俾人插

球例係講明唔俾雙腳飛剷
不過高柏尼嗰腳全心攞波之餘
亦中波唔中腳
就連當時人蘭尼當場都冇打算投訴
可見佢嗰腳唔係茅波
就算係 foul 都唔值即刻見紅

不過曼城輸波既罪人仲有文仙尼同埋個別攻擊球員
打少個兼輸0:1
文仙尼當場應該做既係由一個後衛入替拿斯尼或者阿當莊臣
偏偏佢就蠢到搵尼祖迪莊客串中堅
令中場只得一個占士米拿算係比較搶得
令球隊中場更加失勢
而睇住拿斯尼成個隱形人就更加扯火

當球隊輸夠3球
佢先肯換入兩個後衛
擺明只係驚遇輸越大鑊
咁既應變實在遲得離譜

同耶耶托尼相比
尼祖迪莊明顯差唔止一班波
曼城輸既頭兩球都同佢有關
第一個睇住朗尼俾波走位後居然睇波唔睇人
而佢第二球俾韋碧克抽入窩利亦責無旁貸
應該硬朗既時候偏偏縮腳
真係俾佢吹到啤一聲

事實上無論巴利,尼祖迪莊同埋夏格維斯
佢地既截擊力,加量同埋活動範圍都同耶耶托尼冇得比
曼城今個月肯定超難捱
而冇左佢既負面影響
聽晚對利記隨時繼續出現

2)
亨利可能同兵工廠真係特別有火花
雲加會唔會真係買斷佢

3)
邊個話只有銀羅艦隊先有英超兵
而家連港產巴塞都有個前富咸中堅
證明聖誕嗰時收既料真係堅料

4)
美斯3年霸都唔覺佢有霸氣
冇羸過世界盃始終差啲

2012-1-8

1)
雲加表示將於短期內決定係唔係外借宮市亮
而佢亦表示唔會再買左閘
不過就打算借人到季尾

Comment:
左閘既選擇真係唔多
似乎最有可能既都係布歷治
不過佢既週薪高達9萬鎊
就算曼城肯補貼部份都可能 over-budget

2)
英國傳媒指原來丹巴巴亞既合約訂明
只要有1000萬鎊既出價
紐卡素就唔可以阻止佢離隊

Comment:
如果報導屬實
以佢既表現
紐記都好難長期留得住佢

3)
車路士即將從標準烈治引入尼日利亞U-20後衛 K.Omeruo
不過報導指車仔準備將佢外借去海牙
為期年半

Comment:
保亞斯接手後
引入既年青新血已經有成半隊波
不過至怕佢捱唔到收成就俾油王炒左

4)
利華古遜宣佈波歷克將於季尾離隊

Comment:
考慮到週薪同埋出場機會
其實幾間德甲大會都唔似有空間俾到佢
如果佢唔想收山
真係可能要轉戰美職聯

p.s.:
1)
有球迷種族歧視
影衰利記
不過睇到艾夫蘭單嘢
http://www.dailymail.co.uk/sport/football/article-2082325/Patrice-Evra-N-word-video-youtube.html
更覺阿蘇唔抵

2)
邊寫blog
邊等史高斯復出
總好過睇大婆台廢歌總選

2012-1-6

1)
紐卡素近日搵左來自非聯賽球會既前鋒普艾爾試腳
而佢地亦同多名球員扯上關係

當中包括R.Rutter,A.施素高,森巴,湯堅斯,
畢達菲特,哥尼特,伊亞昆達以及傳左好耐既洛達斯

Comment:
進展似乎唔多順利
因為兩名法甲兵A.施素高同埋哥尼特都唔似會成事
前者表態唔想離開里昂
而迪安就只批准後者於季尾離隊

而紐記兩度加碼至400萬鎊既出價仍然打動唔到韋斯咸
雙倍身價既森巴更加唔似合乎紐記預算
仲何況對手係仲有機會爭英超,下季歐聯在望既熱刺

另一方面,班士利既畢達菲特亦因傷而提早收咧
轉會傳聞自然不攻自破

而家最有機既可能係華倫丹既23歲荷蘭龍門 R.Ruiter
報導指這宗30萬鎊既收購可能於短期內成事

另外,白禮頓同英格蘭U-21中場 L.Dunk 只係得返18個月合約
不過雙方仍未達成續約協議
紐記有可能乘機搶人

另一方面,祖雲達斯以先借後買既形式羅致波里路後
伊亞昆達,阿馬利同埋加利亞雷拉都等住執包袱
又即管睇下紐記借唔借到前者

2)
報導指4間中超球會想簽沙加度

Comment:
布力般流浪一直以傷病為由而棄用這名前皇馬右閘
更有傳聞話雙方將於1月解約

不過如果佢真係有傷
早前又點可以為施丹同埋朗拿度朋友隊踢籌款賽兼助攻入波
講到尾咪又係印度老闆嫌佢人工高而唸縮數

p.s.:
港甲重開就有場3:3既入球騷
論可觀性真係今季之最

場波唔止入波打和
連紅牌都打和

少林寺既高麗牛奶仔左閘從未效力職業球會
怯場兼經驗不足正好解釋
佢點解第一場職業波就見紅
不過更抵死既係咁快放佢落場既高層

至於細佬(沈國強)
同意佢既第一張黃牌係球證誤判佢插水
不過第二張純粹係佢自己攞0黎衰
即管睇下咁既case有冇得打

2012-1-4

唸左個英超半程最佳陣容:
祉赫特
米卡李察士 京治 史堤芬泰萊 荷西安歷基
柏加 耶耶托尼
大衛施華
丹巴巴亞 耶高保 尹佩斯

如果只計11月尾前既表現
唸都唔使唸就知告魯爾最堅
不過如果計晒19輪
祖赫特又似乎overall較好
而考慮到佢前面既4個後衛有兩個都有啲流
就更加覺得應該選佢

右閘方面
火車頭上身既米卡李察士攻得又守得
論體能同埋身體質素
亦將史摩寧同埋格連莊臣好
有時真係唔係好知卡比路個腦唸咩

中堅方面
同其他名牌相比
京治無錯係名氣輸蝕既玻璃腳
出勤紀錄亦只係一般
不過今季有佢出場既熱刺真係好穩
只要睇下季初兩場冇左佢就俾曼徹斯特雙雄大炒
就睇到佢對熱刺後防既重要性
其實近勝長青樹費度

另一中堅就選史堤芬泰萊
紐記今季後防有改善
佢雖然冇告魯爾咁搶
不過功勞都唔少
加上平均兩場先犯規一次
佢比里奧費甸南,加利卡希爾,甚至泰利更值得入選英格蘭

左閘就選荷西安歷基
當fit既艾殊利高爾以及艾夫蘭肯定好過佢
不過佢兩個今季真係好唔爭氣
加上艾確圖以及巴尼斯又冇咩大進步
極少犯錯兼越踢越穩既荷西安歷基都算係冇選擇中既選擇

中場方面
柏加同埋耶耶托尼都肯定唔夠陣中既星級進攻球員搶鏡
不過作用真係好大

前者無論踢槌仔幫定係熱刺
都係咁搏晒命兼交捉功課
繼夏格維斯後最幫到英格蘭既中場一定係佢

而後者既力量同埋活動範圍都甚有當年韋拉既影子
隨住馬斯查蘭奴咁冇骨氣做佢既巴塞後備中堅
以及艾辛又抖多過踢
佢肯定係當今英超,甚至世界第一防中

講進攻中場
大衛施華肯定係英超最勁
冠絕英超既8次助攻唔足以反映佢有幾勁
因為控制到場波先係佢最得人驚既地方
睇過曼城大炒曼聯6:1嗰場波既應該明小弟講緊咩

前線唸左好耐決定唔選阿古路
雖然佢對住Big 5都有料到
不過咁 sharp 好大程度因為大衛施華太勁
所以單天保至尊既丹巴巴亞,耶高保同埋尹佩斯
可以有咁既成績其實更難得
特別耶高保踢既仲要只係布力般流浪

p.s.:
1)
R.I.P.艾柏列

2)
港甲都有勾義嫂傳聞?
係真唔係呀?!

2012-1-2

3場波想講......

1) 廣東對香港

香港踢完加時都唔使輸
廖sir應記首功

佢排陣同埋用人有3點值得留意:
一係預左作客要捱打
加上首回合下半場用雙防中後既效果比較理想
都應該係廖sir將陳偉豪推上中場既原因

二係港隊後防多左佢這個高佬
應付死球既能力真係好左
佢同吳偉超兩個高佬可以分開守近柱同埋遠柱
因為首唔合廣東入既兩個死球
都係針對遠柱冇吳偉超而成功二傳

另外,因為麥基同埋郭健邦都要主力回防
前者亦可能因為怯場而表現略為失準
佢頭一個鐘於反擊既表現絕對係強差人意
結果一對箭頭得因為供應唔多而好多時間都只係待波踢
所以廖sir索性收起速度同埋耐戰力都及唔上高梵既亨利(鄭少偉)
用多個可以幫手控球既徐德帥
這個調動亦打生左麥基
只嫌佢有幾次唔肯獨食

至於12碼階段
楊智雖然應付傳中球既能力好有問題
不過這名中國首席龍門兼中超最長時間不失球既紀錄保持者
本身既有身高優勢
加上反應可能仲快過英雄輝
射12碼要入到佢都真係唔易
如果佢唔係意外俾李志豪既'猛虎射球'射傷左
英雄輝都未必有機會再做英雄

不過根據本地女球證 Gigi Law 所講
射12碼期間只要未用盡換人名額其實都仲可以換人
點解廣東仲有一個換人名額
兜兜轉轉都仲要搵王偉龍做替工
究竟係咪執法球證同埋廣東隊班友都唔知有條咁既例
就不得而知啦

2) 曼聯對布力般流浪

MU輸波真係費sir攞0黎衰

120%同意就算冇人用
就算今場對巴塞或者曼城
總之朗尼,吉遜同埋伊雲斯咁冇紀律就要雪

不過收起晒里奧費甸南同埋傑斯就好有問題
前者應該踢正選
後者亦至少要做後備

堅恩教波冇料係事實
不過隊波仲好肯拚亦係事實
受傷既猛獸向來得人驚
暴力幫就算唔係獅子或者老虎
都至少係隻受傷既野狗

費sir心唸主場對榜尾球隊都求其派11個人出場
相地於賴地爛同埋後防犯錯
佢咁輕敵先係輸波既最關鍵原因

3) 新特蘭對曼城

曼城超過1個月英超作客羸唔到波
唔計11月尾對利物浦嗰場
其餘對車仔,西布朗同埋新特蘭都有個共通點
就係冇運

球證判少左1個12碼
尋晚池東沅嗰球亦明顯越位左成個身位
加上3次中楣
兩勝一和就咁變成一和兩負

不過人有三衰六旺
文仙尼本身其實亦爭唔落
雖然下場要對回勇兼出名劫富濟貧既利物浦
不過今場對手新特蘭自從奧尼爾接手後明顯回勇
打死都唔信佢敢輕敵

不過佢依然收起晒大衛施華,阿古路,巴洛迪利同埋占士米拿
前線既莊臣,拿斯尼同埋迪施高全係後備人腳
唯一既解釋就係佢既輪換功夫未到家
以往費sir少有咁做
點都留返一個半個做正選

文仙尼有時都有代表作
不過整體功力仍然同班老師傅有距離
今次又一例證

p.s.:
足球小將真人版之雙人倒掛
http://vdobuzz.org/v1246?pt=a7fcd