2011-12-31

1)
雲拜頓同拜仁將於季尾約滿
不過雙方仍未達成續約協議
報導指俄超既塔利克打算趁機會搶人

Comment:
這名比利時中堅今季x魚翻生
怕且只有曉姆斯可以同佢爭做德甲首席中堅
塔利克嗰個迷戀名牌既老闆今次總算識貨

2)
湯堅斯以及錫菲聯既 H.Maguire 都被指成為紐卡素既新中堅人選

Comment:
Big Sam 雖然例牌話唔會賣走湯堅斯
不過老闆蘇利雲向來認錢唔認人
即管睇下艾殊利今次肯俾幾多'誠意'

想講既係 H.Maguire
這名18歲新星細個其實踢中場
不過去左錫菲聯後就轉型踢中堅
上季尾開始彈出後即刻俾錫菲聯縛到佢2015年
佢於飛沙劈石既英甲踢左22場都只係攞左兩張黃牌
隨時係英甲版既菲爾鍾斯

不過傳聞紐記只係出價300萬鎊
最驚佢地俾維拉截糊

3)
亨利落實以借用形式重返阿仙奴
雙方簽約兩個月

Comment:
英國有講波佬以蘇甘保同埋列文回歸唔掂
而推斷亨利都唔會掂
咁既所謂球評家
講得唔好聽真係用個 pat pat 去呃飯食

蘇甘保以三十有五之齡去同後生仔鬥撞鬥靈活
咁就梗係衰硬啦
而成四張嘢既列文亦只係主打做後備
根本唔應該對佢有過份期望
而佢兩個唔掂同亨利掂唔掂根本就冇關連

如果要亨利好似以前咁成個入球機器先叫做掂
咁就一開始已經有不設實際既期望

其實一個攻擊球員對球隊既貢獻
除左入波以外
仲可以助攻,引開對手,走出禁區,甚至中場做駁腳
而帶住部份年青球員比賽亦係 invisible 既貢獻
柏金,比士利,班尼斯等當年都係咁轉型
亨利又點解唔得

另一方面,又有高見話亨利回歸會為尹佩斯帶來壓力
連咁既嘢都 up 得出
totally rubbish 莫過於此
尹佩斯唸到發燒都想有勁人同佢合作
而家終於等到又何來壓力之有

無論球場定係職場
總有啲廢柴驚死俾人比下去而抗拒同勁人合作
心態咁唔正確仲邊會有運行
自己係咁亦唔代表人地都係咁
況且尹佩斯點睇都唔似咁既蛋散

p.s.:
1)
溫馨提示兩則:
一係 Keymansoho 今期早左一日出街
二係記得聽日撐香港隊

2)
新年快樂

2011-12-30

1)
報導指雷耶斯即將轉投西維爾
雙方簽約4年

Comment:
既然唔多用佢既文沙奴已經炒左
除非佢咁快就肯定施蒙尼又唔用佢
否則使咩咁急轉個新環境

至於16場西甲只係入得18球既西維爾
當然有必要增強火力
不過如果雷耶斯仲係繼續咁海鮮波
對隊波既幫助真係好有限

2)
薩拉戈薩怒炒艾古爾

Comment:
開季7戰9分後全面插水
全因攻力唔掂
計埋兩場盃賽既11場波竟然只入5球
咁既攻力踢西乙都大檸樂
而主因應該係佢地俾人睇穿靠晒普斯迪加同埋加西亞

艾古爾開始多人識就係因為02世界盃
當年墨西哥踢法機動
慢熱既意大利對住佢地都冇晒符
而佢響朵後轉戰西甲都有過幾年光景

不過佢老人家自從執教馬體會既後期
就越來越剛愎自用
好多時用人都令人莫名其妙

例如再教墨西哥既時候已經俾佢吹到啤一聲
明明有潛質既小豆要坐冷板
冇班落既法蘭高同埋跟唔到比賽節奏既夾波王
佢又反而當寶

而近乎每隊俾佢教過既波都有球員同佢唔妥
就更加令佢冇運行

3)
基拿甸奴最終以670萬鎊轉投熱那亞

Comment:
熱那亞最多產既柏拉斯奧都只係入得半打
中場馬高羅斯入得嗰3粒就已經係次席射手
不過這名33歲老將球員生涯原來最叻嗰季都只係入得5球
又係明顯靠唔過
熱那亞搵個新射手絕對正路

不過基奴就算有心搏反彈
但去到新環境可唔可以即刻著火就頓成疑問
事實上好似上季既柏仙尼咁1月過檔就入球停不了既例子
於意甲並唔常見

Comment:
仲有幾個鐘頭就利紐大戰
紐記畏高既中路防線近日炸多幾次就散
期待倒戈既卡路爾可以爭氣
一於炸佢老味

2011-12-29

1)
柏度表示紐記做左咁多嘢都簽唔到 Maiga
1月亦唔會有其他新箭頭
不過同記者講起卡路爾
佢就話如果價錢合理
佢有興趣搵這個大隻佬回巢

Comment:
紐記俾得起幾多錢
杜格利殊亦肯定唔肯蝕得太多
同埋如果賣走佢
咪即係話俾人地知佢老人家冇眼光

2)
利物浦被指睇中祖阿倫同埋富斯尼

Comment:
富斯尼當打,爛打(有時略嫌過勇)兼助攻力強
更正既係踢兩邊都掂
如果600萬鎊有交易都唔錯

3)
麥斯盧比斯被傳考慮轉戰英超
加盟熱刺或者愛華頓

Comment:
熱刺後面人多
但病君亦多
前面既健康但就唔夠波踢
好明顯森巴單嘢堅好多

而愛華頓窮到燶
想簽佢除非又靠借
卡坦尼亞又未必咁大方

不過話說回頭
條友無論去西班牙,俄羅斯同埋意大利都咁低產
打死都唔信佢踢得掂英超

p.s.:
雖然球隊連續兩年羸形勢下
因為防守死球唔集中而和波
但尋晚場波絕對係09年以來睇過最爽既一場省港盃

睇得出好多球員都好有鬥心
亨利,高梵,傻邦,文彼德,李志豪,張峰,英雄輝同埋積施利都交捉貨
不過最堅正既始終係吳偉超
高波固然十球頂羸至少八球
仲倒掛護空門兼幾乎助攻入波
以咁既表現其實重返中超都掂
好難想像佢返南華要坐冷門

場波最令人扯火就係港奸球證湯巨森
香港主場作賽反而要受佢既四六雞(甚至三七雞)
真係有理由懷疑廣東嗰30萬獎金有預佢一份

而家放虎歸山
星期日咩下場都有晒心理準備
不過想講既係世事無絕對
大約20年前港隊都試過主場和波後
作客靠對手擺老烏而偷雞
當年港隊正值重組
同巴貝利拍檔既正係來自警察既周志成

2011-12-27

1)
安捷宣佈由 Y.Krasnozhan 出任新教練
雙方簽約4年

Comment:
條友無論踢波同埋教波都冇代表作可言
不過近幾個月佢開始多人識
都只係因為佢單醜聞

話說佢11年球季先有機會首次執教莫斯科火車頭這類大球會
不過教左幾個月就因為俾球會主席話佢放水輸波俾安捷而炒左佢
更奇既係俄羅斯足總唔肯開file查佢之餘
仲搵佢執教新成立既俄羅斯B隊

而前後唔夠5個月佢就過檔安捷
佢短期去俄羅斯足總過冷河
就好似香港某啲高官聲稱退休後去大財團做顧問咁
話冇嘢發生過都好難有人相信

2)
伊姆同阿爾克馬爾季尾約滿
不過雙方仍未達成續約協議
報導指好想搵中場既費sir考慮乘機搶人

Comment:
俾拿格碧克認定為為繼伊巴謙莫域後最好波既瑞典球員
怕且都唔會係二打六
事實上佢俾波,後上攻門同埋死球都唔錯
真係岩晒中場創造力不足既曼聯
不過佢身體質素一般
就肯定係佢立足英超既障礙

3)
雲耶馬被指成為紐卡素既增兵人選

Comment:
這名20歲肯雅新星今季加盟些路迪後
雖然冇得踢佢最擅長既防中位置
不過踢中堅依然有貨交
轉戰英超應該冇太大既適應問題
但問題係些路迪只係簽左佢半季
冇個筍價都好難打動到佢地放人

4)
卡錫既經理人透露這名塞爾維亞國腳肯定會於1月離隊

Comment:
當史杜歷治移入中路替補杜奧巴後
正好靠卡錫踢右路

英國傳媒雖然聲稱油王放水增兵
不過保亞斯都未必敢咁即刻俾2000萬鎊買斷佢
穩陣啲先借後買先最有可能

p.s.:
溫馨提示
一年一度既省港盃又到
聽晚大球場就會踢首回合
得閒既記得入場打氣

每逢踢太公波
點兵總會惹起紛爭
今次既然左路兩個羅系球員大眼仔同埋張峰都有傷在身
最後決選真係冇咩理由踢走晒李恆滙同埋瞿廷峰兩名左閘
如果保留可以踢多個位置既後者
而踢走一個南華大後備
似乎會比較合理

2011-12-26

1)
紐卡素繼續同烈治維以及奧奴夏扯上關係之餘
亦被指睇中AEK雅典既希望中堅文路拉斯

Comment:
這名希臘新星近期已經入選左國家隊
不過仲未代表希臘踢過A級國際賽
但報導話佢今季踢歐霸盃交到貨
加上國外球會既買斷價只係400萬歐元
所以愛華頓,韋根,西布朗,布力般流浪,韋斯咸,
西維爾,禾夫斯堡,漢堡同埋雲達不來梅
都對佢幾有興趣
紐記要爭羸咁多隊似乎好有難度

睇片唔知佢有幾勁
http://www.youtube.com/watch?v=lOYD-unhHzk
不過佢應該係個好捱得既球員
話說佢年幾前對死敵奧林比亞高斯一開波就俾人撞爆左顴骨
但佢都頂多十幾分鐘兼助攻入波
就算被換出後都因為要睇埋場波而唔肯去醫院
最終嗰個要做3個鐘既手術就咁拖多一日

2)
隨住波里路即將加盟祖雲達斯
熱那亞方面透露佢地既新射手離唔開基拿甸奴以及阿馬利既其中一人

Comment:
祖維迪既冒起
令基拿甸奴而家於球隊既重要性雖然已經大不如前
今季只得兩個聯賽入球亦少得離譜
不過既然仲有一定既出場機會
加上季尾又係歐國盃決賽週
冇必要而家咁搏轉會
睇怕熱那亞既新射手都係可以賤價搞掂既阿馬利

3)
雲加表示考慮借用亨利
不過亦表明而家冇向紐約紅牛提出有關要求

Comment:
當年亨利得益於柏金既助攻
兵工廠既4-4-1-1陣式威力驚人
而家既亨利又可唔可以擔任當年柏金既角色?

不過謝雲奴即將要踢非國盃決賽週
路斯基同埋艾沙雲又隨時待價而沽
連宮市亮亦好可能被借去法甲
球隊陣中既左路人數根本唔夠

就算多左亨利
又無論係4-3-3抑或4-4-1-1陣式
兵工廠1月既攻力亦未必太樂觀

p.s.:
最終雖然身在香港
不過真係忙到pk
講唔到聖誕快樂
都要補飛同大家講句 Boxing Day 快樂

2011-12-22

1)
紐卡素被指準備以1000萬鎊收購維頓漢
而柏度就否認佢地有興趣接收泰禾

Comment:
最近紐記既中路真係好唔掂
接連俾諾域治同埋西布朗既高波炸到散晒
既然前面都仲有丹巴巴亞頂住
要買人都應該買左中堅先

既然加利卡希爾可能700萬鎊就有得傾
紐記不妨爭埋一份
盡管機會點都及唔上車仔

2)
阿仙奴被傳希望從曼城挖走19歲新星古迪
這名瑞典射手今季以外借身份效力飛燕諾

Comment:
曼城幾經波折先成功同佢續約3年
佢今季踢12場又已經入左11球
風頭仲勁過上季另一借將宮市亮
文仙尼就算最終唔用佢都唔似會益雲加

3)
保桑被指成為維拉既新中堅人選
而柏度夫就否認會過檔新特蘭
跟隨舊波士奧尼爾

Comment:
佢既然總算於彭拿典奈高斯穩定落0黎
舒舒服服每年袋190萬歐元波糧好過啦
英國稅率好似仲高過希臘之餘
更大鑊既係英超對佢而言實在太難踢

p.s.:
唔係因為自己係利迷而撐阿蘇
不過今次佢要停8場又真係唔合理
一個有1/4黑人血統既人何來會鬧人黑鬼呀

話時話如果叫人黑鬼算係種族歧視
咁我地平時叫人鬼佬,阿星,阿差......
都隨時會俾人告到甩褲

2011-12-21

1)
馬體會決定開除教練文特奴
西班牙傳媒指佢地想搵賓尼迪斯接手

Comment:
本身莫財
賣走阿古路既錢又用晒去買法卡奧
既要執爛攤子
又冇得買人過下手癮
肥賓邊似咁抵得唸

2)
繼華加斯後
車路士又被指睇中巴里奧斯

Comment:
托利斯步緊膠刀後塵
安歷卡又已經落實去上海申花
卡奴同埋馬路達根本唔受重用
走唔走都係咁話

雖然杜奧巴回勇
史杜歷治又上緊位
不過就算加埋於預備組越踢越好既盧卡古
得3個箭頭信得過又未免太少
保亞斯想簽射手都唔難理解

不過南美射手踢英超向來唔係信心保證
已經適應歐洲足球既巴里奧斯今季又雪到硬晒
既然搵中堅都識得搵有英超經驗既魯迪維爾又或者加利卡希爾
搵箭頭大可考慮迪科爾
而只要收夠錢
熱刺亦唔似會因為佢地係死對頭而 say no

3)
隨住尋晚主場輸埋6分波大戰俾保頓
舒利亞取代堅恩既風亦越吹越勁

Comment:
堅恩根本就係英超林瑞麟
民望越低就反而越升官發財
前者當日靠篤死 Big Sam 上位
後者就靠做阿爺走狗搵食
兩個既所謂'才能'亦係嗰班 insider 先見識得到
球迷同埋市民根本唔知而家係唔係最失望
因為明天只會更失望

另一方面,暴力幫就算搵到老舒救火都隨時死路一條
如果條友根本唔識教
佢既號召力根本就等同興奮劑

當年佢都仲可以打電話俾波比笠臣問功課
而家再問怕且要靠阿sir識報夢

2011-12-18

幾場波想講......

1)
大埔對深水埗

大埔6連敗後止血
不過表現其實仍然係水準以下
早段先開紀錄後冇再食住個勢之餘
仲俾劉卓軒把握基頓犯錯而追平
之後佢地既形勢其實同對手相若
最終有得羸波只因張寶春調動正確
先後將前線比較沉既杜瀚滔同埋烈馬換走
結果兩個後備兵就咁炮製2:1既入波

其實小弟覺得和波會係比較合理既賽果
返屋企冇睇重播
唔知深水埗補時既入波係咪真係越位在先
只知成班細佬繼續肯拚肯搏
佢地成績停滯不前
好大程度因為外授質素同埋數量同對手有距離

比達算係踢得唔錯
至少可以帶住班細既去搶去拚
而個波到佢腳下亦少斷纜
基本嘢真係做足

至於佢既龍珠拍檔杜拉格斯
雖然應付高波既表現已有改善
不過整體質素以外援龍門而言真係非常一般

而費蘭度就肯定唔係好波
不過勝在爛打兼識靠小動作
整體表現合格有餘
唔知佢點解又冇得撈
佢已經唔止一次於港甲球會短期效力後被解約
如果尋日有佢
輸嗰兩球波或者可以避免

堅sir講過佢地冇咩經驗搵外援
所以行左好多冤枉路
其實搵外援邊個話一定要隔山買牛
搵啲有港甲經驗既外援真係咁難

2) 紐卡素對史雲斯

史雲斯出名作客失波多
紐記主場最終同佢地一對蛋
戰果難免令人失望

撇開冇運同埋禾姆守得好
紐記整體運作真係謝左好多
這個時候點樣去變其實好考領隊功力
不過柏度當然又唔合格

已經講到口臭既奧巴坦
夢遊球場既貝斯
同埋漸見疲態既古迪利斯
半場後其實都唔值得留低

成場波既驚喜就係見到大衛辛頓踢得唔錯
頻頻出擊大抵因為對手俾既壓力真係唔多

3) 南華對傑志

高世安大抵開始摸熟球員特性
今場既4-2-3-1下既球員選擇
再冇嚇你一驚既選擇
雙防中既排陣明顯係針對傑志控球能力較好既特點
不過類似既人腳選擇同飛碟陳同埋Kim Sir真係冇咩分別
搞左咁多都唔知為咩

林嘉緯復出後既狀態仍然仲未top fit
俾波亦因為南華佈防緊密而多於短波為主
威脅真係唔大
加上黃洋開季後既發揮差過預期
傑志今季既功力真係冇上季咁稅利

而佢地落後兩球下將羅沙度推上前線後亦無咩板斧
祖爾只係選擇性地於廿幾碼外犯規就足以應付這個高過佢既對手
加上羅沙度有時又只係走去邊線
希望引開祖爾俾空位其他隊友
但既然時間已經無多
唔明點解佢地唔踢得簡單直接啲
更唔明既係佢地老闆Ken哥話今場既表現係佢地今季既代表作

另一方面,早前從路邊社消息得知
羅神於宣佈1月增兵後
已同一眾外援講明再冇表現就冇得留低

祖爾今日馬達拉斯上身
1月應該仲未係執包袱時候
不過基奧雲尼同埋戴倫就真係好難講嘞

中島法蘭原本又係另一個冇場好波既例子
不過當有個球會老闆鍾意捧明星捧到上腦
又好難相信佢靚仔到咁會半季就冇到撈

p.s.:
近兩年本地波既紅藍大戰
如果小弟入場既話南華就輸硬
反之亦然
真係好邪

2011-12-16

歐聯抽籤結果如下:
里昂對尼科西亞
拿玻里對車路士
AC米蘭對阿仙奴
巴素利對拜仁
利華古遜對巴塞
莫斯科中央陸軍對皇馬
辛尼特對賓菲加
馬賽對國米

Comment:
拜仁,巴塞同埋皇馬明顯執到好籤
AC米蘭16強唔使對佢地
亦算執返支中籤

紅黑兵團自從07年捧盃後
近年對住英超球會都因為速度輸蝕而冇好下場
不過今季既兵工廠差過08年嗰隊
只要伊巴重拾歐聯射門鞋
雙方既形勢只係五五
勝負關鍵應該係雙方防線
哥斯尼踢歐聯既表現向來好過英超
佢隨時醒過對家既兩個名氣比佢大既中堅

而車仔同埋國米雖然於本土聯賽表現唔對辦
不過踢歐洲賽又係唔同故仔
保亞斯於對華倫一仗總算試岩條高效率中場
只要後防睇得住卡雲尼
出線機會仍高
當然烏拉圭射手會唔會於1月過檔曼城亦係後話

至於陣中充斥老鬼既國米
上至雲尼亞里,下至球員
隨時因為聯賽失地太多而只以歐聯席位為目標
繼續選擇性發力既可能好大
不過以佢地而家既料
除非8強又抽到好抽
否則多數止步

里昂啲運似乎仲未用完
16強居然抽到潛力怕且見底既尼科西亞
不過如果這隊過氣法甲班霸繼續分組賽初段既劣作
出局並唔係太冷門既賽果
畢竟對手踢擦鞋仔波都幾耍家

至於賓菲加對辛尼特
表面睇係阿仙奴對AC米蘭以外另一五五波對決
不過當時俄超又未重開
辛尼特既狀態應該仲未谷得起
只要賓菲加keep到分組賽既水準
將會繼06至07年球季後再次殺入8強

2011-12-15

1)
Maiga將於短期內落實以700萬鎊由索察轉投紐卡素
不過佢由於要代表馬里參加非洲國家盃
所以好可能要延期向紐記報到

另一方面,近日同森林以及昆士伯流浪扯上關係既森遜
已經拒絕紐記提供既新合約
不過紐記亦表明唔會於1月賣走佢

而曼聯就由於中場唔夠人用
而俾英國傳媒吹佢地有興趣以3000萬鎊一併收購迪奧迪以及卡比耶

Comment:
紐記最終簽既係Maiga而唔係基奧特
好可能又係因為錢作怪
馬里射手700萬鎊就有交易
不過蒙彼利埃就企硬要有1000萬鎊先會放走法國碧咸

另一方面,紐記而家後防唔夠腳
而以森遜既二打六質素又唔慌賣得到咩嘢高價
等到季尾先待價而沽好過啦
紐記高層似乎又蠢唔晒

不過如果曼聯真係出1500萬鎊買其中一個防中
艾殊利唔落order出貨止賺先奇

2)
哥迪奧拿否認會於1月賣走韋拿既報導
不過佢依然繼續被指係利物浦,車路士以及維拉既羅致對象

Comment:
韋拿最擅長踢既位置其實只有正中鋒
偏偏球隊又已經有美斯
而韋拿踢左路既效果
其實又唔見得比陣中既年青球員好

以巴塞唔多理想既財政狀況
暑假因為一併引入阿歷士山齊士同埋法比仔而又洗大左
趁韋拿未大幅跌價前掟貨都好正路

3)
英國傳媒指保亞斯要求球會
於1月以2000萬鎊賤賣托利斯
不過佢已經否認有關報導

Comment:
雖然長遠要整靚盤數交俾歐洲足協
但係對油王而言
反正收返2000萬鎊都唔幫補得幾多
面子問題更加令佢打死都唔賣
佢邊肯咁快賣走廢托
睇下當年軍刀擺到變左膠刀就知啦

p.s.:
安歷卡轉戰中超
大陸傳媒而家又話申花仲想簽埋細哨

簽到佢地係可以吸引到更多球星加盟
不過一日搞唔掂黑哨問題
中超都會繼續係死水
而一日搞唔好青訓
中國都只會繼續係亞洲二線球隊

2011-12-14

因為 log in 唔到 blogger
過去幾日都冇出過 post
請見諒
今日先講過去幾日既部份賽事

1) 天水圍飛馬對南華

印象中好似冇睇過一場波
3分鐘內兩隊梅花間竹咁入波
人有三急又或者去完小食亭買杯奶茶都隨時走晒寶
足球吸引在就係有時估佢唔到

歐沖雖然一個助攻一個入波
但其餘時間既表現只係一般

陳七連續3場有波入
表現持續回勇原本可以俾人鬧少幾句
偏偏而家又因為打人都唔使坐波監而俾人插得仲勁
星期日對傑志有咩表現就要睇佢既心理質素

成單鬧劇
小弟無意幻想太多
究竟BMA甲組足球聯賽係唔係真係屬於BMA
只係想講所謂既紀律小組做嘢雙重標準

上季基藍馬因為同類事件而被抽後算帳停賽3場
而家球證承認睇重判知道出錯
而偏偏好巧合咁遲左交報告
紀律小組亦突然唔想打擊球證威信
而白白放生陳七
是否公道自在人心
而紀律小組咁做後仲有冇威信亦頓成疑問

2) 皇馬對巴塞

要羸巴塞
如果唔用大巴士戰術
就要好似畢爾包中前場球員咁咁餓狗搶屎
偏偏皇馬兩樣都做唔到

而皇馬俾唔到壓力巴塞防線
當然同C7,奧斯爾以及迪馬利亞3個再次大波隱形有關

C7表面這方面最出名
丹尼爾今場毫無顧慮咁出擊兼助攻法比仔入波
正正係因為C7冇料到
而萬人迷空晒都射唔入2:0
亦正係今場波既第一個轉捩點

不過迪馬利亞同埋奧斯爾既情況其實更嚴重
前者型過既大波其實只有京奧決賽
所以當佢速度上羸晒艾比度
都係俾唔到巴塞太大威脅

而後者向來對巴塞以及西班牙都冇料到
季前既西班牙超級盃已經係僅有既佳作
當中原因應該同供應不足有關

3) 車路士對曼城

曼城輸波
多得兩大毒瘤基治同埋尼史葛一齊發功
佢地既犯錯就好似交稅咁走都走唔甩

車仔雖然羸波
但整體表現唔算突出
半場唔使輸夠兩粒只因卡頓保又發雞盲
改組後既中場效率確實高左

不過前線只得杜奧巴同埋史杜歷治兩個信得過
唔足以成季多線發展

而後防成季都冇大改善
泰利明顯走緊下坡
艾雲奴域又或者大衛雷斯做佢拍檔都唔幫補得幾多
近幾場失球減少只因施治表現略為回勇

同意保亞斯所講現階段失多7分真係唔算得係咩
不過可以收復7分失地既一定唔係眼前既車仔

2011-12-9

1)
繼同安歷卡扯上關係後
利物浦被指同阿仙奴,史浩克04,祖雲達斯以及拉素爭奪普度斯基
而杜sir亦被傳想搵泰摩斯卓克替補盧卡斯利華

Comment:
利記入波能力弱係事實
冇運以外既原因亦多到瀉:

幾名新兵未有化學作用
卡路爾表現亦屎過預期超多
而英超防守遠比荷甲嚴密
令蘇亞雷斯難以好似以前咁食菜咁食

要改善攻力大抵只有兩條路
一係等中前場交到貨
令蘇亞雷斯少啲走返轉頭幫手組織
而更加專注埋門一腳
二就當然係搵個埋門一腳保證既射手取代卡路爾
不過安歷卡同埋普度斯基都唔屬此類
而佢地一旦加盟亦只會令利記中前場融合既時間更漫長

另一方面,泰摩斯卓克跑得之餘又有唔錯既攔截技巧
仲可以串演中堅
絕對係高質既防守球員
佢於拜仁撈唔起只因欠缺反守為攻既能力
不過從利記輸俾富咸嗰場波睇到
查理阿當以及軒達臣都因為有史柏寧包底而有更好發揮
一個好似佢咁勁既防中加上4-3-3陣式可能先至最岩利記

不過一個已經32歲既剩餘物資都夠膽死叫價400萬鎊
拜仁擺明趁火打劫
咁識計數唔怪得連續19年賺錢

2)
布力般流浪被傳有興趣接收艾比亞

Comment:
佢以前真係好勁
攔截,遠射,體能同埋領導能力既指數都爆晒燈
不過近年實在太多傷患
養傷同埋失業既日子仲多過踢波
零機價都要唔過

p.s.:
1)
巴洛迪利細佬近日去左史篤城試腳
唔知佢係咪又係腦殘
只知將來雙城記隨時有得睇兄弟對決

2)
keymansoho 面書誠意推介:
When you don't give up......you cannot fail
好感人,共勉之!!!
http://www.youtube.com/watch?v=kZlXWp6vFdE&sns=fb

2011-12-8

1)
隨住史堤芬泰萊提早收咧
紐卡素被指將於1月收購兩名後衛
奧奴夏,彼達斯以及麥比華亦隨即再同佢地扯上關係
另一方面,佢地近日就被指睇中水晶宮19歲新星W.沙夏

Comment:
W.沙夏曾經代表英格蘭U-19出場兩次
佢雖然可以踢正箭頭
不過平均廿場先入一球既數據實在得人驚
其實佢既強項係助攻
所以副鋒先係最岩佢既位置

2)
報導指阿仙奴將於1月以賤價200萬鎊接收阿歷士

Comment:
既然唸住使錢
買個右閘補返個窿
總好過又養多個廢柴中堅
佢係有制空能力同埋助攻能力
不過穩定性同埋位置感真係好一般

p.s.:
尋晚發夢曼聯輸1:2
一覺醒來又係咁既賽果
曼聯終於要為佢地積弱既防線本利歸還

而家仲有維迪隨時長抖
相對於曼城既強勢
防守肯定係曼聯衛冕英超既更大障礙

另一方面,曼城雖然歐聯出局
不過如果佢地只用二線兵踢歐霸
大衛施華,阿古路等從來都唔係鐵人類別既技術型球員
而家肯定多左時間休息
對佢地爭英超其實更加有利

類似情況亦可以應用到多蒙特同埋里爾身上
特別係前者已經追到只係落後繼續歐聯旅途既拜仁1分
對方就算幾疊馬都難免會覺得吃力

不過阿積士就算可以專心荷甲
今季都好難樂觀
本來落後阿爾克馬爾8分唔係絕路
不過隊波又搞高層權鬥
加上咁戲劇性俾里昂 turnaround
對球員既打擊都咪話唔大

2011-12-5

想講兩場英超......

1) 紐卡素對車路士

只講調動
柏度輸到仆直
林伯特射失12碼兼冇腳好波
保亞斯話知佢係老二都換走佢

紐記邊個踢得最屎?
佩治送死咁俾杜奧巴ko
不過怪佢就不如怪紐記高層慳錢慳出個大頭佛
講令人扯火遠不如奧巴坦
條友波底唔好但超鍾意上腳
俾波冇創造力兼成功率低
比當年既尼索比亞更加似係足球黑洞

相反盧雲卡蘭斯算係紐記比較好既一個
至少俾個幾腳好波之餘
就算下半場去唔擅長既左路發展都交到貨
而佢體力下降既情況亦唔算嚴重
除非佢有咩暗病傷患不為人知
否則真係俾柏度既調動吹到啤一聱

2) 韋根對阿仙奴

哥斯尼客串右閘既表現絕對在佐羅同埋贊堅臣之上
至少波底好啲
有餘力開上前線助攻

不過一隊除左養傷中既沙格拿就再冇其他正宗右閘
既然哥斯尼已係第三個俾雲加捉去客串既中堅
教授下次不如試下用費明邦或者高基連
佢兩個至少比嗰幾個中堅靈活同埋跑得
話唔定佢地會係另一個費文尼

p.s.:
蘇古迪斯英年早逝
佢係森巴82同埋86嗰兩隊超級技術型球隊既隊長
波齡淺啲既如果唔知佢有幾勁
不妨睇下以下兩球波:
http://www.youtube.com/watch?v=Vkq4fVKzibY&feature=related

http://www.youtube.com/watch?v=Ck6swtUa1Ok&feature=related

2011-12-3

歐國盃分組賽抽籤結果如下:
A組:波蘭,希臘,俄羅斯,捷克
B組:德國,荷蘭,葡萄牙,丹麥
C組:西班牙,意大利,愛爾蘭,克羅地亞
D組:烏克蘭,英格蘭,法國,瑞典

Comment:
A組方面
4隊都唔係歐洲一線球隊
計人腳俄羅斯稱先少少
波蘭就有主場優勢
出線可以睇高少少

B組方面
傳聞口中既死亡之組其實有幾'死亡'
德國同埋荷蘭明顯比較高班
考慮到佢地8強對手只係來自A組
就算人腳最勁既俄羅斯
亦因為教練又軒迪克換上艾禾卡特而神奇不再
入4強肯定係德荷兩強既最低要求

另一方面,葡萄牙同埋丹麥近年多次交手
互有勝負而冇明顯優勢
萬一第二輪分組賽和波兩敗俱傷
隨時可以執定包袱

C組方面
西班牙雖然踢友誼賽頻頻輸俾強隊
不過當中主因可能係嗰班星級球員選擇性hea踢
重要場合仍可信賴
就算甩轆都唔會係分組賽
佢地同意大利表面睇一定係出線熱門
不過出線過程五勞七傷就肯定

因為愛爾蘭爛打又擅守
單係要射死基雲已經令人頭痛
而克羅地亞亦擅踢擦鞋仔波
萬一意大利既慢熱老毛病又再發作
隨時俾其中一隊偷到雞

D組方面
小弟就反而覺得比較難估

英格蘭近來友誼賽既成績表算係近年最佳
不過到時同瑞典打真軍仲可唔可以再羸對方就好成疑問
加上極可能3場分組賽都冇晒朗尼
幾個球會級射手隨時因為見唔慣大場面而腳軟
要出線真係要靠晒一條全新打造既中場線

法國方面
白蘭斯接手後慢慢執正隊波
活力同埋隊型都有
不過個別位置始終令人幾唔放心
出線機會未必同名氣成正比

瑞典方面
伊巴謙莫域回歸後同托禾倫以及艾文達仲未產生到化學作用
不過佢地勝左多打仔格球員
肯搶肯拚未必死硬

烏克蘭方面
佢地因為唔使踢外圍賽而頻頻踢友誼賽
初期表現真係幾唔掂
對稍有名氣既球隊例牌輸至少兩球
不過近兩個月表現明顯有改善
羸到3隊弱隊之餘
和德國3:3嗰場仲令人眼前一亮
加上球隊除左舒夫膠刀外
終於有另一個Andriy--耶莫蘭高上到位
只要佢地首場ko到瑞典
絕對有力靠主場幫助而入到8強

2011-12-1

1)
布魯士成為今季英超第一個下台領隊
報導指曉士,奧尼爾,麥卡倫,艾歷臣以及賓尼迪斯都可能接手

Comment:
肥賓未必肯執教這類中型班
加上老闆已經俾布魯士fing左足足7000萬鎊
未必會再有太多閒錢俾下任領隊shopping
所以艾歷臣咁既大花筒又應該唔會係真命天子

麥卡倫方面
佢自從搞到英格蘭入唔到08歐國盃決賽週而被踢走後
事隔多年最近先重返英格蘭球壇
不過又係搞到森林一鑊粥
主席艾利斯索特唔似會落疊

最有機會既應該係擅長教中型班既曉士同埋奧尼爾
不過前者可能捱義氣接手威爾斯
想分身都未必得
而後者當年教李斯特城冇咩點用錢都交到成績
主席艾利斯索特肯定勁buy佢

2)
恩沙基幾可肯定於1月離開AC米蘭
英國傳媒就指布力般流浪有興趣接貨

Comment:
38歲先初戰英超?
去教耶高保同埋凱烈特埋門一腳就仲有得唸......

p.s.:
睇重播見到既唔止係比拿美既兩個助攻
仲有佢背後嗰份專業
同埋遇到困難都硬住頭皮頂硬上既決心

2011-11-30

1)
利物浦被指打算搵戴倫德下季以自由身加盟

Comment:
佢可以踢晒成條左路之餘
亦可以客串踢防中,甚至前鋒
任何球隊既後備席都應該有一個咁既通天老倌
雖然荷西安歷基同埋盧卡斯利華都持續進步
前線射手亦有人滿之患
不過真係想利記可以執到這個筍盤

2)
紐卡素再次被指於1月引入基奧特
報導指紐記打算出價600萬鎊
而蒙彼利埃就還價1000萬鎊

Comment:
佢總算係一個有頭有腳既新晉法國國腳射手
不過值唔值成千萬鎊
就不妨睇下以下條片:
http://www.youtube.com/watch?v=jQ_DtIlCTfM

3)
阿仙奴近日分別同普度斯基,阿馬利同埋拿修斯扯上關係

Comment:
拿修斯雖然最冇名氣
不過長遠而言對兵工廠最有用

其實有報導指雲加於今年1月已經出價500萬鎊
(當中300萬鎊係 add ons)
去收購這名岩岩攞成人身份證既中堅
但森林當時未為所動

當日搶輸史摩寧既雲加一直想簽本土中堅
當然未肯放棄既佢月初又派球探
去觀察這名新仔踢英格蘭U-19既表現

保夫萊特接手森林後
當務之急除左要將隊波撥亂反正外
仲要留住佢唔好1月走人

4)
AC米蘭未能成功以借用形式羅致杜奧巴或者泰維斯

Comment:
如果唔係車仔只肯俾佢1年新約
杜奧巴一定唔會唸住走人
畢竟廢托已經廢到踢聯賽盃都冇料到
史杜歷治距離正式上位又仲有段時間

叫杜奧巴先以借用形式加盟
同叫佢試腳幾個月又有咩分別
加上出手唔慌太高
AC米蘭簽唔到佢都好正路

泰維斯方面
從艾迪巴約同埋祖奧等例子
紅黑兵團肯定睇穿
曼城高層以及文仙尼費事眼冤而隨時借走,甚至乎貼錢送佢走
加上佢地亦有接收羅賓奴既前科
成事機會明顯高好多

一旦佢成功過檔
AC米蘭亦肯定進一步由老人院轉型為壞孩子俱樂部
泰維斯,伊巴,羅賓奴,卡斯辛奴,加度素同埋麥薩斯
再加個回歸既老淫虫貝老
唸起都得人驚

2011-11-28

用'有幸有不幸'去形容曼聯同埋紐記
睇過既應該同意

作為一個中立球迷
紐記今場有威脅既攻門真係極少
有分落袋真係靠晒防守
雖然今季已經見識過紐記既鐵血防線好多次
不過最堅真係今場
護空門同埋左飛右撲應有盡有
連賴恩泰萊都識得於最後關頭睇住小豆去裝佢越位

曼聯好耐都未試過好似今場咁於尾段攻到對手咁風聲鶴淚
換轉對住韋根或者保頓
隨時已經入到3球

想講費sir點用朗尼同埋靴南迪斯
早前費sir考慮用前者取代史高斯踢中場
但如果朗尼墮得太後而小豆於前線又冇其他拍檔
就好有問題

小豆既優點係走位同埋埋門一腳
當朗尼過多時間返中場搵波踢
小豆要以平平無奇既腳法去以一敵二實在蝕底
這亦係佢上半場比較失色既主因

紐記方面
奧巴坦成場波只有一腳傳中叫做比較大威脅
佢加埋助攻威力平平既森遜
令紐記兩側既攻力失衡

事實上馬維拿斯玻璃腳
艾美奧比細佬係有進步空間
不過現階段同奧巴坦都只係勤力但貢獻唔多既一類
加上盧雲卡蘭斯已經冇咩速度兼唔受重用

要有成效就怕且要從賓艾化,賴恩泰萊以及古迪利斯3人中打主意
不過前者本身活動範圍大
加上又係球隊中前場既橋樑
郁佢對佢同埋球隊都唔化算
真係有得唸既其實係後兩者

唔好旨意賴恩泰萊落到底
不過獨孤一味斬中都足以令丹巴巴亞又或者艾美奧比受益唔少
而古迪利斯以前亦踢過右邊
效果亦有保證
不過無論用邊個
柏度都要先放膽起用大衛辛頓
否則醫得頭痛時又醫唔到腳痛

另一場要講既係利記對曼城
利記今季主場戰績真係平平
埋門把握差係主因
不過特別多龍門於晏菲路守到上晒身亦係事實
迪基亞,魯賓同埋禾姆之後又有個祖赫特

之前講過曼城一對中堅有隱憂
其實前線既巴洛迪利同樣麻煩
條友正常返一輪後又疑似病發
文仙尼真係要認真考慮雪佢幾場
順便俾機會操返起迪施高既狀態去迎接快車檔期
否則當玻璃腳既阿古路有咩冬瓜豆腐
大衛施華就算繼續發功都冇人受惠

p.s.:
杜sir講得冇錯
一場波既結果同史必既死
相比下已經變得唔重要

史必唔算好好波
不過場場搏晒命又感染到隊友
已經令所有人同意佢係任何球隊都應該有既球員

而最令小弟印象深刻係佢為左延長球員生命而去學瑜伽
英超球員玩瑜伽既風氣其實亦係由佢帶起
當好多球員花天酒地俾女人俾賭博玩死自己
對比下就知佢有幾鍾意踢波
亦係職業球員既好榜樣

有咩嘢令一個時刻發放正能量
家庭事業兩得宜既既人
忽然要走上自殺之路
如果連抑鬱症既原因都排除埋
答案可能真係永遠無法解開
anyway,R.I.P.Gary Speed

2011-11-25

1)
隨住輸晒3場Big 4大戰兼跌落第5
加上歐聯又有出局危機
保亞斯被炒既賠率已經解至5.5倍
更有報導指個別主將已經對佢失去信心

Comment:
軒迪克而家available
佢同油王又fd過打band
俾你係保亞斯都咪話唔驚

佢近來為左球隊成績
已經唔怕得罪油王而越來越少用廢托
不過更關鍵既似乎係執返好條防線

2)
紐卡素近日同幾名球員扯上關係
當中包括史葛布朗,麥比華同埋N.Clyne

Comment:
史葛布朗係好跑得
隨時比卡比耶更跑得
不過要硬朗踢法已有迪奧迪
佢俾波既能力亦遠差過卡比耶
明知到紐記整定只做佢兩個既副車
當然表態繼續做佢既些路迪隊長先係明智

至於麥比華就係一個於法甲等住上位既新星
這名前法國U-21中堅通常踢右閘
但由於佢亦可串演中堅同埋左閘
有英國傳媒指紐記球探已經視佢為高路仙尼離隊後既替補人選
不過其實紐記後防唔多夠腳
無論高路仙尼走與唔走都應該考慮下佢
不過佢上年先同蒙彼利埃續約到下季尾
紐記唔受唸住可以平買

N.Clyne方面
印象中紐記唔止一次被指打佢主意
怕且今次最有機會
因為這名英格蘭U-20右閘同水晶宮將於季尾約滿
紐記大可乘機賤價搶人

p.s.:
1)
有個11歲既日本小朋友踢巴塞
當然冇戴志偉咁神
但真係有板有眼
http://www.youtube.com/watch?v=LUiCJ2TuArQ

2)
今日又聽到有人問港甲有咩好睇
港甲既水準係冇平時睇電視既外國波咁高水準
不過總算係自己地頭既足球
而當中其實亦有唔少好嘢

例如深水埗正係好例子
佢地雖然小本經營兼整體經驗不足
不過勝在年青當打有活力
更正既係佢地隊型同埋效率兼備
叻過好多投資多過佢地既所謂勁旅
尋晚佢地對南華場波就係好例子

2011-11-23

1)
保頓被指準備以400萬鎊接收奧奴夏

Comment:
以佢地全英超最屎既防線(12場失29球)
唔好理加利卡希爾1月係唔係會被高價賣走
搵返個正常後衛都好應該

2)
森美亞被指成為紐卡素既700萬鎊增兵對象

Comment:
這名巴西裔進攻中場幾好波
如果紐卡素有心買就真係要趁早
否則等佢做埋克羅地亞大國腳就肯定仲貴
不過而家700萬鎊既價錢都未必滿足到薩格勒布戴拿模
當年既達施華初冒起都已經要800萬鎊

3)
由於貝迪素為國捐軀
羅馬被指希望向曼城借用沙域

Comment:
奧奴夏以及高路托尼同球會既關係唔多好
1月隨時走人
加上尼史葛不穩
文仙尼又傾向用米卡李察士打閘
曼城既後備中堅其實唔多
文仙尼應該唔會放人

4)
利物浦令人意外地同尼敦戴亞扯上關係

Comment:
利記中前場突晒腳
仲點容納到佢
加上佢似乎頂多夠班轉戰中型班

p.s.:
曼聯本土連續5場冇失波只因對手把握力差
佢地既防線依然不穩
既然對巴素利都和3:3
和埋賓菲加2:2都唔係奇事
如果旁證眼利少少睇到hea碧越位在先
佢地輸埋都唔奇

想講既係曼城
作客輸俾拿玻里
可能因為卡雲尼同埋迪辛迪斯太fit
亦可能因為巴洛迪利又忽然腦殘而唔識入波
不過真正關鍵係文仙尼

上場對紐記失勢左成個下半場先肯換入大衛辛華
當時冇俾對手追近1:2實在夠運
今場佢既應變繼續緩慢
49分鐘已經落後
佢居然等到70分鐘先開始換人變陣
而更大鑊既係迪施高咁浸
佢居然可以等到81分鐘先用阿古路入替佢
今次又一例證證明文仙尼係庸帥

另一方面,曼城開咧後只係試過5次落後
當中4次都係歐聯應該唔係巧合
佢地陣中球員既整體歐聯經驗其實同高昂身價唔成正比
如果細心發現
都會發現佢地既球員踢歐聯係比較緊張
而尼史葛一到歐洲戰場就患得患失
反映佢只係一個英超球會質素既中堅
難登大雅之堂

2011-11-21

想講幾場波……

1) 諾域治對阿仙奴

尹佩斯繼續場場著火
不過球隊始終冇合適替補
雲加真係不妨趁美職盟休季而翻兜亨利
俾尹佩斯趁機會抖多啲之餘
仲可以搵亨利過禾確特幾招
講真禾仔無論斜cut入中路既 timing 同埋埋門一腳
都真係未到英超水準

2) 曼城對紐卡素

卡比耶雖然好跑得
不過佢始終似個指揮官型球員多於一個藍領球員
格夫里雖然已經踢得好落力
不過佢始終做唔到迪奧迪嗰種硬朗攔截
結果連帶卡比耶既表現都只可以話係吃力不討好

不過曼城半場雖然有超過7成既控球時間
但表現只係平平無奇
原因應該包括國際賽後遺症
不過更關鍵既係拿斯尼取代唔到top fit既大衛施華
如果唔係賴恩泰萊於幾分鐘內接連犯錯
小弟倒肯定紐記可以守和半場

多得兩球優勢
有歐聯後顧之憂既曼城下半場初段明顯冇咁積極
文仙尼亦因為要計住孤寒數而拖到69分鐘先換入大衛施華
紐記下半場既前半段算係同主隊拉成均勢
不過小弟就覺得佢地捉到鹿都唔識脫角
咁講唔係因為賓艾化省中柱
而係柏度唔識換人

條友第一錯係冇半場用大衛辛頓換走好似失左信心既賴恩泰萊
後者下半場至少3次於K球位斷纜
最終亦因為佢失位而簡接導致賓艾化越幫越忙

第二錯係既然森美艾美奧比對住基治都唔多搵到食
倒不如換佢大佬入場為丹巴巴亞開路
紐記今季踢法係比前注重控球在腳
不過既然對手有耶耶托尼同埋尼祖迪莊等頂級防中
少左迪奧迪既紐記與其夾硬搶中場
真接放長波既效率可能仲高
因為甘賓尼做左隊長後既表現反而跌watt
尼史葛亦係計時炸彈
衝多幾衝肯定會散
而這亦係曼城正選11人既最大漏洞

3) 車路士對利物浦

利記客勝算係爆個半冷
佢地既表現其實唔算好突出
好大程度係車仔自己攞0黎衰
佢地禁區內11次埋門只係入得1球
咁既數據對英冠球隊都肯定大鑊
更大鑊既係後面繼續冇防守

米基爾已經唔係第一次於危險地帶玩失波
以佢既quali
其實就算艾辛養傷都唔配做車仔正選
羅美奧計波底絕對在佢之上
如果保亞斯真係咁唔介意防中玩波
好應該俾多啲機會佢

佢地失第二球波又係捉虫
艾殊利高爾好少cut入中路就老馮以為所以側擊球員都同佢一樣
3個星期前俾禾確特偷完雞
今次又衰俾格連莊臣
一個路數明顯有問題既左閘仲算係世界頂級?
No way!

4) 天水圍飛馬對南華

高田壽典肯定係最佳球員
飛撲徐德帥既遠射非常精彩
最差球員就肯定係陳7
不過佢又似乎係最佳演員

南華於組織方面既表現
相對於上場對深水埗其實無咩改善
就算俾多半粒鐘佢地
輸1:3既機會肯定大過追平2:2

p.s.:
咸哥雖然唔係衰家
不過又食尾糊
但真正搶鏡既好似係當路雲

2011-11-19

1)
紐卡素落實將蘭加外借去班士利兩個月
而佢地忽然被指有興趣同列強爭奪加利卡希爾之餘
亦同謝拉域以及A.查奧爾扯上關係

Comment:
就算高路仙尼真係以筍價賣俾利物浦
以艾殊利既作風都唔似會俾太多budget柏度買替補
就算雲加話唔再打佢主意
新一代加利仔都應該輪唔到紐記去爭

另一方面,李斯特城暑假時出價650萬鎊
都打動唔到格流放走謝拉域
這名克羅地亞中鋒今季又算交到貨
格流就算暫時甩開些路迪
都未必肯為800萬鎊而放人

3人當中最有可能反而係A.泰奧利
因為紐記已成為最鍾意去法甲執平貨既英超球會
而數據又反映佢疑似堅料

佢今季頭12場已入6球
佔左歐塞爾總入球數字既1/3
而佢平均每場起腳3次兼有1次中框
更正既係佢只要中框就有接近5成入球率

紐記開季順利
不過中後場既火力其實好一般
這名23歲布基納法索進攻中場應該岩紐記用

2)
波歷克被傳轉戰美職盟,加盟紐約紅牛

Comment:
雖然佢尋晚對母會凱沙羅頓入左球符碌波
不過都唔覺佢踢得特別好
而佢同路菲斯亦唔似係可以長遠合作既組合

如果佢仲想繼續踢
轉戰美職盟掘金都算係好出路

3)
費蘭尼落實同愛華頓續約至2016年

Comment:
大球會一直只係同佢扯上關係而冇實際行動
主因一定係佢既健康狀況
冇好offer就自然要乖乖續約

p.s.:
好彩有得邊寫blog邊睇波
睇尹佩斯救全家總好過睇大婆台台慶

2011-11-18

繼續講俄羅斯年青球員訪港
香港U-21兩日前力戰而敗輸1:2
又點唸到只係細兩年嗰班尋日會吞9隻蛋

不過如果要為今場大敗唸原因
都仲有幾個

假波咁大單嘢
就算對大人都有影響
仲何況係連成人身分證都未有既U-19球員

而U-21嗰隊既正選有6個來自深水埗
但今日嗰隊既兵源散咁多
連默契都隨時輸俾對手
而U-19球員其實好多連港甲經驗都冇
同來自俄超一眾勁旅既青年軍相比
自然輸蝕得多

另外,香港U-19於進攻做得不過不失
入唔到波只係埋門一腳未夠火候同埋少左啲運仔
不過防守方面就真係幾鬆散
香港隊既中堅荒問題亦由早前散班既奧運隊漫延到U-19
而下半場火速輸到0:3後
成條防線仲開始崩潰

而球隊亦似係只想破蛋
結果越輸越多
連後備落場既帕于高夫都可以火速 hat-trick
佢地既情況似足上年世界盃吞左葡萄牙7蛋既北韓

p.s.:
今晚邊寫blog邊睇波
撐既一定係備受壓力既港菁後生仔
希望佢地可以靠拿武斯既世界波罰球而開到齋

2011-11-16

想講尋晚香港U-21對俄羅斯U-19場波

雖然賽後爆出有假波傳聞
不過小弟堅信尋晚有落場既都唔似收左錢

顏樂楓,劉卓軒,陳肇均,羅港威同埋曾文輝等都交到貨
最終輸波只因對手始終技高一籌

俄羅斯入局後頻頻於兩閘進襲
佢地個別球員都速度技術兼備
港隊下風波都好正路
而半場已被換出既陳湛羲頻頻失位就更加益晒加蘭洛夫
港隊半場只輸一球其實已經賺左

下半場港隊由羅港威串演左閘
俄羅斯少左機會於右路進襲
令帕于哥夫以及後備落場既沙尼甸多左機會於中路以及左路發圍
港隊最終只輸一球
判斷果斷既曾文輝絕對應記一功

成隊俄羅斯牛奶咀既平均年齡只得17歲
冇咩邊個係U-19主將之餘
身材方面亦冇咩優勢
而佢地防守死球以及處理死球(特別係角球)亦有好大既改善空間
但個別球員始終波底唔差
他日睇電視都仲可能見到佢地

講返ICAC單嘢
原本未知姚X俾人拉左
頻頻犯錯既陳湛羲俾討論區既人狂插到百佳
不過有留意本地波既都應該知佢成日失位
因為犯錯就俾人話佢打隻波未免過於武斷

而梁冠聰因為拉衫而輸12碼
亦俾人當係可疑人物
對佢又係好唔公平
因為嗰下動作真係輕微到未必要判極刑
與其懷疑佢就不如賴廖國文啦
不過佢既執法風格又係向來估佢唔到......

知道假波單嘢
腦海唸起3樣嘢:

一係尋晚於球場見到個十幾年冇聯絡
而家做緊ICAC兼唔睇本地波既舊同學
而家更加信自己尋晚冇認錯人

二係報導指姚X搵多個隊友打假波
不過佢有個隊友咁有錢
人地睬佢當傻
另外正面啲睇
唔好講屋企有冇錢
本地波其實有好多識唸既人

三係捉到蝦毛有鬼用咩
最緊要都係捉到幕後黑手
不過如果姚X真係涉案
你估佢又夠羌爆大鑊咩

2011-11-12

1)
紐卡素再次同巴尼達扯上關係之餘
亦被傳有興趣以400萬鎊接收杜斯山度士

Comment:
杜斯山度士去左英國咁耐幾乎冇腳好波
買佢倒不如俾多啲機會胡基
反正已有傳聞話這名斯洛文尼亞新星唸緊以外借形式離隊

2)
彭迪夫被傳考慮轉戰西甲,加盟西維爾

Comment:
其實佢踢意甲咁耐
只有效力拉素時有過一段短時間算係比較搶鏡
就算踢國米時成為3冠王成員都唔覺佢勁
雖然西維爾冇左卡普後既攻力真係差左
簡路迪又年老力衰
不過與其搵個名大於實既高薪廢柴
倒不如繼續相信達摩路加上尼格度既新組合

3)
英國傳媒指雲加考慮1月賣走史基拿斯以及借走查馬克

Comment:
賣走傷多過踢兼爆鑊比率最高既史基拿斯
遲早總好過唔早

不過一旦賣走查馬克
如果雲加緊持唔將禾仔轉型
尹佩斯既替補就只會得返朴主永

不過南韓仔始終信唔過
踢聯賽盃入世界波只因對手唔勁
上次歐聯踢左成粒鐘居然只係掂過26腳波
就某程度反映佢唔夠班踢高層次賽事

p.s.:
捷克對住黑山可以也文也武
某程度真係好似胡仙歷咁講壓力太大
不過當年有尼維特同埋真高拿都成唔到大器
佢地入到決賽週都只會係陪跑份子

2011-11-10

1)
基達被指成為利物浦既1000萬鎊增兵對象

Comment:
尋日先話冇就算冇好防中
都應該睇錢份上賣走盧卡斯利華
何況有件更高班既基達
不過31歲先初戰英超就未免老左啲

2)
保頓,史雲斯以及諾域治都被指想向阿仙奴借用費林邦
而陣中另一年青防中高基連就透露希望離隊以爭取出場機會

Comment:
其實費林邦只要唔好成日掛住助攻而甩位
佢有條件成為一名唔錯既防中

至於高基連其實於防守時比費林邦更集中
對曼聯嗰場踢到患得患失只因經驗唔夠

既然中場漸漸多左選擇
雲加放佢地出去吸收經驗都係好事

3)
樸茨茅夫被指將於1月以200萬鎊收購懷斯

Comment:
講緊既係踢右中場嗰個懷斯(細佬)
不過成單報導引申兩個疑問
一係佢邊值200萬鎊
二係樸茅竟然有咁多閒錢買佢

p.s.:
改口叫 Sports Direct Arena
真係好唔慣......

2011-11-9

1)
紐記再次被傳會於1月從夏德斯菲爾德收購羅達斯

Comment:
這名射手季初頭12場波入左13球
又試過連續兩場 hat-trick
近月為蘇格蘭U-21出場5場已經入左5球
成堆大球會同佢扯上關係都真係唔奇

不過佢始終仲未於頂級聯賽證明過自己
紐記如果想做長線投資都有得唸
如果想搵個即刻交到貨既射手
加碼再斟柏比斯施斯先係正路

2)
曼聯仲未同季尾約滿既保羅普巴達成續約協議
阿仙奴被指打算於1月出價搶人

Comment:
雖然法國同埋英格蘭兩地傳媒對這名18歲法國防中有唔錯評價
話佢有體能又有波底
不過如果這名新迪亞比真係咁堅
費sir真係會益雲加這名老對手?

3)
AC米蘭被指打算以借用形式於1月為卡斯辛奴搵個替補
杜奧巴,波里路同埋麥斯盧比斯都係可能人選

Comment:
托利斯同埋卡奴信唔過
史杜歷治同埋盧卡古又太新
車仔邊會肯借杜奧巴俾歐聯競敵

而AC米蘭暑假先將波里路賣斷俾羅馬
雖然這名意大利射手唔受安歷基重用
但段估佢都唔會肯重返米蘭而再次俾艾基里當佢透明

3個人選只有麥斯盧比斯比較正路
事實上這名阿根廷射手已經多次被傳會從卡坦尼亞轉投大球會
當地傳媒亦指兩間球會已經傾掂數
同意先借後買既形式
不過佢既戰鬥力其實只係一般
靠佢去衝去撞都仲可以
艾基利如果想有理想既埋門一腳
倒不如放棄年齡歧視而俾啲機會恩沙基

p.s.:
曼聯準備簽嗰件牛奶咀又似乎幾扭得
唔信可以睇片
http://www.youtube.com/watch?v=rO2pX8hYcfQ

2011-11-7

1)
消息指里爾想搵杜奧巴季尾以自由身加盟

Comment:
雖然唔使俾轉會費
不過杜奧巴既週薪已經唔係里爾所能應付
豬油包就算肯屈就回歸法甲
段估都會選擇馬賽而唔係老闆出名孤寒既里爾

2)
佐迪艾巴被傳成為費sir眼中艾夫蘭既接班人

Comment:
西班牙係有好多鐵閘
不過於英超有好表現既又有幾多個
當年費拿同埋迪賀奴因為傷患問題而唔捱得好耐
荷西安歷基身體質素唔錯
但表現仍有幾大既改善空間
驟眼睇西班牙閘位球員踢英超似乎未必掂

不過這個佐迪艾巴睇落又真係唔差
左閘同埋左中場兩個位置都難佢唔到
佢於華倫西亞同馬菲奧輪流出擊同埋回防又真係幾殺食
加上只係22歲就已經等住取代卡迪維拿做正選
費sir想簽佢都絕對唔奇

3)
利物浦被傳同車路士,皇馬以及兩間米蘭球會爭奪泰維斯
而拜仁就被指有興趣以1500萬歐元收購盧卡斯利華

Comment:
泰維斯加埋蘇亞雷斯兩隻野獸既組合係好吸引
不過唸起佢咁煩咁冇品
就幾好波都要唔過

另一方面,杜sir接手後
盧卡斯利華既表現係已經有好大改善
不過始終點睇都唔覺佢可以成為大器

p.s.:
1)
碧咸當年踢皇馬食埋尾糊先走人
唔通今次踢銀河又再歷史重演

2)
曼城食住個餘勢推出'Why Always Me?'潮tee
堅想搵多幾個人share郵費買返件......

2011-11-6

1)
紐卡素被指睇中艾夫斯堡既19歲中堅 J.Baffo

Comment:
未睇過這名身高只有1米79既年青人踢波
唔知佢係唔係簡拿華路或者哥度巴嗰類彈弓人中堅
不過佢兩年前報稱既體重只有70公斤
除非佢近年操到大隻啲
否則咁既身型踢港甲都驚佢唔多撞得
仲何況係高頭大馬既英超

2)
馬拉加被指有興趣羅致柏立

Comment:
柏立今季已經冇左正選
失球數字偏高既馬拉加又肯接收過氣老將
成事機會唔低

3)
熱刺被指想搵迪比亞路下季以自由身過檔

Comment:
迪比細路唔係話左季尾掛靴咩?

不過以佢既質素
熱刺4-4-1-1陣式既自由人位置又幾岩佢發揮
特別係近來有傳聞話雲達華治唔妥列納而想走人

2011-11-3

1)
多名射手因為出場機會唔多而準備於1月離隊
當中包括盧雲卡蘭斯,奧歷以及迪科爾

Comment:
盧雲卡蘭斯走人
意味就算紐記1月簽到新箭頭
柏度都應該會返蘭加至少到季尾
因為陣中始終太多玻璃腳射手

但一個仲腦殘過過巴洛迪利既'煩'人
偏偏又唔多識入波
淪落英冠應係合理下場

奧歷方面
其實佢勤力到成個德甲版既古治
紐記如果為左慳家而唔嫌佢一把年紀
不妨打佢主意

2)
列基美被傳考慮轉投彭美拉斯

Comment:
小保加財困之餘
近年戰績又平平
以列基美於球會既江湖地位又唔多可能於國內轉會
佢選擇趁掛靴前去巴甲搏多舖都好正路

3)
堅尼被指有興趣接手李斯特城

Comment:
堅尼同埋恩斯幾乎係費sir弟子當中
教波最屎嗰兩個
泰國佬領過艾歷臣嘢
段估唔會繼續迷戀名牌掛

2011-11-1

1)
曼聯被指將於1月放棄貝碧托夫以及古斯錫
而卡鍚,亨特拉爾,迪奧迪同埋蘇保迪都被指係增兵對象

Comment:
雖然狀態低迷既卡鍚有一定質素
迪奧迪今季於紐記又有水準表現
不過曼聯而家無論翼鋒同埋防中都過剩
買來都冇用
況且迪奧迪都表態唔唸住離開紐記

至於亨特拉爾同埋蘇保迪就真係幫到手
當年3冠王年代費sir有4大射手選擇
但而家除左朗尼同埋小豆
就只有仲未於大波證明實力既韋碧克
奧雲,hea碧,馬捷達同埋馬美迪奧夫都唔係費sir杯荼
佢想要埋亨特拉爾既報導絕對可信

另一方面,費sir雖然已買史摩寧同埋鍾斯
不過維迪以及里奧費甸南都係已經3字頭既腳患馬
伊雲斯既成名絕技李三腳又無助佢成為出色中堅
費sir出遠買多個中堅亦好正路

2)
阿仙奴被指將於1月為後防增兵
當中高路托尼以及禾漢頓都係傳聞人選

Comment:
高路托尼雖然已經不復當年勇
不過佢因為俾曼城要求賠償150萬鎊而反面
雲加搵佢回巢既出價應該唔使好高
而佢幾有經驗又可以踢中堅,右閘同埋防中3個位置
岩晒後防成日天殘地缺既兵工廠

3)
利物浦既被指同車路士爭奪利雲度禾斯基
亦同洛雲以及捷禾扯上關係

Comment:
捷禾人工高但越來越冇料到
洛雲又唔夠硬朗
仲要對上一個於英超有料到既克羅地亞中堅已經係比歷
兩個都唔係特別好既選擇

4)
文仙尼表示只要泰維斯肯道歉
就準備就俾機會佢上陣

Comment:
既然戰績證明隊波冇佢都掂
真係唔明點解要留住個唔知幾時會爆既計時炸彈

而文仙尼之前搞左咁大場大龍鳳
但態度又忽然軟化
俾你係曼城球員又會點唸?

5)
紐卡素被指準備於1月再次出價收購派達斯

Comment:
如果紐記買到佢
賴恩泰萊肯定要退位讓賢
不過佢或者大衛辛頓都有條件取代丹尼森遜既右閘位置
如果維拉真係肯俾400萬鎊簽佢
而家更有理由相信紐記會願意放人

p.s.:
1)
1號當然又係買Keymansoho既時候......

2)
而家關於紐記既話題
唔係佢地點樣強勢又或者追到落後曼聯1分
而係佢地幾時長路有盡時

今日有同事話今季啲波咁出人意表
紐記隨時衰俾隊魚腩

不過小弟始終覺得以紐記現時既強勢
可以打破佢地既不敗之身大抵只得幾隊強隊
月中兩度作客曼徹斯特市球隊怕且應係時候
段估到時丹巴巴亞唔會好似尋晚上半場於禁區有咁多空位埋門掛

2011-10-31

雖然outdate
不過都想講以下兩場波......

1) 車路士對阿仙奴

唔係馬後炮
星期六聽到同事講睇好車仔大炒格
小弟已經同佢講堅信近況唔差既兵工廠可以有分落袋
始終車仔防線對上10場有9場都有失波
同兵工廠相比只係五十步笑百步

唸都冇唸過8個入波全部都係因為防守出錯
連桑馬達既腳指尾拉西都係因為安達山度士交失波
即場已經唸起伍晃榮當年其中一句金句:
'足球比賽既失波通常都係由失誤而引起'

所以要為兵工廠唸羸波原因
與其話佢地進攻出色
就不如話車仔防線比佢地更不濟
如果硬要為佢地唸個羸波原因
小弟會覺得佢地羸在夠韌

佢地由兩度落後
再到俾桑馬達既世界波追平
佢地好快就當咩事都冇而繼續搵機會進攻
所展現既心理質素相當唔錯
羸波要靠技術,體能同埋戰術之餘
仲要睇下有冇 heart

另一方面,尹佩斯入夠3粒肯定係最佳球員
不過小弟更留意既其實係施捷斯尼同埋艾迪達
前者唔使見紅算係有少少運仔
不過佢近期既表現絕對係'弱隊'出好龍門既最新例子
佢同下半場少左失位之餘兼有助攻既桑治
都係小弟認為今場比較有表現既防守球員

至於艾迪達
雖然佢既兩個中場拍檔都有助攻
不過小弟始終認為佢係今場最有表現既兵工廠中場
韋舒亞長抖後
佢已經係而家陣中唯一一個善於控制節奏既球員
印象中佢亦冇好似以前踢愛華頓咁經常為左五五波而同對手硬碰
考慮到佢嗰對玻璃腳就會覺得佢終於識保護自己

車仔方面
成隊只有林伯特同埋桑馬達叫做比較有表現
而托利斯就再次夢遊球場
無論球隊踢4-3-3抑或4-2-3-1
佢都只係於中路行行企企
同中場再次缺乏互動
完全唔見類似早前勤力於左路拉邊既跑動
唔講仲以為佢落場係為左曬太陽

2) 深水埗對南華

面對撒亞人比達
同埋細綽移入中路包抄
(加埋倒戈既路蘭迪大踢爭氣波)
堅sir明顯有針對性部署對付南華

南華又點呢?
高人教練繼續'試陣'
繼白鶴踢中堅,徐德帥移入中路較炮同埋蘇沙改踢箭頭後
佢今場又用左腳仔郭健邦踢右翼
佢可能以為嗰個左腳仔都係美斯可以靠左腳踢右邊

而面對對手死守
佢又幾乎只得一招高空轟炸
只不過前線選擇都配合唔到咁既戰術
基奧雲尼腳好過頭
擅長踢法係上腳為自己同埋隊友搵機會
佢引入既戴倫空有身型但走位完全唔掂
狀態低迷既陳七就更加唔使講
同佢地 perfect match 既箭頭應該係現年38歲
每場只有體力為公民搏半粒鐘既棄將迪天奴

如果要為今場波下結論
就係南華狀態好左
不過對手狀態好得仲多
深水埗針對性部署抵讚
不過和波某程度係因為南華自己捉虫
將心比己
你都會覺得強哥扯火有理

2011-10-28

1)
紐卡素近日同多名球員扯上關係
當中包括F.Ferreyra,邦尼,列治維,吉遜以及加利夏巴

Comment:
後兩者已經唔止一次同紐記扯上關係
想講既係前三個

F.Ferreyra係阿根廷U-20射手
今年南美青年錦標賽以4球成為賽事既第二號射手
以班菲特既財力
未必留到佢好耐
紐記想趁低吸納都唔奇
不過要留意既係阿根廷射手於英超既下場其實好壞參半

至於邦尼
考慮到維迪斯俾到佢既供應唔多
所以平均每場入0.6球其實相當唔錯

不過佢地財力平平都肯俾410萬歐元從布拉格斯巴達收購佢
更加有理由相信佢係堅料
加上買左佢連1年都未有
紐記唔使旨意可以平買到佢

至於列治維
其實這名前維拉球員可以踢中堅同埋左閘
不過踢中堅嫌佢唔夠件頭
踢左閘又嫌佢唔夠靈活
與其俾300萬鎊搵個後備
不如俾多啲機會新仔

2)
烏甸尼斯被指考慮於1月搵恩沙基過檔

Comment:
雖然因為年紀大而機器成日壞
不過恩沙基仍然有力於意甲立足
就算每場預佢搏半粒鐘都唸得過

佢加埋迪拿達利雖然會係最老既組合
但亦係埋門一腳最有保證既組合

3)
卡迪維拿被傳將於1月轉投祖雲達斯

Comment:
祖記陣中最弱就係左閘
如果搵基亞連尼重彈舊調又隨時搞到中門大開
一日唔搵返個正常左閘
爭意甲始終有隱憂

2011-10-27

1)
巴黎聖日耳門被傳打算於1月搵高路托尼加強後防實力
當時人亦表態有興趣過檔

Comment:
尼史葛雖然爆冷搶到正選
不過水準始終只係一般
而文仙尼既唔多敢用新仔沙域
又極少將米卡李察士移入中路
中路人選講真唔太充裕
所以佢唔似會於季內放走高路托尼

2)
史尼達以及查維馬天尼斯都被傳係曼聯既增兵對象

Comment:
平時寫稿佬已經挖空心思寫轉會傳聞
而家曼聯輸舖咁杰
佢地仲唔乘機寫多幾篇咩

另一方面,畢爾包雖然於暑假成功同查維馬天尼斯續約
不過佢始終非池中物
論質素絕不下於布斯基斯
於國家隊比較少機會出場只因同巴塞球星默契唔夠
佢同洛蘭迪遲早嫁入豪門

3)
哥連泰斯被指以1800萬歐元賤價搵泰維斯回巢

Comment:
送走瘀血未必一定要以跳樓價出貨
大可以玩嘢借泰維斯去弱隊
類似早前借佢去唐卡士打既傳聞
肯定落續有來

4)
國米被指想以1750萬鎊收購艾朗蘭斯
報導更話佢地願意用列卡度艾維利斯作為交易籌碼

Comment:
只要史尼達唔 fit 又唔者踢唔岩位
國米就冇晒創造力先係佢地既死穴
艾朗藍斯最勁既只有後上攻門一招
根本幫唔到國米幾多

而佢既身價仲要係唔合理既1750萬鎊
莫拉堤早幾年雄心狀志既時候都未必肯咁貴買佢
何況係而家?

5)
利物浦近日忽然同高路仙尼扯上關係
亦被指睇中韋甘比既15歲前鋒佐敦伊比

Comment:
報導話這個小朋友身體質素,波底同埋速度都兼備
買來長線投資都真係有得唸
不過爭唔爭得羸大豪客曼城就好成疑問

6)
阿仙奴被傳想搵法芬下季以自由身加盟
報導亦話佢地想以1000萬鎊向維拉羅致班蘭

Comment:
法芬有速度又識入波
就算身體質素一般都簽得過

至於班蘭
兵工廠近年唔缺少佢這類技術型中場
加上佢身型輸蝕又成日唔守紀律(早前又衰醉駕)
明顯唔會係理想收購

2011-10-25

隨住李斯特城俾米禾爾大炒3蛋
落後榜首8分既佢地宣佈同艾歷臣解約

佢係唔係好教頭?
見仁見智
個人認為佢精於體能訓練
亦擅長幫球員醫心理病
雖然戰術比較死板
不過都不失為一個唔錯既教練

例如當年拉素有段時間戰績下滑
佢夠吉士叫班大帝縮短聖誕假期
去參加佢既地獄式死亡特訓
據聞當年只有一個鐵人尼維特可以捱到最後
當意大利傳媒質疑佢會唔會弄巧成拙
拉素又偏偏可以後上力壓祖記羸聯賽
真係吹佢唔脹

又例如當年小弟為左攞佢簽名
而拜讀佢嗰本分析運動心理既大作
得知佢同心理醫生合作治療個別球員既心理病
反映佢這方面應該都有啲料到

但問題係一個算係唔錯既教練
點解近年教邊隊就衰邊隊?
小弟愚見當中一定包括一個貪字

由為左500萬鎊年薪而接手爛蘋果英格蘭
再跳槽曼城,墨西哥,諾士郡同埋李斯特城
(唔計短暫領軍帶科特迪瓦踢世界盃)
佢選擇既全部都唔係有力爭標既實力份子
但後台資金就唔講得笑

諾士郡既中東老闆雖然只係充大頭鬼
不過當初始終俾足簽紙費艾歷臣
到佢跳船既時候又唔使賠錢
點睇都著數晒

至於兩個泰國老闆亦明顯非常疊水
就算最窮既墨西哥足總都為左簽佢而積極搵贊助商撲水

艾歷臣應該都有唸過教好隊波
不過當初考慮過既一定包括巨額解約賠償

例如摩連奴以及軒迪克這類
教到好成績既教頭梗係抵佢地豬籠入水

不過有好多冇(又或者暫時未有)戰績支持既教練其實都好識搵錢
例如文仙尼好多時於輸波後都好識轉移視線
確保自己唔會冇左份絕世好工
早前歐聯唔掂就擺泰維斯上枱就更係一絕
又例如早前球隊戰績好少少
佢就識得即刻要求加薪
意味將來就算冇得撈都有得賠多啲

不過比佢數口更精既可能係近年既艾歷臣同埋肥賓
做幾個月搵既錢仲多過人地做幾年
就算整臭自己個朵都在所不計
反正球壇實在太多盲目追求名氣既水魚老闆

2011-10-24

奧脫福淪陷肯定係球壇焦點
輸到1:6肯定冇人估得到
不過亦唔應該將伊雲斯被逐既影響過份高估
有睇小弟寫嘢既都知小弟鬧佢地嗰條紙紮防線鬧到口都臭埋
里奧而家既戰鬥力可能仲低過佢細佬
費sir過份倚重佢既所謂經驗根本等同埋定個炸彈
近幾場英超加埋只分4失其實已經賺到笑
今次俾曼城重創只算係本利歸還
出得0黎行
原來真係預左要還

當然輸得咁大鑊好大程度同對手中前場超水準發揮有關
曼城控球指數冇優勢
不過好在唔貿然進攻
大衛施華既表現絕對係頂級指揮官應有既水準
連帶幾個隊友都俾佢帶起埋有好表現

相對於費sir
文仙尼今次明顯有針對性部署
佢明知基治睇唔住蘭尼
所以搵埋大衛施華回防幫拖
加上艾殊利楊格向來又最驚米卡李察士嗰類靈活既大隻佬
曼聯兩個進攻起點隨即死火
亦令卡維利缺陣同埋朗尼態沉既影響浮現晒出來

始終安達臣十場都未必有一場好波
而佢搶截能力一般
亦加重費查既壓力
費sir旨意佢忽然爆發其實都幾捉虫

一場大敗唔足以決定英超冠軍
印象中曼聯以前亦試過好多次輸得咁杰
96-97年嗰季仲試過俾對手連炒3場
不過多數最終都無阻佢地最終封王
反映曼城唔多似可以靠今場波改朝換代

費sir既其中一句金句係’聯賽稱王關鍵等如將低潮期盡量縮短
只要佢肯正視將今場大敗浮現出來既後防問題
落後5分絕對有得追
特別係冇人會知曼城上下拉開差距後承唔承擔到俾對手追趕既壓力

p.s.:
1)
曼城幫阿仙奴報到大仇
下次再從兵工廠入貨
雲加會唔會打返個折俾文仙尼?

2)
利記竟然咬唔入諾域治
冇運之餘都要同意杜sir對魯迪既好評
不過講到技驚四坐就一定係西維爾既查維華拉斯

3)
16/10睇完疑似係阮兆祥既失散家姐所發表既偉論
過去幾日睇本地波都特別留意下本地龍門

謝德謙這名’俾人講唔出名既第二個龍門’當然有料到
否則公民絕對唔會捱到咁多場先至輸波

而彭梓健表現搶鏡又唔鍚身
論穩定性更加將李翰灝徹底比下去
抵佢做到大埔1號門神

粱興傑就把握魏釗上場發波瘟而忽然坐正
睇佢熱身既表現其實都有少少為佢擔心
不過佢場上發揮都尚算對辦
臨尾香只怪香港亨利忽然’亨利’上身
勁到離門40碼都居然入到衝力射球

侯宇就把握到何國泉出迎畏高而搶到正選
佢有身型又有反應
出場3次都冇失過波既佢肯定係近年最勁既國援龍門

高田壽典既表現亦係到港發展後既代表作
佢雖然唔見得比本地龍門超班
不過今季表現始終對辦
而佢對隊友既感染力以及對足球既熱誠亦值得大家俾個like佢

2011-10-21

1)
皮雅斯落實成為英國奧運足球隊教練
而朗尼,碧咸同埋傑斯就被指會成為3名超齡球員

Comment:
皮雅斯肯定唔係一流教頭
佢承唔承受到主場壓力好成疑問

而蘇格蘭,威爾斯以及北愛爾蘭既足總都唔支持組成英國隊出賽
又會唔會影響傑斯既入選都好成疑問
而如果佢同埋朗尼雙雙入選
費sir亦隨時牙痛咁聲
佢老人家亦唔似會俾朗尼連續參加兩個太公波大賽

唯一比較可信會入選既超齡球員怕且只有碧咸
一來已經表晒態想踢
二來年青球隊真係好需要佢既經驗

2)
丹尼森遜被傳成為維拉既400萬鎊新右閘人選

Comment:
相對於居爾同埋一對中堅
佢既整體表現其實只係一般
如果佢咁既料都可以幾年內升值一倍
紐記隨時願意平買貴賣執一筆

3)
捷禾被傳考慮打算離開國米
而報導就話拿玻里有興趣接貨

Comment:
拿玻里開季後雖然於歐聯踢得唔錯
不過或者人腳唔夠
佢地於意甲既表現其實只係一般
要保住前4確實有一定隱憂
1月增兵幾可肯定

不過捷禾係意甲10大打工皇帝之一
拿玻里早前連莫達既300萬歐元年薪都俾唔起
又點可能養得起這名即將31歲既前羅馬尼亞國腳

4)
曼聯被指準備以600萬鎊賣走馬美迪奧夫

Comment:
佢兩年前都只係值400萬鎊
兩季以內平平無奇
莫非掛住曼聯嗰招牌真係特別容易搵到水魚

2011-10-20

想講兩場歐聯……

終止紐亞不失球既紀錄
居然係畢斯杜巴
真係日防夜防,家賊難防
咁既無間道後衛真係任何龍門既尅星

而射失12碼既馬里奧高美斯賽後仲笑笑口話下兩場掂梗
好似宴客都冇咩所謂咁
環顧德國隊正印11人就以佢兩個最危危乎
隨時係今個夏天羸唔到歐國盃既罪人

印象中德國佬只係試過踢歐國盃射12碼輸過一次俾捷克
世界盃PK戰就更加未遇過對手
只怕咁堅既齋砵都俾佢大方打爛埋

阿仙奴方面
尋晚羸波但表現只係一般
哥斯尼或者因為熟路
反而表現比幾名後防隊友都搶鏡

贊堅臣仍然處於學緊踢右閘既階段
今場見佢雖然多左引球出擊同埋走位上前線
不過傳中一腳,甚至推落底線仍然有排佢學

梅迪薩卡既踢法其實同當年既阿當斯類似
都係高波殺晒兼大隻到同你打埋摔角都仲得
就係衰在隨時仲慢過加利仔
如果唔想佢出醜人前
右閘同埋防中既補位就非常重要
以前迪臣就算助攻都識睇住形勢
這方面當然亦係贊堅臣有待浸淫既方面
不過這隻大水牛由細到大都係踢中堅
而家先要佢學踢右閘始終唔可能預期佢一步登天

不過尋晚連佢都傷埋
如果又要抖一段時間
右閘位置怕且要繼續靠迪佐羅接力做替工

中場方面
路斯基真係冇心冇力
與其用佢地就不如俾機會班拿約或者艾朗藍斯
後者既組織能力肯定同法比仔以及拿斯尼冇得比
不過佢後上攻門其實唔差
雲加如果唔想浪費這個500萬鎊既投資
倒不如趁早將佢改造

而艾沙維亦已淪為棄之有味既雞肋球員
謝雲奴而家提供到既貢獻肯定多過佢
如果可以改善埋入球能力又或者做個自私少少既球員
佢有望成為繼皮利斯後最勵害既兵工廠左中場

前線方面
match report話雲佩斯發揮平平
不過有時如果唔夠供應
根本就唔怪得佢太多

小弟反而想佢好似尋晚咁
製造多啲空位俾中場後上入波
一隊波得一個殺手既踢法已經過晒時

南非世界盃時都係多得佢於前線做跑狗
中場隊友先可以踢得咁 free
既係殺手,又係跑狗
咁先得人驚

p.s.:
近來英超既外國人老闆忽然無嘢搵嘢來搞
先有利記表態要分拆轉播權
而家又多幾個傻佬話要取消升降制

如果踢得屎都唔使降班
中下游球隊仲邊會搏老命去踢呀?
隨時hea過搏包尾爭新人抽籤頭籌既NBA魚腩

而英冠球隊如果無啦啦從此再冇機會去掘金
又邊到講得通呀
英冠,甚至加埋甲乙兩組既72隊仲隨時等住摺埋

2011-10-17

幾場波想講......

本地波方面
傑志雖然羸波都冇咩霸氣
組織力依夠平平
當中原因除左草地質素同埋狀態平平外

冇左林嘉瑋先係主因
黃洋唔係唔好波
不過既同隊波未夾熟
狀態平平既佢亦好多時比林嘉瑋鍾意上腳
睇一個球員對球隊係唔係重要
最有力既指標就係睇球隊有冇佢既分別
所以香港沙維肯定對港甲巴塞異常重要

佢未復出前
加強兩翼側擊似乎就係甘巴爾最簡單直接既 plan B

至於天水圍飛馬
佢地可以靠快速反擊尅死傑志
偏偏又俾大埔用同一招收拾
一條持續發瘟既防線肯定揹晒鑊

而中前場只有一個征戰過密既李康廉支撐大局
球隊比平時更易失去控球權
一條速度平平,但又壓得太上既防線結果頻頻中伏

而晨曦大炒深水埗5蛋就勝在實而不華
旺角場岩晒兩翼側擊支援高大箭頭屈機既踢法

深水埗場場都好想破蛋
不過中後場因為捱打而無咩餘力助攻
前線幾個球員幾乎次次都要人少打人多
加上年青球員埋門一腳未夠火候
要等到佢地入波都仲要俾啲耐性

雖然佢地場場俾人數
不過千祈唔好睇小佢地既年青球員
小弟肯定佢地至少有半打球員將來會入到港隊
相對幾個質素平平無奇既巴西外援
李志堅好多時寧願俾機會本地球員都唔難理解

英超方面
最屬目嗰場就梗係雙紅會
利記下半場羸盡點數
冇得袋晒3分除左怨自己埋門一腳唔掂之外
都真係要寫個服字俾連滑翔衝力射球都救到既迪基亞

不過更好睇其實係紐卡素逼和熱刺
唔係馬後炮
睇住紐記落後都信佢地唔使輸
一來主場對熱刺既往績唔錯
二來紐記今季真係韌到得人驚

不過越來越覺柏度其實無咩板斧變招
奧巴坦唔見得比踢曼聯時進步
如果賓艾化再谷唔起狀態
類似艾美奧比既神來之筆又可以救到紐記幾多次

而家紐記雖然仲未知個輸字
不過以佢地(特別係後防)唔夠深度既板凳
莫講話要打入前4踢歐聯
就算要入到前6其實都好有難度

另一方面,哈利列納已經唔止一次先派艾迪巴約衝散對方防線
等到對方中堅有疲態後
再派本身有速度優勢既迪科爾後備落場搵著數
絕對值得卡比路應該參考

2011-10-14

1)
雖然朗尼親筆寫求情信
不過最終仍被歐洲足協停賽3場
而英格蘭足總仲考慮緊係唔係上訴
因為萬一上訴失敗就要再罰停賽多一場

Comment:
當年艾沙維個底冇佢咁衰都要停兩場
佢停3場又有幾奇
寫封爛鬼求情信就想扮有悔意搏輕判
你估踢曼聯踢英格蘭就大晒咩

卡比路肯定更加倚重艾殊利楊格
而如果佢堅持繼續用雙箭頭
既然卡路爾唔爭氣
迪科爾以及戴倫賓特既級數又只係球會層次
哥治雖然腳好過頭
不過卡比路點睇都應該排除成見
因為多過高佬隨時係最簡便既 plan B

2)
歐國盃附加賽抽籤結果如下:
葡萄牙對波斯尼亞
克羅地亞對土耳其
愛爾蘭對愛沙尼亞
捷克對黑山

Comment:
皇馬追巴塞追到索氣都仲未追到
葡萄牙球迷希望摩連奴兼職領軍既希望肯定難以實現
以賓度而家既功力
加上防線仲差過世盃附加賽既時候
面對已經吸取教訓既波斯尼亞
單係一個迪施高已經夠佢地受
如果波斯尼亞有上場作客法國既水準
C7提早放暑假既可能性絕對唔低

土耳其方面
論外圍賽表現同埋穩定性都肯定好過克羅地亞
同埋軒迪克咁 pro
斷估唔會搏出局而提前解約去俄羅斯教安捷

而愛沙尼亞有得出線
好大程度多得塞爾維亞自毀長城
加上萬一10場入5球既中場 K.Vassiljev 被凍結
肯定輸俾愛爾蘭既整體戰

另外,捷克近年表現大不如前
既然佢地就算入到決賽週都唔慌有料到
以黑山兩鬥英格蘭都有貨交既往績
決賽週寧願睇沙域,祖維迪同埋胡仙歷幾個大賽新丁
總好過繼續睇未老先衰,早熟早殘既巴路士離門幾碼射到框都唔中

3)
利物浦方面提出2013年起英超各隊獨立出售轉播權
不過不論強弱既英超對手都反對佢地既建議

Comment:
睇西甲就知拆散賣轉播權會搞到各隊既財政狀況差距更大
巴塞同埋皇馬玩晒既局面除左因為佢地本身超勁外
其實對手多數冇咩閒錢擴軍先更關鍵

如果英超學左佢地獨立賣轉播權
英超而家6強既地位肯定比當年 Big 4 更牢不可破
而如果真係搞到咁
就不如叫嗰6隊名牌自組一個踢6至7循環既小聯賽
肯定啲球迷未睇完半季就已經睇厭晒

而如果強弱差距太大
英超以往整體鬥得最激烈既金漆扣牌亦肯定保唔住

2011-10-12

1)
卡路士承認安歷卡,雲佩斯以及尼馬都係安治既增兵對象
仲話安治絕對滿足到山度士對後者既轉會費要求
而艾殊利高爾,馬干,艾沙維,泰維斯,杜奧巴,利尼以及C7都同佢地扯上關係

Comment:
好一隊俄超曼城
不過睇曼城就知搵到個好教頭
化算過搵十個八個星級球員

卡路士如果真係識撈既
當務之急其實係推薦個名教頭俾油王老闆
既可以跟人地學嘢
更正既係退居助教後人工照袋但責任輕左
安樂錢都可以搵多幾年

2)
曼聯以及阿仙奴亦被指睇中雲禾夫斯雲基
後者仲被指被雲加視為尹佩斯既替補

Comment:
尹佩斯而家俾人傳佢連樓都賣埋
英國傳媒已經講到佢走硬咁
唔少球評家或者球迷亦表示雲加賣走佢套現換血先係上策

不過小弟就唔係咁唸
兵工廠出名少大佬輩球員
如果連佢都走埋
咪即係行緊以前嗰條衰左幾年既舊路

如果佢今次真係俾雲加既誠意(大幅加薪既4年新約)打動到
雲加最應該做既係將佢以及球隊都轉型
尹佩斯可以係前線重心
但唔可以好似以前咁太過份倚靠佢
而由於佢有條件效法柏金以輔鋒形式搵食
4-4-1-1可能先係最岩現時人腳既陣式

3)
雖然拉度既經理心早前已經否認佢會於季尾前離開拉素
不過車路士仍然被傳會於1月出手收購佢

Comment:
保辛華俾膝傷玩謝
伊雲奴域踢中堅又好過踢閘
保羅費拉拿又真係名乎其實咁'廢'
加上陣中新血唔岩使
報導話波亞斯想搵返個新右閘絕對唔難理解

但問題係拉度擅長既位置其實係中堅同埋左閘
如果唔係都唔會初出道既時候俾人形容佢係新捷禾

咁究竟係波亞斯,報紙佬抑或小弟搞錯?

p.s.:
阿根廷果然只係虛火......
至於中國輸波亦唔係特別令人意外既賽果
事實證明甘馬曹仲未執得掂條防線
球隊既創造力同埋埋門一腳仍然只係亞洲二線頭水準
不過漸見佢地做到緊逼踢法
希望就算今次出線功敗垂成
甘馬曹都仲可以有得留低
否則改革又要從頭做過

歐國盃方面
塞爾維亞已經唔係第一次俾斯洛文尼亞玩謝
不過最後兩場只要攞兩分都可以出線既大好形勢下臨尾香
睇住維迪同埋史坦高域帶住遺憾退出國際賽
未免為佢地感到可惜

同樣令小弟失望既仲有比利時
出局只因德國以及軒迪克太強
不過以佢地既人腳
參加巴西世界盃仍然審慎樂觀

2011-10-11

1)
英國傳媒指巴塞準備搵英超兵去加強後場實力
當中人選包括艾殊利高爾,加利卡希爾以及施捷斯尼

Comment:
如果巴塞 full team
11個正選最唔穩陣就係左閘
想買A高既風都吹得叫做合理
即管睇下佢想去巴塞捧盃定係去安捷掘金

至於其餘兩個就真係得啖笑
加利卡希爾無錯波底唔差
亦等住過檔大球會
不過佢既質素同佩奧爾同埋碧基仍有段距離

而冇人知施捷斯尼將來有冇本事做巴塞正選
不過而家過檔肯定預左要先坐幾年冷板
除非連佢都等唔切捧盃
否則咁既傳聞真係好唔 make sense

2)
杜sir被傳睇中香川真司

Comment:
基本上而家逢係有啲表現同埋質素既攻擊球員
都會同利記或者杜sir扯上關係
不過講到口都臭埋
有錢買人都留返俾中後場啦
特別係而家連加歷查都暗示可能季尾收山

3)
德國傳媒爆料指賓尼迪斯早前拒絕接手史浩克04

Comment:
咁咪即係史提芬斯只係執二攤?
不過佢地既球迷應該慶幸教練唔係肥賓

史提芬斯於史浩克04既地位等同利記既杜sir
就算最終贏唔到德甲都係咁話
畢竟心甘命抵
何況而家成績真係穩步上揚

4)
拜仁被指想搵杜奧巴季尾以自由身加盟

Comment:
如果拜仁真係咁肯用老嘢
高路斯就唔使走人啦
況且拜仁份約一定冇車仔咁肥
豬油包邊捨得走

2011-10-9

1)
阿仙奴被指準備於1月繼續為前線增兵
人選包括沙洛文卡奴,馬里奧葛斯以及 A.Dzagoev

Comment:
雖然禾確特既經理人放風話禾仔未必續約
不過段估都唔會於1月走人
就算冇左佢都仲有個潛質更高既張伯倫

卡奴今季已經為車仔踢過歐聯
不過key point都係季尾約滿既佢既水準唔見得特別高
傳聞價600萬鎊點睇都唔合理
希望杜sir唔好好似報導咁講同雲加爭埋一份

而德國美斯既身價直逼4500萬歐元
報導話雲加只肯俾2000萬歐元
再搭多個唔受重用既雲馬克
俾你係多蒙特高層
都唔會於球隊成績下滑既時候為左咁既出價而自斷一臂

2)
韋健士提議英格蘭足總再搵荷度執教

Comment:
佢教波肯定唔算叻
曾經夾硬將球隊轉型3-5-2
以及搵修夫基再次出任防中都證明佢冇腦

而就算唔計自甘墮落既加斯居尼
拿鐵斯同埋麥馬拿文兩個好波之人都冇咩發揮空間以及機會
亦證明佢自己雖然當年超好波
不過都係唔多識用技術型球員

不過更大鑊既都係佢既管理能力同埋把死人臭口
寧願用舒利亞
都唔用更有領導能力既阿當斯做隊長
絕對令人費解
而佢為左私利而透露肥仔嘜落選後留馬尿
以及山草藥舖老闆上身
亂up傷殘人士係因為前世做錯事而自招惡果
更令人極度反感

如果俾一個咁無能無德既二打六再次執教
就算新人輩出
球隊於巴西世界盃既肯定前途似'咁'
不過係'係咁先'嗰'咁'!!!

3)
消息指卡塔爾兩間球會 Al Saad 以及 Al Arabi
都希望羅致卡迪維拿

Comment:
就算當佢唔打算踢世界盃
至少都會踢埋個歐國盃掛
係掘金都過埋今季先啦
佢1月過檔選擇始終似係意甲或者西甲

p.s.:
過去兩日太公波
傳統強隊多數羸波
不過始終對手唔算太強
參考價值唔大

大家既焦點都係朗尼又發癲
發生得太多既嘢已經唔覺意外
佢份人肯定老實過唐淫虫同埋范賤婦人
一早就同大家講明佢想做曼聯同埋英格蘭既隊長
生果波話佢成日控制唔到自己而唔唔係合適人選
不過小弟就唔係咁睇
當年費sir某程度都係靠個隊長臂章去收服簡東拿同埋堅尼
所以小弟仍然堅信費sir退休前會將個

阿根廷雖然大炒智利四個一皮
不過對手向來識攻唔識守
岩晒反而最怕對手踢擦鞋仔波既阿根廷
大勝一場都唔值得將佢地既評級定得太高

2011-10-7

1)
英格蘭足總方面證實唔會於歐國盃決賽週後同卡比路續約

Comment:
近年隨左馬加夫外
印象中冇一個教頭提前落實離職後
都仲可以帶隊捧到盃

英格蘭嗰班大哥出名無紀律
而家知佢時日無多
亦肯定更加唔驚佢

2)
AC米蘭被指準備用耶比斯或者邦利拿同祖雲達斯交換阿馬利

Comment:
阿馬利衰極都仲有啲戰鬥力
早幾個月外借去帕爾馬都仲有貨交
岩晒前線特多玻璃腳射手既AC米蘭

而耶比斯已經唔係從前既哥倫比亞簡拿華路
邦利拿就keep住做佢既後防毒瘤
祖記旨意佢地是但一個代替基亞連尼踢中堅都係死路一條

3)
紐卡素再次同雲禾夫斯雲高扯上關係

Comment:
如果紐記係有心簽佢就好心趁早啦
等到佢而家過檔士砵亭後7場入6球
佢暑假時既540萬歐元身價隨時升成個 double

4)
加歷查暗示最快季尾掛靴

Comment:
雖然佢戰鬥力頓減
不過至少仲有能力做多一至兩季後備
踢多兩季可能可以終於羸返次英超冠軍呢

2011-10-5

1)
雲邦美透露想返荷甲養老
當中燕豪芬已經表應準備搵佢回巢

Comment:
佢同伊巴都咁有羸聯賽冠軍既命水
燕豪芬搵佢回巢
唔止可以以老帶新
都可能幫到佢地終止聯賽錦標荒

2)
紐卡素近日被傳睇中加利夏柏,M'Baye Niang 以及 J.Schlupp

Comment:
加利夏柏雖然從來未代表過英格蘭任何級別既代表隊
不過能夠成為球隊上季既首席射手
些路迪應該唔似咁易放人
而近幾年紐記都會同佢地既主將扯上關係

反而後兩者既可信性比較大
前者係卡昂既未來希望
岩晒近年頻頻去法甲掃貨既紐記
佢無論踢箭頭,進攻中場同埋翼鋒都有貨交
難怪現年16歲就吸引到塞內加爾足總徵召佢做大國腳
(不過佢講明將來只想代表法國)

後者就係德國U-19成員
又係嗰種可鋒可翼既未定型跑狗球員
既然艾歷臣今季開始俾機會佢
佢留隊既機會似乎大過過檔紐記,利記或者史篤城

3)
國米被指有興趣引入蘇維
這名塞內加爾射手既身價已升至1800萬歐元

Comment:
國米前線雖然唔算疊馬
不過至少都有幾個名牌射手
冇咩必要買佢
搞好條輸血管先係上策

2011-10-3

想講幾場英超……

利物浦有得贏打呲真係多得球證一時重手
雖然拖肥糖班友好多時都要波又要腳
不過魯迪維爾嗰腳明顯中波先
點睇都唔值即時見紅

打多個既利記終於開始有優勢
不過咁都咬唔入
就某程度反映中前場既合作仍未達預期既化學作用
卡路爾雖然開齋
不過表現只係一般

今次想講(彈)既係達寧
睇開小弟寫波既都知
佢係小弟心目中杜sir上任後既最差收購
一個平均成個月先有一場好波既邊緣英格蘭國腳
身價何來可以仲高過可鋒可翼兼入波更多既艾殊利楊格
與其fing成2000萬鎊
不如俾機會古治同埋祖高爾

而荷西安歷基同達寧同場時好少會殺到好前
可能原因有二個
一係達寧回防不力令佢唔敢谷得太前
二係達寧根本冇留條私家路俾佢
抵扣佢分啦!

紐記方面
今季整體演出真係好左
不過又唔係好得咁誇
小人愚見其實係輪住有人挺身

早前有丹巴巴亞同埋貝斯輪住入波
又有賴恩泰萊既世界波
同埋古迪利斯好日都唔逢一潤既入波

而就算捱打都好似今場咁有居爾頂住
就算當佢都頂唔住
都仲有幾個平時唔多穩陣既後衛
印象中除左賴恩泰萊之外
其餘3個正選後衛都護過空門

唔好睇少每人威一段既威力
97至98球季既阿仙奴
論兵力同埋其實及唔上曼聯
偏偏上至正選下至新仔都輪流發圍
柏金同埋奧華馬斯就唔使講啦
連當年係新仔既安歷卡,比堤同埋曼寧加都忽然嚇你一跳
後兩者仲同幾個隊友連續4個月當選左最佳球員
最終落後12分都反超前曼聯羸英超

講開又講
居爾今季既表現絕對好過史雲斯既禾姆
指日可望取代對方做荷蘭2號龍門

車仔方面
唔係見林伯兩場入4粒就馬後炮
小弟由始至終都唔認為波亞斯會於短期內搵佢開刀

連球迷咁既 outsider 都知佢同泰利成日同油王有兩句
當日泰利涉嫌篤死摩連奴
你估嗰時做緊副手既波亞斯會唔識死咩
就算係郁林伯都等自己交到成績表先啦

何況論後上埋門既攻力
拉美利斯以及魯爾梅利斯仲未係佢嗰皮
前者算幾識把握 timing 後上
不過好似永遠只係識兜口兜面省個龍門

至於阿仙奴
雖然雲達華治入第一球真係手球在先
不過睇見佢地輸波都唔太意外
畢竟兵工廠上下都面臨信心危機
就連領導人雲加都可能唔知自己想點
排陣同埋臨場調動都打晒亂章

用桑治打中堅唔係問題
不過防中冇好人選都仲要咁做就好有問題
高基連仲新過費明邦
成日失位絕對唔怪得佢

而唔明點解教授會容忍禾確特成日於中路游走
加埋事後證實斷腳既沙格拿無餘力助攻
成條右路就咁廢左

而教授後段搵梅迪薩卡谷前搏殺更係攪笑
如果佢真係肯用大隻佬屈機
以前就唔會成日叫賓特拿打右邊啦

2011-9-30

1)
安治宣佈開除加治耶夫
卡路士就會聯同原任助教既哥迪耶夫合組雙教練
而前者仍會繼續出賽

Comment:
所謂空穴來風
早前安治接連同幾個大牌教練扯上關係
已經係加治耶夫落台既先兆
近6場只羸1場只不過係導火線

不過以佢地富豪老闆既作風
長遠點都會搵返個名牌揸旗
卡路士雖然得寵
不過嗰位都唔慌坐得好耐

2)
阿仙奴被指考慮於1月接收列卡度艾華利斯

Comment:
如果就算而家史尼達養傷
佢都仲係冇咩出場機會既話
1月要求離隊都好正路

另一方面,雲加如果唔係唸住用佢去取代級數低一截既艾朗藍斯
就不如唔好簽佢
留返啲錢去簽中堅或者防中好過啦

桑治雖然於奧林比亞高斯客串中堅而得到好評
不過佢長遠未必係中堅既好人選
何況佢墮後既話
咪又到防中嗰位變得危危乎

3)
黑池成功向利物浦借用舒維爾半季

Comment:
成堆名牌老嘢俾杜sir放晒入雪櫃
一個冇功績既新仔就更加唔使旨意有得發圍

這名進攻中場波底唔差之餘又勤力
去到黑池應該岩踢

4)
熱刺被指打算搵艾比度下季以自由身過檔

Comment:
熱刺後防向來多玻璃人
就算唔計岩岩走既經典人物活基治
都仲有京治,戴臣,加拿斯同埋哥魯卡

艾比度既級數唔使懷疑
不過哈利列納係搵都應該搵個當打又健康架啦

不過話時話
今個暑假哈利叔隨時已經過檔左英格蘭足總

5)
紐卡素被指睇中奇雲馬田以及柏夫奴真高

Comment:
前者傳聞身價已經直逼2500萬歐元
點睇都唔係紐記杯茶

熱刺擺明唔搏歐霸盃
偏偏後者已經淪為這隻雞肋盃既主力
地位同埋身價可想而知

不過莫斯科火車頭早幾日被傳肯俾800萬鎊接貨
紐記想搶人都唔係易事

6)
韋根方面話冇考慮接收迪奧夫
佢就忽然聲稱可能轉投安治

Comment:
普雷斯頓,黑池同埋唐卡士打肯要佢
佢又嫌人地窮
但而家高班少少既韋根已經唔要佢
佢又憑咩去安治掘金呀

p.s.:
1)
林智健原來叫做林志堅
真係要多謝佢阿叔同埋畸寶

2)
對賓佬都要咁辛苦先和到3:3
真係睇到想講粗口
與其俾班球星繼續hea踢
倒不如狠狠咁大換血換過批有heart既新仔

3)
睇日新書出爐

2011-9-29

雖然唔係皇馬球迷
不過見到佢地(特別係卡卡)踢得咁爽
肯定賞心悅目
睇佢地第一個入波既時候仲以為睇緊巴塞

既然奧斯爾可以於國家隊夾到葛斯組成雙核心陣式
無理由於皇馬夾唔到卡卡

摩連奴主打4-3-3陣式
所以多數只用一個進攻中場
不過多得迪馬利亞表現下滑
一個介乎4-2-2-2以及4-2-3-1既陣式應運而生

初步睇效果肯定吸引
不過中後場其實都俾左阿積士幾多空間同埋機會
加上對手始終唔係一線勁旅
新陣既戰鬥力始終仲係評估階段

場波肯定係卡卡最搶鏡
不過對家既基斯甸艾歷臣其實都唔錯
迪基拉根本睇佢唔住
佢肯定係勞特立兄弟後最好波既丹麥球員

知道另一邊既曼聯幾乎主場輸俾巴素利
費sir真係應該慶幸今場只係歐聯分組賽

講到口都臭
佢地條防線根本穿晒窿
踢咁耐英超只失兩分
只係多得前線著火同埋迪基亞近兩場開始0黎料
執靚條防線絕對係費sir今季成敗既關鍵

當中里奧費甸南復出後既表現形同毒瘤
如果佢再佢改善
大鑊既肯定仲有英格蘭
赫特慘俾拜仁球員練靶怒射既無奈
將會於歐國盃決賽週再次出現

p.s.:
首輪歐聯分組賽推介左薩格勒布戴拿模鋼門基拿華
今次想講既又係另一個弱旅出好龍門既例子
佢就係之前踢阿美利亞
尋晚有9個save既巴西龍門迪亞高艾維斯

其實尋晚先係佢第一次為華倫西亞於正式比賽把關
絕對係一戰成名
既然古亞達前6場把關都唔見得特別勁
巴西仔隨時靠今次上身既表現而上位

一旦做到華倫正選
絕對有助佢爭取入選成為大國腳
原來佢咁既人才
歷年來原來只係入選過巴西奧運隊

2011-9-27

1)
紐卡素被指有興趣接收路夫

Comment:
佢近年發展停滯不前
去英超轉換新環境都不失為好選擇
不過報導指莫斯科中央陸軍叫價1000萬鎊
就肯定係交易既最大障礙

2)
曼聯被傳打算於1月出價1800萬鎊收購班倫

Comment:
自從佢幾年前到港踢7人賽
小弟就好留意這名小將
唔止因為攞左佢隻簽名波boot做紀念品
亦因為佢係蘇格蘭近年少有既技術型球員

不過既然艾殊利楊格都只係值1500萬鎊
班倫而家只係介乎維拉正選同後備之間
曼聯本身又有個湯卡華利
費sir唔似會心急到咁樣亂出高價

3)
雖然費倫天拿死撐左無數次準備同蒙杜利禾續約
不過這名意大利中場繼續被指會於季尾以自由身離隊

Comment:
雖然雲加對佢流晒口水
不過意甲3大班霸以及拜仁都對佢虎視眈眈
兵工廠既機會講真只係一般

其實意大利當打球員絕大部份都唔會出國發展
當中既成功例子又極少
怕且蒙杜利禾都會選擇意甲球會

近年AC米蘭最叻唸縮數
今個暑假唔使錢就已經執左麥薩斯以及泰禾
如果簽到佢仲可以慳返買斷阿古蘭尼既錢
小弟就最睇好佢地成功搶人

4)
迪奧夫可能以自由身加盟韋根

Comment:
洛達列加要養傷咁耐
佢點睇都算係及時雨
不過輝煌紀錄只限於搞事而唔係入波
馬天尼斯可能視佢為無選擇中既選擇

p.s.:
韋舒亞可能要5月先可以復出?!
雲加今次真係唔得佢死

兵工廠班隊醫唔趁上季尾同佢開刀
終於拖出個大頭佛
今次隻黑鑊都好難甩身

2011-9-26

想講近日睇過既幾場英超

英超方面
阿仙奴雖然羸波
不過只因對手係比佢地更加唔掂既保頓
羸3:0唔足以反映佢地已經復甦

而小弟幾個月前已經同雲佩斯計過數
佢上季既所有入球全部來自2011年
當中佢冇波入既比賽
球隊不敗以及羸波既比率反而更高
已經證明將攻勢過份集中於佢身上唔係好事
但雲加似乎唔打算去改善這個弱點

當然好似禾確特既個別隊友長期唔爭氣
亦係雲加求變既障礙
不過雲佩斯下季尾就約滿
雲加既講明唔想大幅加佢人工
球隊又越來越唔似係爭標份子
佢心死跳槽又大把 offer 等住佢
單係兵工廠產品近年既最大買家曼城就被傳準備出價3000萬鎊接貨
佢走人既機會點睇都大過留隊
雲加與其例牌死撐主將 ‘going nowhere’
都真係應該的起心肝唸定 plan B

而利記雖然羸波
不過表現只係一般
卡路爾就最令小弟失望

杜格利殊廿年前同而家旗下都有唔少射手
卡路爾係最有身型優勢既一個
但佢所帶來既威脅同蘇亞雷斯,魯殊,班尼斯,比士利
甚至艾德烈治同埋羅辛度都差好遠
當中原因有二

一係佢既走動比以前踢紐記時更少
而利記亦比紐記少用長傳
二係佢就算有時肯郁都唔識走個靚位

杜sir如果唔想這項3500萬鎊既投資爛尾
就真係要調校下球隊同埋佢既踢法
否則佢既效用隨時差過當年既希斯基

曼聯方面
雖然一下子傷晒兩大箭頭
不過始終幾個後備都有返咁上下戰鬥力
加上蘭尼 on fire
攻力依然有一定保證
球隊真正既問題仍然來自後防
如果唔係迪基亞近兩場既表現係加盟以來最好
佢地近兩場隨時冇分落袋

2011-9-24

1)
華加斯以及奧奴夏都被傳係阿仙奴既新後衛人選
而佢地亦繼續同加利卡希爾扯上關係

Comment:
當華美倫以及佐羅都就快約滿
雲加既當務之急係同佢地傾續約
特別係只要冇傷冇病就幾信得過既前者

另一方面,雲加做嘢有時真係慢幾拍
報導指佢兩個同埋雲佩斯,禾確特以及艾沙維亦係就快約滿
印象中後者既合約仲只係會到季尾

教授搞到自己得咁少時間去做定兩手準備
蝕底既佢係佢同埋隊波

2)
紐卡素被指睇中蒙彼利埃射手基奧特
而當時人亦表示有興趣轉戰英超

Comment:
大抵食過翻尋味
紐記繼續法甲化都唔意外
這名6呎3吋高既射手平均3場入1球
去到英超仲得唔得就係後話

3)
AC米蘭,熱刺以及魯賓卡山都被指有興趣羅致尼格度

Comment:
AC米蘭同埋熱刺既前線都唔算特別等人用
未必真係肯為佢洗錢
而如果就算有閒錢
紅黑兵團應該買既位置係防中
而熱刺等住用既其實係中堅

P.S.:
林智健驚喜登場
唔覺佢好似講波佬講到咁勁
不過總算不過不失

另一方面,就算足總搵佢踢國際賽
佢都要放棄德國國藉後再入藉香港
機會又似乎唔多大

2011-9-23

1)
雲尼亞里落實接手國米
雙方簽約兩年

Comment:
以國米既人腳
只要教波既唔好好似賓尼迪斯以及加斯柏連尼咁好做唔做
就算俾球員自由發揮
隊波既表現衰極都會有個譜

上季既李安納度接手搞得掂
老江湖雲尼亞里梗係可以撥亂反正
不過佢教左廿幾年波都只係羸過三兩隻盃仔
就知佢唔係帶領國米重返高峰既合適人選
你知我知莫拉堤都知
如果唔係就唔會當初只肯同佢簽約到季尾

當季尾國米只係保得住歐聯席位或者羸隻意大利盃
雲尼亞里到時只會成為國米近廿年來第24個離隊既教練

2)
利物浦被指睇中盧卡斯洛迪古斯以及艾比奧爾

Comment:
雖然巴西傳媒睇好佢可以成為第二個卡卡
不過除非利記踢走幾件
否則中前場根本冇位容納佢
而佢加埋盧卡斯利華既盧卡斯組合
亦未免太過單薄

3)
紐卡素再次被指準備於1月借用馬捷達
佢地亦再次同 M.Maiga 扯上關係

Comment:
佢於費sir心目中既排名仲後過奧雲同埋hea碧
除非後者於1月被賤賣套現
又或者有其他射手受傷
否則費sir隨時繼上季後再借走佢
當然目的地係英超抑或意甲就係後話

M.Maiga方面
索察於暑假已經放走左艾迪爾布朗
唔似肯於季內放走埋佢
否則佢地早前成功同馬雲馬田續約亦變得冇咩意義

另一方面,馬里好大機會出線非國盃決賽週
紐記就算簽到佢都預左佢要延期報到

4)
史雲斯被指想羅致蘇甘保

Comment:
如果佢仲係掂
就唔會上季於紐記坐多過踢啦

p.s.:
今晚忽然可能有個香港人踢德甲
漢堡從此可能多左好多本地fans

不過話說回頭
雖然當時人肯有有天份又肯努力
不過香港冇咁既人咩
當中原因怕且係德國比本地既青訓搞得好好多

2011-9-21

1)
隨住作客升班馬都收皮
國米宣佈開除加斯柏連尼
除左早前既蘇拿以及雲尼亞里
而家連巴治奧以及安察洛堤都被傳係接手人選

Comment:
雖然從來都唔認為肥安係一等一教頭
不過應該至少有能力於短期內撥亂反正

至於蛋治奧方面
佢而家連牌都未有
除非意甲聯會開恩鬆佢
又或者國米搵個類似G.巴里斯既二打六做掛名教練
否則根本無法成事

而佢雖然名望星味兼備
不過兩樣嘢向來都唔係長遠搞掂隊波同埋油王老闆既法寶
況且進攻型天才教波都未必一定大打進攻足球
睇下杜米迪斯古以及早幾季既文仙尼正係人辦

2)
紐卡素否認準備外借阿倫史勿夫返列斯聯

Comment:
佢週薪高達6萬鎊
既然出場機會咁少
艾殊利真係無咩理由會俾佢留隊
就算中場中路唔多夠後補球員都係咁話

3)
利物浦,阿仙奴同埋車路士都被指睇中維頓漢

Comment:
而家艾加又因為肋骨裂左而要養傷1個月
質高既高亞迪斯又太新
加歷查同埋史基泰爾就更加唔好提

利記就算買佢都要等到1月
即係只係救唔到近火既遠水

2011-9-20

1)
消息指艾比奧爾以及卡迪維拿都會於1月離隊
前者多數轉投馬拉加
再次跟舊波士柏歷堅尼搵食
而後者就最可能轉戰意甲,加盟拿玻里

Comment:
佢兩個為左保住國家隊席位而離隊絕對唔難理解
而既然人工同埋出場時間都會有所保證
艾比奧爾轉投馬拉加絕對正路

至於卡迪維拿方面
由於多數踢3-4-3既拿玻里已有杜辛拿
佢過檔後既出場時間根本冇太大保證
其實最想見到佢返維拉利爾救亡
不過直到而家只係聽過黃色潛艇想同貝迪斯爭奪巴西中堅甘姆

2)
莫斯科斯巴達被傳想搵賓尼迪斯執教

Comment:
肥賓講明希望下一站係英超
不過暫時見唔到有滿足到佢 shopping 慾望既球會準備換帥
就算維拉要炒麥利殊亦應該冇咁快

佢不如趁空檔先去俄羅斯掘金
最多遲下英超有位先再算
反正佢原來搏炒仲叻過教波

3)
報導指羅馬唔想人財兩失
考慮於1月以800萬鎊將迪羅斯賣到曼城

Comment:
點睇都係曼城最有機會接貨
一來得寵既文仙尼放風話中場唔夠腳
二來無幾多間球會俾得起17萬鎊週鎊

4)
報導指雲加可能增設防守教練一職
當中基昂以及現任預備組領隊保特都係熱門人選

Comment:
當年費sir都係靠基羅斯幫佢執返靚條防線
雲加不妨抄橋

而基昂同埋保特都咁熟識球隊踢法同埋相關弱點
當年亦精於佈越位
中堅出身既佢地仲可以順手培育哥斯尼,佐羅以及贊堅臣
這類有待加工既年青中堅
絕對係新職位既理想人選

5)
阿馬利以及R.林柏都被傳係紐卡素既新箭頭人選

Comment:
阿馬利雖然近兩年多左傷患
不過如果佢無傷無病
佢既射術同埋對抗性肯定夠班踢英超

既然干地講到出口要掃走佢
而佢又季尾約滿
400萬鎊既傳聞價未免俾多左
當然紐記亦未必滿足到佢既個人條件

而R.林伯就可謂大器晚成
佢自從前季過檔修咸頓後既入球率接近6成
修咸頓而家一心爭升班兼唔算等錢洗
唔似肯割愛這名開咧後9場入8球既射手
當然於英冠踢到曉飛
從來都唔係於英超入波既保證

2011-9-19

想講4場英超……

阿仙奴慘成布力般流浪既開齋獵物
賽後重點一定仍然係後防
雖然4個失波包括兩球烏龍波同埋一次誤判
不過冇運唔足以解釋防線點解對住榜尾球隊都會兵荒馬亂

其實佢地近幾場成日裝越位失敗
當中新兵唔夠默契肯定係其中一個原因
今場既安祖山度士正係好例子
而負責指揮應該係梅迪薩卡以及哥斯尼既其中一個
偏偏後者唔知點解成日走返轉頭追波
佢包越位既機會絕對唔低過左右兩閘

另外,隨住伊保爾離隊
兵工廠陣中而家只有沙格拿一個正宗右閘
佐羅已經有幾年冇踢過這個位置
贊堅臣亦唔係這方面既人才
佢傷出後既右路防線幾近唔設防
連這個近年最穩陣既防守位置都出事
兵工廠防線有咩辦法唔接連開窿

另一方面,一場爆冷似乎唔足以令堅恩挽回幾多民望
不過多得印度老闆鍚住自己個荷包
蘇斯克查接手既傳聞唔似會於短期內成真

紐記方面
這隊紐記絕對係筆者近年見過最韌既紐記
對兵工廠同埋昆士伯流浪都可以唔使輸下風波
今場如果唔係倒戈既基雲有料到
佢地返敗為勝先似係更合理既賽果

卡比耶既表現絕對物超所值
佢而家只係展示左佢遠射既能力
其實死球同埋12碼都係佢既強項
以前踢里爾都有唔少進帳
大家不妨留意下

另外,貝斯近幾場表現對辦
佢伙拍丹巴巴亞應該係現時紐記最可靠既雙箭頭組合

如果係都要挑剔佢地
就唯有各有問題既兩閘

利記方面
賽前已有心理準備佢地會輸波
因為對手中前場既壓迫踢法正係利記既死穴
早前亦已提及回勇後既熱刺絕對唔講得笑
不過輸夠4料就真係冇唸過
艾加傷出同埋踢少兩個都真係冇計

賽後有評論話杜sir用錯卡路爾
其實更錯係搵史基泰爾客串右閘去對付巴里
如果套用籃球術語就係錯配防守

至於最屬目既紅藍大戰
曼聯羸波真係要多謝球證
泰利既失誤只係屋漏偏逢連夜雨
不過更關鍵既其實係車仔輸在埋門一腳

曼聯本身後防已經唔多掂
復出既費查同埋安達臣既表現又係水準以下
偏偏車仔捉到鹿都唔識脫角
托利斯世紀撻Q固然有排俾人笑
不過另一罪人肯定係拉美利斯
如果佢上半場把握到其中一次黃金機會
故事發展肯定唔同晒

另一方面,托利斯近兩場其實多左去左路搵食
佢拉開對方後衛再回傳中路亦總算有貢獻
波亞斯肯定唔捨得借佢去馬拉加
最怕落難王子過左尋晚再唔見多幾成信心

2011-9-16

1)
意大利傳媒指國米可能搵雲尼亞里或者蘇拿接手

Comment:
前者教波功力只算中上
而且份人比較保守
唔似可以帶領國米重返高峰

後者雖然冇往績支持
不過有聲望搭夠
加上又肯踢進攻足球兼人工唔高
莫拉堤肯定 buy 佢

不過話說回頭
意大利油王近幾個月成日睇住個荷包做人
真係唔排除佢會因為咁而俾多n次機會加斯伯連尼

2)
阿仙奴被指打算於1月出價1200萬鎊收購托禾倫

Comment:
雲加早前先俾傳媒影到佢親自考核蒙杜利禾
而家又俾人踢爆佢派球探觀察托禾倫
雖然中前場係有傷兵
不過防中以及中堅始終更值得佢買人

3)
車路士被指想羅致卡錫
而馬路達就被傳可能於1月轉投拜仁

Comment:
祖記唔算等錢使兼陣容有待強大
車仔又咁唔通氣同佢地爭哥甸
油王如果唔俾個筍價都好難打動到佢地放人

4)
韋斯咸搵卡尼試腳一星期

Comment:
唔睇新聞都唔知這名助攻力既左閘仲未落到班
其實佢後生又夠班踢英冠有餘
有排都唔使報基維爾以及艾馬頓後塵返祖家養老

p.s.:
大衛辛頓波都未踢過就要開刀
佢同紐記都真係唔多好彩

不過紐記今個夏天前後簽左兩件腳患馬
加埋上季未等到賓艾化好返晒就買斷佢
反應佢地為左執平貨都好肯進行高風險投資

2011-9-15

想講歐聯分組賽

幾個月前已經講過
寧願唔買阿歷士山齊士或者法比加斯
都想巴塞搵返個好中堅

佢地主場咁樣俾AC米蘭逼和就真係現眼報
雖然過程真係有啲冇運
不過都無咩好怨

布斯基斯被形容為踢法最似哥迪奧拿
同樣係技術,速度,體能同埋制空能力都好一般
偏偏靠食腦去聯繫中後場既球員
哥迪奧拿幻想下如果佢自己生得高大少少
十幾年前可唔可以踢中堅
就知道搵布斯基斯去踢中堅係幾咁大鑊

而踢中堅以及防中所要求既位置感亦點都有啲唔同
布斯基斯亦明顯適應唔到中堅位置
佢既拍檔馬斯查蘭奴雖然位置感一流
不過就算可能已經報大數都只係得1米74

哥迪奧拿以及蘇比沙烈特既當務之急就係於1月前物色到新中堅
否則以佩奧爾以及碧基既健康狀況
後防中路開窿隨時係佢地衛冕失敗既催命符

另一方面,尋日有人問起點解尼斯達可以忽然回勇
其實道理好簡單
佢上星期搞唔掂高路斯同埋施斯係因為體能問題
但AC米蘭對巴塞時幾乎全民旨衛
尼斯達只要於唔大既防守區域睇定來踢
根本開正佢既強項

另外想講國米
佢地往往於AC米蘭順風順水既時候
就偏偏諸事不順
只係睇過佢地羸形勢輸波既精華
不過其實齋睇出場名單已經嚇親
忽然用個新仔之餘
仲要收起腳風大順既迪亞高米列圖
接手以來3場正式比賽全敗
雖然莫拉堤例牌話冇唸過炒加斯伯連尼
不過怕且後者落台會仲快過上季既肥賓

p.s.:
要推介一個龍門俾大家
佢就係薩格勒布戴拿模既基拿華
體育新聞剪輯左皇馬11次攻門
除左入波,擦柱同埋射中人各1次之外
其餘全數俾佢撲晒
睇到即刻聯想起上年世界盃既安耶馬

2011-9-13

雖然有點過時
不過都想講下幾場波

曼聯作客大炒保頓5球
講真唔多震撼
一來朗尼無論入波同埋食白果
好多時都有連續性
二來自從奧雲高尼接手保頓後
佢地好肯進攻
但防守就明顯越來越差
難為佢接受 Four Four Two 訪問仲大言大慚:
‘Can I win trophies? No doubt about it.’

曼聯可以羸咁多只係因為保頓屎
佢地今場唔集中既情度更甚於上季足總盃4強輸俾史篤城嗰鑊
打死都唔信紅魔鬼星期日對車仔仲可以咁如取如攜

保頓而家仲放風話1月放走加利卡希爾
保羅羅賓遜質低態劣
禮特又大而無當
比較有質素既新仔保利達又只係借將
而謝斯基連倫近兩季既水準又慢慢下滑
今季護級一定有佢地份

而利記雖然作客輸俾史篤城
不過中前場發揮唔差
輸既只係埋門一腳
這亦係點解熱刺可以苦戰羸狼隊既關鍵
另外,加歷查亦再次證明佢係球隊既負資產
杜格利殊係時候狠下心腸

尋晚一心唸住巴頓倒戈紐記會有好戲睇
不過真正搶鏡既就係泰拉拔同埋胡禮菲臘斯
迪奧迪同埋卡巴耶放生前者
搞到昆士借流浪上半場真係踢得幾生
而後者離開曼城亦係球迷之福
自碧咸被迫退出國際賽後
英格蘭幾個接班人各有問題
如果胡禮仔可以把握機會重生
季尾有份踢歐國盃並唔係妄想

另一邊既西甲
巴塞失分就俾傳媒批評佢地留力留出禍
但小弟就覺得唔怪得哥迪奧拿咁多
一來佢地歐聯首場要對抖多一日既AC米蘭
二來班波岩岩先踢完太公波
如果今場作客皇蘇都夫添搏殺
傷出既隨時唔止一個阿歷斯山齊士

如果係都要搵人狽鑊
首選一定係自殺性長程回傳既大衛韋拿
假波 feel 絕對拍得住當年馬達拉斯四十幾碼玩死自己龍門既笠射

最後要講既係意甲
國米同埋羅馬輸波絕對唔奇
加斯柏連尼既3後衛陣式只會進一步加劇國米既防守死穴
今場頭兩個失波就係輸佢地既所謂聯防
而安歷基成半隊波都係新兵
當中仲有幾件係係臨急抱佛腳既收購
只講默契已經夠佢地輸到仆直

p.s.:
歐聯重開就有得睇巴塞對AC米蘭
真係夫復何求

2011-9-12

1)
安捷被指想搵卡比路接手

Comment:
佢同軒迪克一樣
基本上都要季中先可以上工
對球隊真係唔好

而佢以前講過同英格蘭足總約滿後就會索性退休
不過而家有個油王搵上門就當然唔同講法

2)
消息指已經淪為熱刺3號龍門既高美斯將於1月走人

Comment:
哈利列納寧願用古迪仙尼做後備
都唔用佢
原因有二

一係高美斯仲可以賣到少少錢
岩晒少左收入既熱刺
二係古迪仙尼做慣替工
坐多幾季冷板都唔會嘈嘈閉

3)
AC米蘭被指考慮下季羅致托利斯

Comment:
雖然廢托冇貨賣都嘈嘈閉
唔算罪大惡極但都乞鬼人憎
又雖然公道既波亞斯已經決定換馬
不過佢就算離隊都唔似會過AC米蘭
因為紅黑兵團根本就莫財
當場如果賣左盤俾俄羅斯佬或者上市集資就係後話

4)
新特蘭最終將基恩借去艾阿恩

Comment:
條友之前巴屎閉話隊波冇大志
對勁旅例牌死火既佢咪又係睇錢做人

不過話說回頭
新特蘭借走佢一季已經收返600萬鎊借用費
尾季賣斷佢又可以屈多中東佬一筆
慳慳地隨時夠球隊未來兩期買人
更重要既係又冇益到英超對手
絕對係 good deal

p.s.:
雖然股市快'落'
搞到好多人都好唔快樂
今晚仲要好難賞月
不過點都要祝大家中秋快樂
趁聽日有假仲不妨睇下昆士伯流浪拆唔拆到'紐'

2011-9-10

1)
科素以自由身轉投列斯聯

Comment:
又一個早熟早殘既例子
最大鑊既係連射手觸覺都冇左好耐
就算降呢踢英冠都未必有運行

2)
富咸可能於1月借用基格納

Comment:
基格納自從過檔馬賽後水準大跌
似係頂唔住踢大會既壓力

轉會中型班應該有助佢重拾射門鞋
而另一重點就係富咸疊水過法甲中型班
勉強都俾得起佢份波糧

不過適唔適應到英超既快速節奏就係疑問
畢竟佢既優點係勤力走動
速度從來都唔係這個大隻佬既強項

3)
托利斯暗示車路士中前場既球員又老又慢
令佢遲遲未能融入球隊

Comment:
廢托雖然講得無錯
不過佢同中場唔夠互動
先係佢唔掂既更主要原因

佢如果依然固我
就算球隊再多幾年青快馬都幫佢唔到

p.s.:
南華主場收皮
同意過程略為冇運
對手亦成日扮嘢拖時間
不過堂堂巨型班都搞成咁就肯定有暗病

明明有中堅都要用防中白鶴客串
事實證明對後防冇咩幫助
當然成條防線發瘟絕對唔係佢一個人既責任

而中場又竟然盡用攻擊球員
進攻節奏亦唔見快左好多
旨意年老力衰既李海強同埋識攻唔識守既徐德帥去撲波
對手真係多謝都來唔切

堅信羅神今場冇玩佢既真人版 Fantasy
因為咁既排陣明顯係打晒亂章
排陣既人對球員既認識怕且仲衰過佢

印象中羅神講過
高人教練聲稱之前教5場中超就要收皮
全因溝通出左問題

不過話說回頭
如果羅神放手俾一個薄有名氣但唔識溝通既人揸旗
咁咪即係重滔上季迷戀名氣既弊病

而換左教頭都無起色
飛碟陳係唔係真係好似咁多球迷所講咁屎
而隊波既真正質素又係唔係同名氣成正比
倒值得反思

2011-9-8

1)
安捷被指有興趣於出年夏天搵軒迪克過檔
報導亦指佢地會引入兩名重量級球員

Comment:
假如土耳其最終入到歐國盃決賽週
就意味軒迪克最快要到7月先 available
不過俄超係3月開咧
季中先接手對球隊肯定唔係好事

不過佢早前講過如果佢隊波大吉利是涉及假波醜聞
佢會即刻劈炮
而如果土耳其臨尾撻Q入唔到決賽週
佢隨時主動同土耳其足總提前解約
咁仲可以有啲時間為開季做準備

2)
新特蘭被指考慮於1月再次出手引入柏夫奴真高

Comment:
佢地已經借用賓特拿到季尾
又使咩咁急搵多個箭頭
假如布魯士到時仲保得住份工既話
係搵都搵個人派牌啦

3)
泰維斯既經理人聲稱如果國米歐聯過到分組賽
就會考慮於1月收購這名麻煩友

Comment:
兩個疑問:
一係佢點知文仙尼唔會玩嘢於分組賽派佢上陣
二係睇國米今個暑假既交易
唔多似會咁肯洗錢

4)
拜仁以及利華古遜都被指睇中查拉
報導仲話後者想於1月向西布朗借用佢

Comment:
唔好見佢於西布朗只係踢右閘
其實除左唔識守龍門外
佢可以踢任何一個防守位置
絕對好使好用

5)
車路士被指有興趣羅致蘇保迪
另一方面,報導指史篤城想於1月向佢地借用盧卡古

Comment:
多蒙特點睇都只係蘇保迪既跳板
嫁入豪門只係時間問題

車仔既中堅只有大衛雷斯仲算年輕
保亞斯長線一定要為這個位置買人
不過爭唔爭得羸曼城同埋皇馬就係後話

另一方面,盧卡古加埋哥治既組合
再配合手楣彈戰術就絕對屈機
話時話佩利斯總算識搵人
獨孤一味既戰術都依然夠殺

2011-9-6

1)
阿仙奴方面透露韋舒亞要養傷兩個月
華美倫亦要再次開刀根治傷患
最快都要1個月先可以復出
甚至要抖足個半月

Comment:
中場都仲叫做有艾迪約,班拿約同埋艾朗藍斯撐場
後面既梅迪薩卡雖然高波殺晒
不過初到新戰場兼冇埋唯一可靠既拍檔
兵工廠防線未來個幾月依然危危乎

2)
巴塞被指睇中伊度比以及李安度達美奧
報導指曼聯亦睇中早前代表阿根廷踢世青盃既前者
而後者近月一直同熱刺,祖雲達斯以及拜仁扯上關係

Comment:
李安度達美奧雖然冇尼馬咁有星味
不過尋晚對加納又有波入
應該大堆球探加分俾佢
去歐洲發展既日子一定加快倒數

3)
消息指雖然蘭加希望以借用形式離隊
而列斯聯以及伯明翰都希望引入佢
不過紐卡素已經表明唔會放人

Comment:
唔計似翼多過箭頭既奧巴坦
紐記成個夏天其實只係簽得一個箭頭
不過蘭加既排名仍然只係阿四,甚至阿五

主因應該係佢既埋門一腳同埋制空力都未到英超水準
空有速度同埋活力都冇用

4)
巴塞仲未同艾比度達成續約協議
隨即有傳聞指巴黎聖日耳門想乘機挖角

Comment:
早前報導講到巴塞上下對佢咁好
佢又講到明要佢離開巴塞就寧願收山
有啲人講心唔講金
真係唔多信佢會為錢過檔

2011-9-4

1)
昆士伯流浪有興趣於1月借用碧咸

Comment:
咸哥講到明想踢出年奧運
佢肯定又想返歐洲比賽以保持狀態

昆士伯流浪嗰老闆仲疊水過李斯特城既泰國佬
波糧肯定又係唔成問題
不過最重要都係俾多少少錢同佢買埋保險
否則銀河肯定為左自物利益而唔肯妥協

2)
麥法頓可能以自由身轉投狼隊

Comment:
只要冇傷冇病
佢同狼隊一定係 perfect match

另一方面,由於諾域治同埋史雲斯睇落不外如是
狼隊本身又改善左防守
護級前景肯定好過新兵偏多既昆士伯流浪同埋防守繼續唔掂既韋根

3)
薜格拿落實以借用形式轉投費倫巴治

Comment:
雖然祖記唔要佢
但都唔使跳去架沉緊既船掛

4)
土耳其3大球會都被指有興趣接收杜斯山度士
不過最終未能於轉會市場關閉前成事

Comment:
其實哈利列納向來唔睇這個麻煩友
當時人本身都同幾間西甲球會睸來眼去
偏偏佢老人家硬係要等到個筍價先肯放人
俾小弟係度士仔都扯火啦

2011-9-3

想講兩場波

第一場係德國大炒奧地利
雖然肯定出線
不過意料之內真係冇咩值得興奮
對弱隊都失兩球仲應該球隊上下攝高枕頭好好反省

畢斯杜巴先天輸身材同埋速度
最慘仲要冇路數
無論踢閘或者中堅都整定係後防黑洞
偏偏佢無論球會同埋國家隊都長踢長有
請恕小弟無慧根明白雲高爾,希歷斯基同埋路維嗰腦唸咩

其實梅迪薩卡雖然近一季表現略為走樣
不過始終高波殺晒
用侯美斯去夾佢既效果應該唔錯

另一方面,高路斯以及普度斯基近幾年都幾乎係球隊正箭頭既鐵膽
不過出年歐國盃怕且係前者既最後一次國際性大賽
暫時來睇路維會靠馬里奧高美斯接班
不過佢無論埋門一腳(特別係處理12碼既水準),
同中場既互動,心理質素以及穩定性都同前輩有一段距離

而路維早前講過考慮同時起用奧斯爾以及馬里奧葛斯
尋晚睇到就冇類似英格蘭雙特既問題
但對住奧地利咁既弱隊
就算踢到曉飛都唔可以作準
不過路維亦總算多個 plan 揸手

第二場想講既係港甲開鑼
甘巴爾上半場居然用左閘丹尼串演中堅
無論陣式係3-4-3或者4-3-3都係超錯既決定

右路既曾錦濤雖然係箭頭出身
不過助攻無一次有威脅
回防既前隊友亨利次次都食住佢

中場既新仔顏樂楓又限於經驗同埋質素
踢左半場既結論只係得個跑字

送唔到個波上前場
前線就算多幾個足球先生都唔慌會有運行

後防失準都只係半場輸一粒
佢地其實已經執返身彩
到下半場甘巴爾將個陣執返正常
開波冇耐又靠個12碼追平
但整體發揮一般下
就算乘勢壓返住晨曦去踢
都只係失分收場
佢地最後階段仲有少少打亂章既感覺
睇完真係有少少失望
不過如果甘巴爾因今場而睇到球隊弱點
兩分又算得係咩

另一方面,大婆台報導體育新聞嗰個靚仔
聲稱羅沙度係傑志陣中比較有表現既球員
小弟夠膽講條友好可能係俾精華條片誤導左
這名西班牙中堅其實除左一次頭槌同埋兩個罰球比較搶鏡外
其餘時間其實表現平平無奇
幾次失位之餘
巴利一味勤力已經搞到佢頭都大埋
咁既表現絕對唔配成為上季既最佳11人

晨曦方面
肯搶肯拚有球味
只嫌佢地組織力一般
未知係因為新兵太多定係班波未夠班
如果Rambo搞得掂既話
遲下加埋卡爾既攻擊力應該有一定保證

2011-9-1

1)
阿仙奴落實從車路士借用班拿約
亦以1000萬鎊從愛華頓羅致艾迪達
雙方簽約4年

另一方面,雲加就將賓特拿外借去新特蘭
多名小將亦俾佢放逐

Comment:
艾迪達肯定係好波之人
不過咁多傷患就幾難再升呢

既然本身已經有艾朗蘭斯以及韋舒亞
又已經借到班拿約
買佢就不如俾多幾百萬鎊收購對球隊更有用既積基卡
又或者一早用500萬鎊去接收有領軍能力既柏加
對隊波既幫助肯定會仲大

另一方面,有消息指雲加其實亦睇中利華古遜既奧古斯度
當時人仲去定倫敦等做體測
只係雲加覺得利華古遜既1700萬鎊叫價太貴而放棄收購

雲加買人始終頭重尾輕
今次又一例證

不過話說回頭
4個新人有3個都有隊長經驗
對輔助小將成長應該好有幫助

2)
保臣最終決定轉戰法甲,加盟伊維恩
而隨住魯爾梅利斯入紙要求離隊
杜sir最終接納車路士對佢既出價

另一方面,比拿美就落實回巢

Comment:
既然一朝天子一朝臣
小弟都只得無奈接受利記既最佳球員離隊

另一方面,而家連古治都未必有正選
佢加盟都應該只係前線既第4選擇
不過佢既質素始終好過尼哥治
一出一入都算有著數

3)
國米最終成功借用薩拉迪
而佢地亦落實以200萬歐元
從布雷西亞購入本土16歲新星達斯既一半擁有權

Comment:
睇波咁耐都未見過國米咁慳家
既學兵工廠買入新仔再加工
就算買主力都多數係借用同埋零機價
賣走伊度奧既錢當然夠 cover 買人嗰條數
最絕都係連搵教頭都價低者得

莫拉堤一下子縮皮到咁
球隊要同AC米蘭爭意甲都真係好有難度

4)
熱刺終於肯俾錢買人
佢地成功以500萬鎊收購柏加

Comment:
由於冇左歐聯這條大水喉
哈利列納今個夏天主要以借(人)度日之餘
埋單計數靠轉會亦賺到接近2000萬鎊

而更正既係賣走既只有哥治係主力
不過既然有艾迪巴約取代佢
柏加同埋摩達歷既組合亦實而不華
而雖然板凳深度真係差過上季
不過今季唔使踢歐聯
陣中有潛質既新人又唔少

只要改善到而家差勁既後防
球隊既戰鬥力仍然係唔講得笑

如果要選今個最精打細算既教頭
買唔到中堅既哈利列納仍然係小弟既首選

2011-8-31

1)
夏格維斯最終加盟既竟然係曼城

Comment:
以佢既質素
如果無傷無病就絕對有力爭正選
與其踢邊隊都係同病魔作戰
踢大會又真係好過踢細會喎

另一方面,耶耶托尼季中要離隊踢非洲國家盃
曼城總算搵到個替補

2)
阿仙奴被指準備以破球會紀錄既2500萬鎊收購馬維拿
而雲加亦被指有興趣羅致丹普西,奇雲馬田及森巴

Comment:
雖然朴主永只係用左300萬鎊
而唔係原本報導既1000萬鎊
不過加埋梅迪薩卡以及安祖山度士
幾日內已經用左1800萬鎊既雲加肯再買人唔奇
不過唔似會俾咁貴買馬維拿

3)
隨住成功申請工作證
高亞迪斯亦落實加盟利物浦

Comment:
等左成個暑假終於等到個似樣既中堅
考慮到從來都唔係頂級質素既加歷查已經時日無多
史基泰爾又潛質見底
這名6呎5吋中堅加埋艾加既一剛一柔組合
肯定會係球隊防線既未來希望

4)
利物浦貼錢外借祖高爾去里爾

Comment:
同佢解約又要賠大筆錢俾佢
搏佢今季打返起都仲可能賣到三幾百萬鎊

5)
消息指紐卡素未能成功羅致柏柏斯施斯

Comment:
既然陣中唔夠有質素既箭頭
貝斯既狀態又唔夠穩定
柏度更應該疊埋心水踢多個中場

6)
維維安奴透露即將落實轉投熱那亞
不過佢未來幾個月仍然會留於國米養傷

Comment:
當時人如願轉會肯定開心
不過同樣開心既應該有柏迪利尼

雖然如果保方仲想踢
佢仍有實力於國際賽立足多好多年
不過長遠始終要為佢搵定接班人
維維安奴同埋今季於拉素重生既馬捷迪肯定係理想人選

2011-8-30

1)
艾利亞被傳即將以1100萬歐元過檔祖雲達斯
而漢堡就被指想收購切耶納既M.Parolo作為替補

Comment:
艾利亞明顯係一個好波版既巴布
適應意甲後應有作為
佢同卡錫雙翼齊飛絕對令小弟期待

2)
阿仙奴即將以620萬鎊從費倫巴治引入安祖山度士
而梅迪薩卡亦會以880萬鎊加盟
佢地亦忽然同史尼達,班拿約以及馬路達扯上關係

Comment:
唔覺得道士特別勁
不過華美倫從此就可以有更多時間踢中堅
加埋高波有殺無賠既梅迪薩卡
雖然佢地轉身唔快
不過至少會係一對正常既組合

3)
大衛辛頓被指最有機會加盟紐卡素
報導指轉會費為500萬鎊

Comment:
佢既轉會費同埋波糧既然連紐記都俾得起
兵工廠點會俾唔起呀
抑或雲加驚左佢對玻璃腳

4)
維拉被指有興趣收容夏格維斯

Comment:
佢地岩岩先外借馬干去奧林比亞高斯
戴夫同埋柏杜夫又表現平平
多個人幫手都係好事
反正佢都係逐場計人工

5)
車路士被指用800萬鎊再加班拿約
向利物浦收購魯爾梅利斯
不過消息指杜格利殊已經否決有關出價

而杜sir就終於有機送走保臣同埋尼哥治
前者好可能加盟愛斯賓奴
後者就轉投前線等人用既保頓

Comment:
以保臣咁既狀態同埋波底
如果去西甲都幾難搵到食

2011-8-29

睇到曼聯羸8:2既比數
真係唔兜巴摑醒自己都仲以為發緊夢

8個球員缺陣,尹佩斯宴客同埋曼聯班友腳風超順
通通都係慘敗原因
不過更關鍵既係兵工廠條防線仲衰過英甲球隊

贊堅遜加盟以來繼續客串唔擅長既閘位
高基連仲要係第一次踢英超
而包括即將轉投昆士借流浪既阿曼特查奧爾在內既幾件蛋散
果然繼續佢地小學生水準既防守
加埋左右中場又回防不力
咁既防線就算對英冠球隊都未必掂

當中要負最大責任既一定係雲加
近4年佢肯俾下錢去買入既高質後衛
其實就只有沙格拿同埋華美倫
上季兩個同胞中堅頻頻犯錯
佢搞左成個暑假都只係俾左90萬鎊去簽贊堅臣
繼續佢既所謂長線投資

其實引入謝雲奴後
中前場除左中場中之外
冇一個位置比後防更等人用
但教授偏偏拍板用1200萬鎊以及1000萬鎊去買阿歷士以及朴主永
咁既價錢接貨亦好可能又做水魚

相反收購對球隊重要得多既加利卡希爾就只係開價600萬鎊
咁頭重尾輕既增兵預算
荒謬程度直逼當年皇馬’施丹+柏雲’既屎橋
人地皇馬都仲有個鋼門卡斯拿斯
雲加有既偏偏只係尋晚又企錯位既施捷斯尼

其實面對對方唔算出色既防線
中前場於進攻方面既發揮其實已經好過後防好多
至少幾次靠短傳搵到空位進攻
不過當本身已經唔掂既後防要推上前做支援
就整定冇好下場

而家得返幾日
由於仲有韋舒亞
就算唔買星級球員去取代法比仔
小弟都寧願雲加為中後場簽返至少兩至三個好球員

p.s.:
雖然兩件新兵都入到波
不過真係唔覺利記踢得特別出色
睇完尋晚場波更加覺得佢地於速度上同曼聯有明顯距離

多得兵工廠同埋熱刺出閘脫腳
利記重返前4既機會又大左
不過要爭英超就應該仲未係時候

另一方面,文仙尼始終唔係一流教頭
曼城頂多係隻攔路虎
仲試緊車既保亞斯睇來先係費sir今季既最強對手

2011-8-28

1)
巴黎聖日耳門落實以300萬歐元引入盧根奴
不過佢地仲想再買中堅
報導指安達臣馬田斯亦準備由華斯高過檔

Comment:
既然咁鍾意fing錢
為中後場增兵都好
否則頭重尾輕咪又係甩尾收場

2)
阿仙奴近日再同多名球員扯上關係
當中包括加利卡希爾,森巴,阿歷士,卡蘭積卡,史尼達以及朴主永

Comment:
當中最大機會得手既只有朴主永
里爾俾兵工廠搶走謝雲奴之餘
而家又因為爭輸南韓仔而要改打Y.夏積既主意
同里爾咁多牙齒印
雲加將來斟酌夏薩特以及蘇維肯定難上加難

3)
紐卡素近日仍然尋覓緊新箭頭
當中哥治以及卡頓高爾都同佢地再次扯上關係
佢地亦被指對路蘭魯斯以及洛達列加有一定興趣

另一方面,佢地忽然被傳考慮從國米接收蒙達利

Comment:
路蘭魯斯以及洛達列加同時都同利物浦扯上關係
不過考慮到出場機會
佢兩個應該加盟既其實係紐記之類既中型班

4)
恩疏亞落實由利物浦轉投到士砵亭

Comment:
佢踢翼唔夠侵略性
但踢後衛就唔夠高兼成日失位
利記防走佢都冇咩損失

5)
消息指熱刺提出以600萬鎊收購柏加

Comment:
始終覺得佢值得有一個更好既歸宿
可惜利記同埋曼城有人滿之患
曼聯更想搵既係有創造力既球員

車仔而家仲可能要搵防中
兵工廠又等人領軍
波亞斯同埋雲加有心求才既話真係有買趁手

6)
昆士伯流浪落實同巴頓簽約4年
亦成功從維拉借用楊格

Comment:
消息指佢地亦想接收胡禮菲臘斯以及贊拿斯
完成賣盤果然即刻大把錢增兵
球隊既陣容亦明顯好過其餘兩隊升班馬
有望成功護級

7)
富咸即將同謝基拉簽約
亦準備向水晶宮出價500萬鎊收購年青射手W.沙夏

Comment:
簽唔到謝基拉
最失望既怕且就係尋晚又失4球既漢堡
一隊踢4場就失14球既佢地理所當然包尾

繼上季既史浩克04以及禾堡後
又一隊因為大換血而玩死自己既球隊
當中晏尼臣隻黑鑊肯定走唔甩

8)
彭迪夫以借用形式轉投拿玻里

Comment:
佢既踢法唔乎合加斯柏連尼既4-3-3陣式
國米就寧願補貼都要借走唔岩用既佢
認真慳得就慳

9)
車路士落實引入墨西哥U-20射手達維拉

Comment:
自從油王入主後
車路士唔係唔肯搞青訓
不過晏尼臣既成績表始終未如理想

而家波亞斯接手唔夠兩個月就頻頻簽左幾件介乎18至20歲既新星
明顯比幾名前任領隊更落力換血
亦進一步否定當年晏尼臣所交既功課

p.s.:
擺左十幾件波衫上yahoo
當中包括拿玻里以及馬略卡既新衫
有興趣可以去以下網址睇下:
http://hk.user.auctions.yahoo.com/hk/booth/mfho2003

2011-8-26

歐聯分組賽抽籤結果如下:
A組:拜仁,維拉利爾,曼城以及拿玻里
B組:國米,莫斯科中央陸軍,里爾以及特拉布宗
C組:曼聯,賓菲加,巴素利以及加拉迪
D組:皇馬,里昂,阿積士同埋薩格勒布戴拿模
E組:車路士,華倫西亞,利華古遜以及亨克
F組:阿仙奴,馬賽,奧林比亞高斯同埋多蒙特
G組:波圖,薩克達,辛尼特以及尼科西亞
H組:巴塞,AC米蘭,巴迪以及柏辛域陀尼亞

Comment:
小弟雖然同意A組4隊既平均實力最強
不過就唔覺得係死亡之組
始終拜仁以及曼城既班底明顯較強
兩個教頭於歐聯經驗方面亦有優勢
文仙尼雖然唔叻
不過曼城點睇都唔似會分組賽就出局

B組方面
土耳其球會近年冇咩代表作
以往既主場優勢亦蕩然無存
特拉布宗仲要係後補參加
實力可想而知

而里爾既班底雖然弱過上季
但開季以內既表現尚叫對辦

至於莫斯科中央兩季前入過8強
加上東歐球隊於分組賽時有佳作
只要留得住本田圭佑
就肯定同里爾都係不容忽視既黑馬

國米上下都咁多變動
有咩失準隨時陰溝裡翻船

C組方面
曼聯如同虎入羊群
最勁既對手都只係熟口熟面既賓菲加
後期分組賽隨時成為費sir既練兵場

D組方面
皇馬兵強之餘仲熟晒兩個主要對手既路數
肯定係首名熱膽

而里昂近年雖然都可以過到分組賽
兩季前更入到4強
不過近幾年始終唔夠拿古恩領軍嗰代咁有霸氣
而新教頭加迪又唔知有幾多斤兩
隨時俾阿積士成功偷雞
對方仲要最後一場鬥當時應該篤定首名既皇馬
怕且有一定著數

E組方面
波亞斯雖然只係首度領軍踢歐聯
但以往做摩連奴副手既經驗肯定有用
辛苦過後既車仔應該足以首名出線
而桑馬達咁快就要倒戈華倫就肯定係焦點

而華倫西亞上下既歐聯經驗雖然好過利華古遜一截
防守(特別係主場)亦比較穩固
最後一場先對車仔又可能因為對手留力而有甜頭
睇落好似稱高少少

不過利華古遜中前場既人腳始終唔差
次名出線始終唔算妄想

F組方面
第4種子既排名肯定反映唔到多蒙特既實力
佢地論人腳應該勁過馬賽同埋奧林比亞高斯
考慮到歐聯始終係搵真銀既地方
上季因為留力而於歐霸一早出局既歷史應該唔會重現

人腳有待加碼既阿仙奴雖然係首名熱門
不過佢地唔算疊馬
如果雲加又好似上季咁孤寒玩留力
隨時埋下次名出線16強要同硬嘢對撼既伏線

G組方面
葡萄牙傳媒以及波圖本身都覺得佢地抽到好籤
如果係上季嗰隊波圖當然唔難首名出線
不過冇左波亞斯以及法卡奧既影響始終好大
如果中後場個別主力於轉會市場關閉前離隊就仲大鑊
所以小弟估佢地頂多次名出線

小弟既首名心水係上季爆冷殺入8強既薩克達
佢地上季對住阿仙奴以及羅馬都可以4場羸3場
保得住幾個主力既佢地只要保持水準
足以再次首名次線

另外,辛尼特雖然來勢兇兇
不過如果繼續於主場羸形勢而失分
怕且將繼兩年前再次緣盡分組賽

H組方面
巴塞以及AC米蘭肯定係首次名既鐵膽
後者雖然算係積極增兵
不過同前者既實力仍有一段距離
而這亦係意甲同埋西甲既縮影

2011-8-25

1)
摩連奴面臨襲擊他人以及無體育道德既指控
西班牙足總最多可以罰佢停賽22場

Comment:
插眼咁冇品就肯定冇得掹
不過巴塞嗰坐教還拖都只係罰唔多過4場
段估摩連奴最終唔使坐足咁多場

2)
馬體會已批准科蘭同其他球會傾轉會
消息指巴黎聖日耳門以及國米都好想接貨

Comment:
國米明顯比巴黎聖日耳門等人用
科蘭既正選席位更有保證
佢亦可以參加冇咩幾可既歐聯
不過人工當然冇咁高

另一方面,馬體會連心口廣告都未有著落
賣走阿古路同埋迪基亞既錢轉過頭又幾乎fing晒
減磅放人都係逼不得已

3)
AC米蘭落實借用阿古蘭尼
如果佢既出場次數超過25場
佢地就要於於季尾以600萬歐元買斷佢

Comment:
艾基利繼續為球隊換血
長遠而言可能寄望佢繼承派路既作用
不過此刻對佢地最重要既中場肯定係奇雲保定

4)
巴頓於 twitter 透露已通過體測
昆士伯流浪即將宣佈佢以自由身過檔

Comment:
巴頓爛打得來作風實際
配合波底活力兼備既泰拉拔
昆士伯流浪既組織力肯定係3隊升班馬之冠

5)
禾夫斯堡被指希望以500萬歐元帶路斯基返德甲

Comment:
一個季尾就約滿既回塘球員邊值咁貴?

不過佢於隊中其實作用唔大
近年搵佢夾當打主力就嫌佢慢
俾佢去帶有待磨練既新仔同埋二線兵
好多時發現就算佢有靚交
都冇人識走靚位

6)
彼德斯既經理人放風佢即將以650萬鎊加盟紐卡素

Comment:
絕對這隻潛力股既合理水位
如果有得選擇
寧願利記簽佢都唔好簽荷西安歷基

7)
艾迪巴約落實以外借形式加盟熱刺
不過迪亞拉就賴死唔肯離開皇馬

Comment:
如果摩達歷最終離隊
哈利烈納可能索性將陣式由 4-2-3-1 轉為 4-4-2
雲達華治將由前場既自由人轉型為指揮官

p.s.:
阿仙奴驚險過關
不過過程無咩說服力
如非上半場表現 sharp 醒既迪拿達利就次於關鍵時刻宴客
兵工廠就算有作客入球都隨時衰收尾

話時話佢屢次射失12碼
就算阿歷士山齊士已經離隊
古度連都應該另覓人選

2011-8-24

1)
文仙尼被指打算棄用尼史葛
曼城以及利物浦都被指睇中加利卡希爾以及烏拉圭新星高迪亞斯

Comment:
尼史葛肯定係曼城既最大漏洞
文仙尼想踢走佢既傳聞絕對可信

加利卡希爾既機會睇落唔低
否則保頓都唔似可以借用保利達之餘
仲可以用200萬鎊筍價接收胡禮菲臘斯

而高迪亞斯方面
國民隊原本只係將佢估值為600萬鎊
但多得曼城同埋利物浦爭得咁熱鬧
消息指後者已出價700萬鎊
另有報導指這名6呎5吋長人既身價已被炒起至1000萬鎊

當然利記放左去基傑亞高斯去禾堡
與其用800萬鎊引入本土二線頭質素既史葛丹恩
就不如簽這隻重磅潛力股

另一方面,利記雖然願意以400萬鎊平放尼哥治俾保頓
都唔似係佢地羅致加利卡希爾既先兆
因為佢地始終冇咁多銀彈同曼城爭貨之餘
尼哥治大約都只係值咁既價錢
當日新特蘭唔接受將佢抵價700萬鎊
已反應市場對這名有速度但冇射術既箭頭既身價心中有數

2)
卡卡否認離隊傳聞

Comment:
奧斯爾,卡卡以及紐尼沙軒當中
似乎只有前者最得摩連奴歡心
而3人當中最無青春嗰個就係卡卡
好應該趁早離隊搏反彈

3)
阿仙奴,曼聯,國米以及拜仁都被傳有興趣羅致馬里奧葛斯
報導指多蒙特將佢估值2000萬歐元

Comment:
之前已經講過多蒙特要雙線發展
唔會於短期內放走咁多主力
不過以多蒙特既規模同埋財力
段估唔可以一世搏死這名超新星

拜仁向來鍾意盡收德甲兵器為己用
不過應該唔會急於今季
心態上肯定同兵工廠唔同

曼聯如果最終買唔到史尼達
而卡華利既進步又達唔到費sir既要求
咁既傳聞肯定於季尾俾傳媒勁寫

而國米雖然起勢賣走貴價主力
不過肯唔肯用高價搵替補就好仍疑問
當然當係長線投資就另當別論

4)
祖雲達斯為左引入般奴艾維斯
被指願意用邦路斯以及柏比作為交易籌碼

另外,阿馬利既去向仲未落實
佢可能轉戰德甲,加盟禾夫斯堡
不過最快走人既應該係即將加盟卡坦尼亞既阿米朗

Comment:
祖記近日同多名中堅扯上關係
睇怕邦路斯都時日無多

另外,近年過檔祖記既意甲二線兵多數無好下場
當中主因應該係佢地根本未夠班嫁入豪門
要負責既梗係嗰班買手

5)
路蘭呼籲巴頓加盟韋斯咸

Comment:
其實柏加離隊只係時間問題
韋斯咸擺明想搵巴頓做替補

但除非壞孩子肯減薪
否則6萬鎊週薪肯定係佢地負責唔起既人工
因為佢地既入場數字始終同紐記有好大差距
而蘇利雲組合睇落隨時仲孤寒過艾殊利

6)
消息指愛華頓拒絕阿仙奴對積基卡既1500萬鎊出價

Comment:
拖肥糖莫財到咁都仲企硬1800萬鎊
無非是睇死雲加等人用
莫耶斯當日都聲稱要有3000萬鎊先會將尼史葛賣俾曼城
最後咪8折價錢成交
佢過檔既機會肯定遠高於舒韋恩史迪加以及蘇維

p.s.:
荷蘭居然成為球壇一哥
真係要多得西班牙自羸得世界盃後 hea 踢多場友誼賽
不過最離譜既都係英格蘭咁既料都可以排第4
最反應現實就算係巴西再跌一級到第6
不過這亦係文尼施斯為前線換血既代價

2011-8-23

想講下尋晚場波......

韋碧克雖然有好多時間都隱形
不過關鍵既頭槌同埋後踭助攻
就肯定會令奧雲有更多時間坐冷板
而hea碧亦有更大機會於月尾前離隊

而面對曼聯史上最年輕但仍然勢兇夾狼既陣容
費度雖然失左3球
但表現肯定好過加盟後首次 clean sheet 既迪基亞
西班牙新仔雖然比前集中應付遠射
不過應付高波既表現依然一般
更衰既係原來佢有舖癮賣弄腳法

另一方面,原來傑斯已經為曼聯出場614次
打破左為單一球會於頂級聯賽既出場紀錄
除非史尼達真係過檔
否則條淫蟲只要唔受性醜聞影響
仍然會係曼聯陣中俾波最陰毒既球員

p.s.:
菲律賓單嘢不經不覺就已經過左1年
但兩地政府又為佢地做過咩嘢?
唔通真係覺得時間係治療傷口既最佳方法咩?
又或者主力維護霸權以及摧毀兩地既民主
已經夠佢地忙到百佳?

由先天畸形既政制到利益輸送
再到近幾個月霸王硬上弓咁去立法
以及上星期既港大悲劇
只係令小弟更加相信跟英國佬都好過回歸祖國

2011-8-22

1)
魯爾最終宣佈留隊

Comment:
佢雖然近乎冇晒速度
不過單靠入球觸覺以及埋門一腳都肯定仲搵到食
至少亨特拉爾兩瓣都冇佢咁勁

2)
大衛辛頓被指為左爭取更多出場機會而離開國米
報導指紐卡素就想接乘機挖佢過檔

Comment:
雖然佢於兩年內已由新馬甸尼淪為國米剩餘物資
不過始終係一個高質球員

如果國米真係肯割愛
打死都唔信迷戀幼齒既雲加唔會出手
仲何況兵工廠都應該要搵多隻左閘
幾時輪得到紐記去接貨

3)
阿仙奴被指準備以800萬鎊接收柏加

Comment:
就算俾歐洲足協罰停賽多兩場既雲加唔嫌佢係3字頭
都唔似會肯俾咁多
因為如果係咁順攤俾槌仔幫搶錢
點解唔一早就範要搞到而家冇人用
仲要包括熱刺以及昆士伯浪流既競爭對手都只係肯5折接貨

4)
消息指華倫西亞已接受車路士對桑馬達既2600萬鎊出價

另一方面,由於施治要養傷1個月
但波亞斯信唔過希拉里奧以及端布爾
所以有報導指車仔想搵史度拉利做替補

Comment:
上季大衛施華都要半年後先可以有料到
車仔應該知佢唔會係救世主
所以摩達歷單嘢肯定未 close file

另一方面,其實端布爾同埋奧拿里奧都唔穩陣
波亞斯點解上任後仲要同後者續約1年
真係搵0黎搞

5)
古治既經理人放風國米想簽這名荷蘭射手

Comment:
利記中場前雖然有人滿之患
不過杜sir張清單應該有排都未排到佢

6)
祖雲達斯被指考慮以500萬歐元跳樓價羅致艾沙維
佢地亦再次被傳打艾菲利既主意

Comment:
兩個都係好波之人
不過後者只係25歲兼有鬥心
明顯抵買好多

而家既沙皇好似死晒火咁
對佢已經心死既小弟已經將佢件波衫擺埋一邊
講真祖記肯俾咁既價都係多得佢既名氣
雲加既然放左咁多粒星
唔差在賣埋季尾約滿既佢

2011-8-21

1)
AC米蘭被指想向熱刺收購哥治
報導仲話費文尼會係交易既一部份

而佢地亦被傳會向利物浦出價700萬鎊接收阿古蘭尼

Comment:
雖然熱刺有一定機會簽艾迪巴約
不過未必會因而放走長人

而費文尼對熱刺既吸引力應該唔大
一來佢地簽到迪亞拉既機會都幾高
二來費文尼既人工對佢地而言亦係太高

2)
蒙杜利禾,卡卡,以及L.干沙利斯都被指係阿仙奴既增兵對象

Comment:
蒙杜利禾隨時係另一個阿古蘭尼
梗係簽唔過

至於卡卡就其實有本錢立足於兵工廠
因為佢好波得來都算機動
關鍵係佢既傷患以及雲加肯俾幾多錢

3)
貝迪斯被指考慮引入施積

Comment:
既然咁想簽個高佬但又簽唔到古爾沙
搵佢都不失係個好選擇
畢竟佢以前踢桑坦德既時候都試過有好表現

4)
李安納度被指想帶迪亞高米列圖去巴黎聖日耳門

Comment:
雖然消息指艾丁考慮過檔雷恩
但陣中炮手仍然夠用
簽佢既作用未必太大

p.s.:
1)
想講下利記作客兵工廠羸波

贏波都係咁話
利記既表現真係未如理想
特別係中場
4個當中有3個都係新兵就預左唔夠默契
而佢地既表現亦唔及上季踢中型班咁搶

最想講既係魯爾梅利斯絕對比軒達臣更值得踢正選
有表現但偏要俾個新仔搶左個正選
俾你係當時人都唔會服氣

而前線方面
蘇亞雷斯入場後
利記鋒線先有應有既入滲能力

而卡路爾係有質素
不過佢本身咁大隻都仲要成日靠過火既小動作去爭位
就反映佢仲未識用腦踢波

而兵工廠讓足車馬炮兼有個費林邦唔生性
想唔輸都難
不過話說回頭
佢地輸既兩球都好唔抵
利記只係得益於球例既灰色地帶

另一方面,雲加肯定會再使錢
不過應該唔係好似生果報咁講
睇下入唔入到歐聯分組賽先買人
而係未搵岩人

不過後防怕且都要增兵
尋晚有段時間居然要靠沙格拿頂住中路
反映佢地幾唔夠中堅用
偏偏而家梅迪薩卡又宣佈留隊
雲加得返個幾星期去搵個新中堅
最驚佢繼上年既史基拿斯後再入次貨

2)
香港羸4x100米接力銅牌
勁!

2011-8-20

1)
古爾沙落實以自由身轉投基達菲

Comment:
佢明顯跟錯阿拉干尼斯去費倫巴治
白白浪費左3年時間

2)
富咸以及帕爾馬都被指有興趣羅致薩卡度

Comment:
薩卡度又係另一個因為出國而玩死自己既名牌
段估佢今次唔會再犯錯

3)
加拉塔沙雷被指已同科隆傾掂普度斯基既轉會費

Comment:
普度斯基如果仲係麻麻煩煩
去邊度搵食都冇唔慌有運行

4)
拜仁再次被指睇中蒙杜利禾

Comment:
佢俾波既能力一定好過卻奧斯
不過攔截能力未到家
考慮到舒韋恩史迪加以及古斯達禾向來助攻慾強
對拜仁而言未必係好事

5)
祖雲達斯方面透露希望於轉會市場關閉前簽多兩至三名球員
一般相信包括中堅位置
佢地既同阿歷斯扯上關係
亦被指同AC米蘭,拉素以及熱那亞爭奪盧加奴

Comment:
祖記一日唔為基亞連尼搵返個好拍檔
保方幾勁都死

6)
國米被指有興趣借用薩拉迪

Comment:
搵佢最大既好處係佢冇適應問題
而佢既踢法亦配合到國米既4-3-3陣式

7)
伊比斯域即將以600萬鎊加盟布力般流浪

Comment:
佢一直未重返重創前既表現
不過埋門一腳總算信得過

只要佢唔好好似卡連歷咁適應唔到英超
而科莫斯卡又繼續有貨交

以這名波斯尼亞射手仲咁年輕而又咁有鬥心
交易仍令人期待

8)
查爾頓已拒絕紐卡素對21歲本土龍門羅拔艾利諾既10萬鎊出價

Comment:
這名前愛爾蘭U-19龍門好勁既咩?
紐記有咁多龍門都仲要搵佢?

2011-8-19

1)
艾沙亞落實轉投利雲特
而菲臘迪根就可能以100萬鎊既價錢轉投昆士借流浪

Comment:
可以養少個識攻唔識守既玻璃腳右閘
仲有得收返轉會費
利記今舖有賺

2)
國米落實同巴拉圭18歲新星 R.阿波路簽約5年

Comment:
莫拉堤閂水喉
由教練到球員都以價低為準則
不過國米就應該會比以前重用新人

3)
希斯貝加落實以自由身加盟禾夫斯堡
而落實引入干卡奧既馬體會就已開價430萬歐元收購迪亞高
不過報導指馬加夫希望至少收返860萬歐元

Comment:
西甲適合迪亞高發揮
加上踢馬體會既壓力唔算好大
有助佢谷底反彈
不過關鍵都係佢既健康狀況同埋紀律

4)
落實易主既昆士伯流浪被指出價400萬鎊收購柏加
不過同巴頓扯上關係既韋斯咸已經表明佢地出手太低

Comment:
槌仔幫原本唸左兩個辦法處理柏加嗰case
一係外借佢一季
唸住重返英超先再靠佢打江山
二係焗有興趣買斷佢既買家出個靚價

偏偏多間英超球會都唔上當

而家既槌仔幫身處兩難局面
今季用佢就肯定更加入不敷支
賤賣佢條氣又唔順

5)
車路士被指改打桑馬達以及莫天奴既主意

Comment:
忽然放風似乎只係想逼熱刺盡早賣走摩達歷
因為佢地就算點勁
都唔似係解決車仔組織力問題既近火

6)
利物浦被指出價1000萬鎊
另加尼哥治以及小將史杜寧
向保頓收購加利卡希爾

Comment:
既可為加歷查搵到接班人
又可以順手踢走尼哥治
簡直一舉兩得

7)
巴黎聖日耳門再次被指準備接收貝碧托夫之餘
更有報導指李安納度想搵埋卡卡過檔

Comment:
尋日先話杜格利殊似打緊 Football Manager
點知原來李安納度仲狼過佢

8)
比錫達斯被指亦有興趣接收魯爾

Comment:
土超近年特別鐘意引入西甲兵
不過多數都係失意軍人以及老嘢
對佢地既整體實力冇咩大幫助

9)
早前賣走卡連歷既布力般流浪
被指打算出價800萬歐元收購伊亞昆達

Comment:
雖然阿馬利就快去帕爾馬
不過肯定祖記依然想踢走咁伊亞昆達
以前亦傳過熱刺以及辛尼迪打佢主意
不過佢就算離隊都可能只考慮意甲球會

Comment:
皇馬實力上仲未追到巴塞
關鍵係睇唔掂沙維以及美斯
不過差距已經拉近左
亦識針對巴塞畏高以及防守死球唔集中既弱點
季內羸返一場半場都唔奇

另一方面,巴塞中前場雖然積極增兵
不過中堅位置唔夠人用
隨時導致聯賽失分
所以今季西甲應該會係近年鬥得最激烈既一季

2011-8-17

1)
紐卡素再次同美納特以及史杜歷治扯上關係之餘
馬美迪奧夫就被指成為佢地既借用對象

而雖然有消息指派達斯可能於短期內落實加盟
但同日佢地亦再次被傳接收布歷治

另一方面,貝斯就被指可能被賣去布里斯托城

Comment:
馬美迪奧夫上季被借去布力般流浪都冇咩料到
返曼聯當然冇運行
不過借佢就不如俾機會盧雲卡蘭斯
又或者俾多少少錢搵返個好箭頭

另一方面,報導話紐記如果要借布歷治
除左要捱佢既貴價合約外
仲要俾200萬鎊借用費
聽落絕對唔似艾殊利既孤寒作風

2)
利物浦被指視疏格斯為新中堅人選
報導仲話利記願意用保臣作為交易既一部份

Comment:
如果有留意史篤城增兵既新聞
就會發現好多人選都係有歐洲賽經驗既失意軍人
佢明顯考慮到球隊將會首度出戰歐洲賽
但本身人腳缺乏有關經驗既問題

3)
阿仙奴再次被指打夏薩特既主意
而雲加亦被指睇中華布拿,阿休,艾利亞以及祖高爾

另一方面,雲加決定將卡路士韋拿以及保路迪外借去西甲
佢兩個將分別效力皇家蘇斯達以及華歷簡奴

Comment:
兵工廠已有謝雲奴加盟
而家夏薩特同埋蘇維又同佢地扯上關係
里爾成條前鋒線都關佢地事……

祖高爾方面
先唔好講佢可唔可以回勇
佢既週薪高達11萬鎊
雲加如果要佢就不如一早應允拿斯尼加人工既要求

而艾利亞以及阿休
無錯係好波又跑得快
不過除非雲加想贏4x100米接力羸返個彩
否則搵翼就不如搵返個進攻中場

華布拿就似乎係最有機會加盟佢地既進攻中場
因為馬賽只係講明唔會放走阿休
但問題係華布拿唔似可以升呢到法比仔既級數

雖然佢地唔齊腳
不過連續兩場屎波始終有點兒那過
希望教授快手撥亂返正

4)
卡蘭積卡即將過檔新特蘭
而布魯士仲想簽埋賓特拿

Comment:
黑貓有炮手但唔夠 playmaker
只要卡達莫為首既藍領幫輕到卡蘭積卡
佢有條件反彈

5)
隨住伊度奧即將離隊
有盧斯奧續約3年既國米被指想搵杜奧巴或者科蘭取代佢

Comment:
兩個老嘢段估都要時間適應意甲
國米明顯睇錢份上而願意搏一舖

6)
安察洛堤可能接手巴黎聖日耳門

Comment:
都話甘保利個位坐唔暖架啦
油王俾咁多錢買馬
又點會信得過一個二流騎師

7)
車路士被指即將從亨克引入20歲比利時新星迪布路尼
而彭迪夫亦被傳可能轉投佢地

Comment:
嗰牛奶咀就算簽到
都應該會借多俾亨克一季
擺明係長線投資

p.s.:
報導A話史尼達邊度都唔去
報導B就話佢肯減價過檔
好煩!

2011-8-16

1)
利物浦被指有興趣從些路迪羅致麥基迪

Comment:
如果屬實
King Kenny 可能真係以為佢自己打緊機

2)
波亞斯被指考慮從波圖引入舊部屬A.彭利拿
另一方面,車仔亦被傳有興趣以1200萬鎊接收魯爾梅利斯

Comment:
烏拉圭人基本上可以踢晒成條左路
如果有佢加盟
佢既可以取代施哥夫出任艾殊利高爾既副車
又可以取代馬路達負責側擊
俾這名法國中場重彈進攻中場既舊調

另一方面,如果利記俾唔到魯爾梅利斯足夠既出場機會
原本以咁既報價都幾吸引
不過要益車仔就梗係 no way

3)
布力般流浪被指有興趣接收魯爾

Comment:
過氣金童離隊只係時間上既問題

如果加盟馬拉加就肯定適合屋企人
自己友同埋波糧亦肯定好多好多

暴力幫雖然只有沙加度一個老死
不過加盟英超始終係佢講左多年既心願
所以亦唔係冇機

4)
阿仙奴以及皇馬都被指睇中蘇維
當時人就表態希望轉投兵工廠

Comment:
除非雲加決心轉型踢4-4-2
否則真係冇必要買多個中鋒

5)
諾域治落實從利物浦引入D.艾耶拉

Comment:
其實佢既質素唔錯
只係嫌佢唔夠大隻
不過睇住實力更強既威爾遜都未有機會上位
佢轉會去諾域治都好明智

6)
羅比堅尼落實以350萬鎊轉投洛杉磯銀河

Comment:
消息指銀河簽左佢之後既財政壓力大增
但就唔代表當路雲以及碧咸會離隊
以羅比仔仲咁當打
碧咸獨孤一味斬中俾佢已經係一大殺著

7)
波圖即將以600萬歐元從安德烈治羅致迪科亞
佢既母會亨克將會分到當中既120萬歐元

Comment:
迪科亞一直都被指係多間大球會既追求對象
不過最終都係冇疾而終
終極羸家竟然係波圖
有冇人可以話俾小弟知點解
抑或一直只係佢既經理人頻頻單向發功

8)
高士路即將落實借用傑利臣

Comment:
巴塞買左佢後又齋借唔用
佢好可能又係另一個俾經理人同埋傳媒捧得高但趺得傷既例子
不過更傷既可能係巴塞嗰銀行戶口

p.s.:
希望米基爾既老豆吉人有天相......

2011-8-15

Big 4首戰只有繼續行運既曼聯開到齋
利記同埋車仔都算冇運
不過更關鍵既係本身問題

杜殊一次過用齊4件新兵
當中特別以軒達臣既發揮最令人失望
既然佢係球隊既長線投資
先用上季全隊最有表現既魯爾梅利斯明顯先係正路

至於車仔咬唔入存心死守既史篤城
關鍵係兩側都搵唔到機會
馬路達以及卡奴既表現都係水準以下

波亞斯應該更早換入班拿約以及安歷卡
而更取既做法就係索性收起米基爾
轉陣踢4-2-4

兵工廠方面
睇左佢地半場已經心死去搵周公
佢地中前場一下子冇左兩大重心
再加埋韋舒亞養傷
等同讓人車馬

雲加而家被指打泰維斯以及索察中場馬雲馬田既主意
但一日未成事
扯火球迷怕且都會繼續大叫 'spend some fxxking money'

佢地咁既表現最終有1分落袋都應該偷笑
桑治其實應該比謝雲奴更早去更衣室沖涼

而紐記就一如上季咁好齊心去打老虎
不過攻力似乎有待改善
即管睇下馬里新星 M.Maiby 會唔會由索察加盟
(又係索察?!)

而巴頓如常出場就反映兩件事
一來球會繼續每星期俾佢6萬鎊週薪
冇理由有得用而唔用
絕對合乎艾殊利既經濟原則
二來柏度根本未搵到替補人選
這亦係紐記現時既最大隱憂

曼聯方面
防線傷兵咁多
不過費sir應該唔會為防線增兵
因為仲有法比奧達施華,甚至預備組既布朗可供選擇
人腳勉強夠用

佢而家最擔心既可能係迪基亞既信心問題
如果社區盾既兩個失波係反映既應付高波同埋遠射既弱點
尋晚既失波就應該係心理問題

2011-8-12

1)
史篤城再次被指有興趣接收巴頓
而辛尼特更被指以除稅後6萬8000鎊週薪既肥約利誘佢

Comment:
咁多球員都頂唔順俄羅斯既生活
睇佢去邊就知佢比較重視既係錢定係前途

2)
加拉塔沙雷以及魯賓卡山都被指有興趣羅致迪亞高米列圖

Comment:
史尼達同埋伊度奧都被傳會被賣走套現
彭迪夫加盟後既表現又冇預期咁勁
國米未必會一下子拆晒成條前鋒線

3)
端基落實以借用形式加盟保頓
保頓季尾更有權以300萬鎊買斷佢

Comment:
佢近季雖然因傷而跌watt
不過始終質素同埋英超經驗兼備

保頓冇左艾文達同埋李青龍
佢既加盟絕對係及時雨
而可以先借後買就更加保險
奧雲高尼今次明顯做左單好交易

4)
利物浦落實引入荷西安歷基

Comment:
始終對佢評價唔高
論質素肯定唔係卡迪維拿嗰皮
就算蒙利爾以及迪賀奴都好波過佢

杜格利殊堅持買佢大抵係因為佢已經適應英超
當然佢自從接左隻狗過英國陪佢後
表現真係有明顯進步

5)
紐卡素被指有興趣接收班拿約
另有報導指佢地打算借用馬捷達

Comment:
佢過往既表現已經說明佢可以取代巴頓踢右路
而消息指車仔將佢標價550萬鎊
不過既然佢係棄將
又已經3字頭
紐記應該可以壓價至400萬鎊

另一方面,馬捷達近年既發展雖然差過預期
不過質素始終唔差
紐記應該唔介意幫曼聯練兵

6)
消息指皇馬拒絕利物浦對希古恩既2500萬歐元出價

Comment:
就算係表現未如理想既賓施馬都唔止咁既價錢
摩連奴企硬唔賣佢又有幾奇

p.s.:
有報導指曼聯嫌史尼達人工太貴而縮沙
係真唔係呀?

2011-8-11

1)
佩利斯表示希望從熱刺引入柏拉斯奧斯以及哥治
而史篤城亦同柏加以及胡禮菲臘斯扯上關係

Comment:
柏拉斯奧斯肯定係英超其中一個最佳防中
好懷疑史篤城有冇咁多 budget 去迎合熱刺既叫價

2)
消息指阿仙奴已同巴塞就法比加斯既轉會費達成協議
當時人貼埋大床俾500萬歐元
巴塞再俾2900萬歐元
而另有600萬歐元就係 variable

Comment:
雲加將法比仔以及拿斯尼列入歐聯名單
根本就係逼巴塞以及曼城加碼

3)
耶高保同埋托禾倫都被指成為紐卡素既增兵人選
另一方面,佢地已經接受利物浦對荷西安歷基既出價

Comment:
前者長期修唔到身
論入球能力又唔好得過艾美奧比幾多

後者好波又當打
不過燕豪芬之前已經放走迪沙素斯基
除非紐記肯開個筍價
否則佢地唔似會於一個暑假內賣晒兩大射手

將價就貨
羅比堅尼其實可能先係紐記既最好選擇

4)
拿玻里方面承認有興趣羅致G.羅斯
不過就否認會接收巴洛迪利

Comment:
卡雲尼俾曼城以及國米咬住唔放
拿玻里肯定要做定兩手準備

5)
消息指曼聯將於今個星期內落實羅致史尼達

Comment:
列卡度艾華利斯可唔可以火速上位
會成為國米能否維持火力既關鍵

p.s.:
德國18年來第一次羸巴西
論踢法佢地個別進攻比對手更有森巴風格
比南非世界盃既時候更流暢既進攻繼續建基於防守之上
歐國盃既前景值得期待

不過當面對平均技術最好既西班牙
佢地仲可唔可以維持類似踢法
抑或好似前兩次文手咁俾對手搓住踢
就係捧盃關鍵

另一方面,西班牙於羸得世界盃後再次輸俾一線球隊
雖然似係個別主力留力於球會比賽
但戰果仍值得迪保基斯關注踢法上有冇問題

而佢地近年既比賽時間怕且係全球之冠
季尾踢歐國盃仲有冇貨賣
倒成疑問

2011-8-10

1)
厄遜落實以自由身同史篤城簽約兩年

Comment:
假如佢同埋活基治都冇病冇痛
史篤城既防線組合都幾有睇頭

2)
阿仙奴再次被指有意羅致香川真司

Comment:
相信雲加對佢流晒口水
不過要兼顧歐聯戰線既多蒙特唔似會短期內放走兩件主力
就算係放人怕且都要等多個暑假
所以過檔利記既傳聞亦都唔多可信

3)
史雲斯以及尼斯都被指有興趣引入查斯古特

Comment:
如果佢加盟尼斯
大抵只因家庭理由
但英超既吸引力畢竟仍在法甲之上

但對肯踢進攻足球既史雲斯而言
攻力未算銳利既關鍵係冇信得過既人派牌
而佢地已有丹尼格拉咸以及比亞堤可以踢正箭頭
所以羅致查斯古特唔算特別有逼切以及重要

4)
高路仙尼被指成為華倫西亞既1000萬鎊新中堅人選

Comment:
同意佢係紐記防線既瘀血
不過如果而家先換馬
又未免遲左少少

另一方面,華倫西亞條街數咁得人驚
邊有1000萬鎊閒錢去接收佢?

5)
馬體會落實以1200萬歐元引入艾達杜蘭
雙方簽約4年

Comment:
小弟一直認為德甲以及西甲先會係佢杯茶
土耳其球員向來於德甲有好表現
日常生活既適應亦比較容易
而西甲就向來係技術型球員既天堂

6)
車路士被指準備用班拿約作為收購摩達歷既籌碼
而路蘭度亦再次被指可能以1500萬歐元由波圖過檔

Comment:
如果佢真係加盟
中堅既人腳確實比防中充裕
波亞斯大可考慮搵艾雲奴域以及大衛雷斯再次串演防中

7)
艾美奧比落實同紐卡素續約到2014年

Comment:
佢始終唔係一個可靠射手
加上丹巴巴亞又唔可以成季搏盡
所以堅信紐記於開季前仲會搵箭頭

8)
巴黎聖日耳門被指準備出價1500萬歐元收購基拿甸奴

Comment:
雖然每件新貨以及目標都當打又有料
但冇時間融合即係等如同對手踢讓賽
出閘脫腳都仲唔識死
佢地始終會成為爭標份子
不過係下季……

2011-8-9

1)
阿歷士張伯倫落實加盟阿仙奴
這名下星期先夠18歲既小將既轉會費高達1500萬鎊
當中有300萬鎊係 variable

Comment:
雖然佢可以踢進攻中場同埋翼鋒
不過雲加段估唔會咁快唸住即食
佢應該仲會買人取代法比仔以及拿斯尼

2)
柏夫奴真高以及 G.Holt 都被指成為紐卡素既增兵對象

Comment:
就算熱刺肯5折出貨都要大約650萬鎊
以咁既價錢收購一個狀態瓢忽既3字頭箭頭
實在唔多化算

而350萬鎊既傳聞價似乎打動唔到諾域治放人
但如果再加碼簽一個只係於英甲以及英冠風光過既射手
風險又係唔低

3)
紐卡素被指視派達斯為新左閘人選

Comment:
佢只係23歲
不過已經憑出色助攻而成為準一隊正選
700萬鎊既傳聞價貴得有道理

4)
皇馬被指準備於月底前出價500萬歐元賤價接收艾迪巴約
(不過另有報導指巴黎聖日耳門頂爛市出價1400萬鎊搶人)
再於出年1月以4000萬歐元引入尼馬

Comment:
除非希古恩自己想走
否則其實唔錯既入球率已令佢既地位相當穩固
新兵卡利祖亦質高兼可客串側擊

摩連奴最近又透露已成功將賓施馬轉型
所以佢其實唔算特別等人用

5)
李斯特城被指可能出價400萬鎊接收羅比堅尼

Comment:
泰國佬咁肯俾錢
成事關鍵只係當時人肯唔肯屈就英冠

6)
史杜歷治被傳可能被外借到愛華頓

Comment:
佢越來越似行緊卡頓高爾既後路
不過佢無論速度,身體質素同埋射術都好過師兄
他日決心離開史丹福橋都唔憂冇好出路

p.s.:
1)
見到個市大起大落
唔怪得以前聽過有人話仲刺激過睇波

2)
有本地波頻道?!
正到爆開再爆開!!!!!

2011-8-8

1)
馬體會被指想搵法卡奧取代阿古路
仲願意將沙維奧加現金搶人

Comment:
法卡奧同阿古路根本係唔同類型既球員
唔可以稱得上係代替品
而馬體會本身亦唔係冇士哥拿
所以唔買佢根本唔係大問題

而且佢地負債問題嚴重
放走阿古路某程度都只係因為想套現
而家唔應該為左買佢而用咁大舊錢

另一方面,佢地買左沙維奧後根本冇好好俾過機會佢
這名阿根廷翼鋒亦表態唔想成為交易條件
賴死唔走亦會令交易難以成事

2)
祖雲達斯為左羅致華加斯
被指願意用哥利亞雷拉作為交易既一部份

Comment:
隨住胡仙歷加盟
佢既出場機會肯定減半
加盟有基拿甸奴可能轉投熱那亞既費倫天拿肯定可以擔正
世界波玻璃腳王子有力上位

3)
雖然雲加講過唔買中堅
不過阿仙奴仍然繼續同梅迪薩卡繼續扯上關係
雲達不來梅亦表示會考慮有關佢既幾個 offer

Comment:
現時阿仙奴仲未有新左閘
如果有佢加盟
畏高症有望克服之餘
華美倫亦隨時可以重彈舊調踢左閘

4)
消息指文仙尼唔會起用包括艾迪巴約以及比拿美在內既5名球員
不過亦唔會賣走佢地
而佢地只要同青年軍練習就可以繼續出糧

Comment:
錢多到貴真係吹佢地唔脹
不過咁損人不利己亦頂級折墮

5)
摩納哥被指想搵古利回巢幫手爭升班

Comment:
佢既質素踢法乙肯定超班
以老帶新聽落亦正到爆開
不過佢近年養傷多過踢波
至怕佢連兩年合約都捱唔到尾

2011-8-7

1)
卡維落實以自由身轉投韋斯咸

Comment:
Big Sam 引入佢似乎係想為卡頓高爾既離隊作好準備
畢竟英格蘭人為左機會唔大既代表隊席位
唔會甘心屈就英冠

2)
昆士伯流浪被指希望向車路士借用貝治蘭

Comment:
雖然施哥夫已離隊
不過有艾殊利高爾一日
佢既出場機會始終有限
外借一季當然有助吸取經驗
不過波亞斯會唔會為佢唸咁多就係後話

3)
車路士已同安德烈治就盧卡古既轉會費達成協議

Comment:
前線球員本身已經突腳
而佢既加盟主要係為將來取代杜奧巴舖路
既然而家唔急用
如果現有箭頭冇人離隊
車仔外借佢都唔係冇可能

4)
伯明翰落實從西布朗借用基斯活特一季

Comment:
佢既加盟應該係為施積以及謝路美可能離隊而舖路

兩者都係部份英超球會既增兵對象
施積既追求者仲遠至德甲

而人工較高既長人實際作用一般
伯明翰其實一直唔介意佢離隊
只係想等個好價先放人

5)
G.費蘭迪斯落實以借用形式加盟李斯特城

Comment:
既然老闆肯放水大搞爭升班
艾歷臣梗係唔介意搵這名曼城舊部屬再次合作
不過俾晒錢同埋接近兩季時間都失敗而回
結局一定係同另一個泰國老闆分手收場

2011-8-5

1)
莫耶斯被指打算賣走魯迪維爾套現

Comment:
雖然史尼達先係下一個紅魔成員既大熱門
費sir近兩季又已經簽左史摩寧以及菲爾鐘斯
不過佢似乎一直對這名可以踢中堅以及防中既球員十分欣賞
絕對有可能順手簽多件

2)
消息指辛尼特為左成功羅致邦路斯
願意免費外借般奴艾維斯俾祖雲達斯一季
不過祖記已經表明無意放走這名意大利國腳

Comment:
只係免費外借一季就梗係唔吸引
祖記最終咪又係要再為防線搵個新球員

另一方面,繼之前幾個南歐球員後
般奴艾維斯亦捱唔住寒冷天氣同埋當地生活
可以預見邦路斯如果過檔
唔慌會有好下場

3)
皇馬被指睇中葡萄牙U-21後衛柏度文迪斯

Comment:
單嘢傳到咁可信
全因為佢同埋摩連奴以及C7都用埋同一個經理人

這個又係叫文迪斯既經理人因為拍到摩連奴這個好碼頭
上季已經被形容為半個皇馬總經理
而家摩連奴連買賣球員都話晒事
佢搵唔到著數先至奇

4)
紐卡素被指有興趣出價600萬鎊接收奧奴夏
以及以借用形式羅致奧巴坦

另一方面,巴頓就被指成為新特蘭既增兵目標
布魯士早前先決定放走馬白蘭基

Comment:
唔止一次講過奧奴夏係潛質股
助攻同埋移入中路包抄都掂
搵佢取代質素見底既森遜絕對有得唸

不過既然文仙尼唔多重用佢
7折價錢隨時已可以打動曼城放人

另一方面,奧巴坦雖然可以踢翼鋒,箭頭同埋進攻中場
但問題係佢冇個位置踢得好
更大鑊既係佢職業生涯加埋踢左接近80場1隊賽事先入得4球
與其幫曼聯養個廢人
倒不如俾機會新人

5)
雖然車路士加碼至3000萬鎊收購摩達歷
不過熱刺仍然不為所動

Comment:
從英超挑戰盃可見
車仔雖然前線疊馬
不過攻擊中場既選擇始終唔多

班拿約唔似會受到波亞斯重用
林伯特又年事已高
馬路達亦多數負責側擊
加上柏斯托尼又俾巴黎聖日耳門截糊

熱刺而家擺明睇死車仔求才若渴而吊高來賣
當年佢地亦係等到最後一刻以高價放走貝碧托夫
以摩達歷同球隊已經反晒面
離隊指日可待

p.s.:
全球股市急挫
腦海即時反應偏偏係5個大字:有危就有機
做人處世,打工創業,營運球會......都係咁話
共勉之

2011-8-4

1)
紐卡素被指有興趣以150萬鎊
另加年青龍門 F.科士打向韋斯咸收購格連

Comment:
冇件頭但有牛油手
有得印上英格蘭國腳既品牌只因祖家青黃不接
紐記更應該留返啲錢買中堅或者右閘

2)
山度士方面希望搵比利復出
於世冠盃既賽事短暫出場幾分鐘

Comment:
世冠盃又唔係表演賽
有咁既唸法真係好唔尊重賽會同埋對手

一把年紀既比利怕且骨頭已脆
俾你係佩奧爾同埋碧基
都唔知好唔好意思去攔截佢

3)
巴頓被指可能轉投愛華頓

Comment:
莫耶斯既中場向來多打仔格球員
加上艾迪達近年又傷患漸多
佢想引入巴頓都唔難理解

4)
富咸被指有興趣接收卡頓高爾
安祖莊臣仲可能會俾用作交易籌碼

Comment:
槌仔幫擺明價岩即放
成事關鍵應該係卡頓高爾唔好再叫價咁高

不過話說回頭
卡頓高爾同埋安祖莊臣都係出名玻璃腳
執到都未必係好事

p.s.:
R.I.P.松田直樹

2011-8-3

1)
米蘭祖雲奴域即將落實重返安德烈治
雙方將會簽約兩年

另一方面,韋斯咸就被傳希望以借用形式搵祖高爾回巢

Comment:
祖雲奴域只係暑假至今第二個出走既高薪低能人辦
杜格利殊仍須努力

另一方面,以槌仔幫既財力同埋蘇利雲出名算死草
就算祖高爾肯屈就英冠
佢都要只願大幅減薪
又或者利記肯貼埋錢借走佢
否則難以成事

另外,富咸被指打算接收尼哥治
希望利記唔好企硬700萬鎊先肯放人
有時既嘢真係要識見好就收
清理門戶正係其中一個例子

2)
史篤城被指準備截劫賓特拿
而羅馬亦被傳希望引入查馬克

Comment:
以史篤城既手榴陣戰術
加埋賓特拿去衝去湧
簡直係 perfect match

另一方面,羅馬本身已買斷波里路
查馬克怕且只係安歷基正箭頭既次選
倒不如留隊等運到
因為雲佩斯實在好難捱足一季

3)
施哥夫即將以1300萬鎊回流俄超,加盟安捷

Comment:
大抵佢走遲左至少一季
而家返俄超都仲有時間回勇
出年都仲有可能見到佢重拾08年歐國盃既水準

4)
消息指多間球會都有興趣接收巴頓
當中包括阿仙奴,熱刺,維拉,布力般流浪,富咸,史篤城同埋些路迪

Comment:
假設雲加繼續起用3人中場
就算只係做替補
佢去阿仙奴都應該有唔少出場機會
畢竟兵工廠一眾中場都相當玻璃腳

5)
奧蘭多海盜宣佈落實同麥卡菲簽約兩年

Comment:
唔收身既話
踢邊個聯賽都冇運行
強如大哨都唔例外
又何況佢

6)
巴黎聖日耳門,馬拉加以及國米都被指有興趣接收貝碧托夫
當中前者仲被指頂爛市出價1800萬鎊搶人

Comment:
如果佢真係加盟
艾丁以及加美路既其中一個就要屈居後備
可能增加前者轉投紐記既機會

2011-8-2

1)
李斯特城被指希望於1月借用碧咸6星期
報導指佢地仲準備用20萬鎊週薪利誘佢

Comment:
既然肯俾120萬鎊簽佢個半月
不如預多少少錢同佢額外買多份保險
否則肯定同上季既熱刺一樣徒勞無功

2)
雲加承認可能會買人
但就一定唔係買中堅

Comment:
佢睇來已經選定華美倫加上哥斯尼踢中堅
意味應該真係會買新左閘

3)
桑馬達既老豆兼經理人透露華倫西亞已拒絕阿仙奴對佢嗰仔既出價

Comment:
買佢應該係為左取代拿斯尼
而收購列卡度艾維利斯以及辛迪卡蘇拿都食白果
雲加隨時要靠艾朗藍斯去替補法比仔既離隊空缺

4)
辛尼特被指準備向祖雲達斯出價700萬鎊收購邦路斯

Comment:
佢雖然於祖記既發展未如理想
不過除左人工以外
唸唔到有唸嘢打動到佢貿然轉去俄羅斯搵食

5)
富咸被指睇中哥治
仲願意用森莫拉作為交易條件

Comment:
以祖爾接手以來出奇地慳家
就知增兵資金唔慌多得去邊
哈利列納唔似會為少少錢而換走個箭頭

6)
隨住巴頓公開批評紐卡素既轉會制度
紐記隨即宣佈佢可以自由離隊

Comment:
由幾個月前有價有市既幾百萬鎊身價
搞到而家抖零都收唔返
紐記今舖真係捉蟲
唯一安慰就係慳返佢既6萬鎊週薪

另一方面,除非古迪利斯重彈舊調
否則紐記而家陣中其實再冇其他算係唔錯既右路人選

7)
消息指白治為左爭取更多出場機會
而考慮以借用形式加盟李斯特城

Comment:
佢雖然可以踢中後場好多位置
不過仲慢過當年加利仔既速度就令發展平平
重返岩佢水準既英冠都不失係正確決定

8)
士砵亭即將落實引入謝法倫

Comment:
佢無法於巴塞得到更多出場機會
大抵只因同柏度洛迪古斯同期
轉戰葡超肯定多波佢踢

另一方面,考慮到太多人同佢爭大國腳席位
選擇代表出生地委內瑞拉可能先對佢既國際賽生涯有利

2011-7-31

1)
巴勒莫方面聲稱已同意以4300萬歐元將柏斯托尼賣俾巴黎聖日耳門

Comment:
兩地油王買人就好似細路仔買玩具
巴黎聖日耳門計人頭輸俾馬拉加
不過計質素同埋當打情況就羸返至少成條街

不過咁唔代表佢地有力即刻羸法甲
畢竟半隊正選係新兵已經輸晒默契
教頭又唔見得特別有料
萬一用唔掂班新兵隨時會係佢既催命符

2)
賓士打以借用形式加盟西布朗
而伯明翰除左可以收到借用費外
亦可以免費借用邁希爾一季

Comment:
兩個龍門可以去適合各自水準既聯賽發展
加埋莫財既伯明翰又有錢落袋
鶴臣亦有多一季時間去為球隊搵1號龍門
簡直係4羸局面

3)
消息指史雲斯即將引入魯迪治以及列達

Comment:
消息指魯迪治終於肯於個人條件讓步
紐記得以養少個廢人之餘
仲可以執返200粒去幫補下買右閘嗰條數
紐迷肯定開心死

p.s.:
1)
李青龍因為斷腳而要最少休傷9個月
就咁咪開咧就要收咧
慘到阿媽都唔認得

2)
又係時間買 Keymansoho
今期仲有靚女做封面

2011-7-30

1)
美國足總決定開除巴特利
亦隨即委任奇連士文接手

Comment:
前者之前唔止一次同英超中型班扯上關係
今次下台隨時有更好出路

而奇哥接手就應該令美國既踢法更加進攻型
而佢咁鍾意用新人
能否成功為後防換血將係球隊改善戰績既關鍵

2)
魯爾被傳可能轉投馬拉加

Comment:
既然韋蘭歷克嫌佢慢
馬拉加又有咁多自己友
佢過檔既機會唔低

3)
費爾以自由身由費倫天拿轉投熱那亞

Comment:
佢雖然已經31歲
近年又傷患不絕
不過零機價都算搏得過

4)
AC米蘭忽然被指想以先借後買既形式接收阿古蘭尼
祖雲達斯亦被指再次打佢主意

Comment:
為左季尾有份踢歐國盃
做紫百合中場大腦
當然好過做豪門邊緣人

5)
早前同布雷西亞解約既薜比拿
宣佈重返祖家加盟布雷斯特

Comment:
佢同保桑以及施維斯達
絕對係近年法蘭西防線既3大廢柴
既然早前連意乙都踢唔掂
返法甲怕且繼續出醜

6)
阿根廷足總宣佈由沙比拿出任新教練

Comment:
佢既擦鞋仔波戰術
當年幾乎搞到巴塞做唔成6冠王
而佢當年亦令華朗重拾水準
可見功力唔錯
更重要既係佢一定比巴迪斯達更清楚一個指揮官對球隊既重要性

球隊戰績應該會有改善
不過能否登頂始終要睇佢搞唔搞得掂前線幾個大哥

7)
馬天尼向巴拉圭足總請辭
球隊隨即宣佈由艾斯接手

Comment:
阿根廷足總已宣佈由沙比拿接手
居然有傳媒估馬天尼係為左執教阿根廷而劈炮

8)
消息指費蘭迪斯即將入主昆士伯流浪
佢仲表態會放水買人

Comment:
除左套現成億英鎊既足主伊基史東外
最開心既怕且都係終於有錢增兵既禾洛克

9)
實特拿被指即將轉投士砵亭

Comment:
如果唔可以靠身材屈機
佢踢邊隊都係死路一條

10)
紐卡素拒絕外借蘭加俾伯明翰
佢地亦否認搵比耶回巢既傳聞

Comment:
連身為老嘢既舊將都同紐記扯上關係
又一次反映森遜既位置有幾危危乎

p.s.:
尋晚睇左一陣老嘢衛生波
杜布連果然寶刀未老
勁!

2011-7-28

1)
阿古路宣佈自己已1係曼城球員
消息指佢以3800萬鎊加盟曼城
雙方簽約5年

Comment:
隨住科蘭主動要求提前歸隊踢歐霸盃
佢離隊既可能性應該會降低
否則成條前線要重新打造
馬體會要爭取前4肯定難上加難

2)
羅馬被指想以1400萬歐元收購尼馬
取代勢必轉投祖雲達斯既胡仙歷

Comment:
卡迪維拿同埋辛迪卡蘇拿已經落實走人
如果再冇埋佢同埋羅斯仔
星散之後仲點應付兩條戰線?

3)
阿歷斯雖有隨車路士訪港
但繼續有消息指佢將被放棄

Comment:
話說當年負責買人既晏尼臣堅持為車仔引入阿歷斯
激到嘔血既摩連奴實行無聲抗議
送左隻輯錄左佢歷來於燕豪芬犯錯片段既DVD俾死對頭欣賞
當時負責剪片既正係保亞斯
所以佢最終有得留底先至離奇

4)
利物浦被指準備出價800萬鎊收購朗治

Comment:
除左中場中
其實前線都有少少人腳過剩既問題
仲要尼哥治又未賣得走

朗治雖然可以作為卡路爾既替補
但相對於左閘同埋防中
佢真係唔係利記而家最急住要搵既球員

5)
比基利亞被指成為阿仙奴既600萬鎊新防中人選

Comment:
為左長期入選國家隊
安德烈治明顯只係佢既搭腳石

近年阿根廷中後場既好波之人
多數都係來自防中
佢應該會係下一個

6)
紐卡素再次被指視禾洛克為替補荷西安歷基既人選

Comment:
禾洛克當日加盟維拉既轉會費雖然高達800萬鎊
不過事實證明佢唔值咁高身價
如果麥利殊最終決定俾機會青訓產品
5折散貨唔係冇可能

p.s.:
主場吞多沙地5蛋
頂級失望同埋扯火
但又唔覺得絕望

2011-7-27

1)
報導指假如紐卡素羅致艾丁失敗
佢地將會向熱刺提出收購迪科爾或者哥治

Comment:
熱刺兩個本土箭頭冇適應上既問題
當中長人上季踢單箭頭既效果相當唔錯
岩晒紐記踢4-5-1陣式

2)
柏度李安被指可能以借用形式返基達菲

Comment:
佢既踢法根本同摩連奴既4-3-3陣式唔夾
勉強冇幸福

3)
大衛基爾透露曼聯於轉會市場關閉前
仲會有一個交易
佢亦透露3個人選都係世界級球員

Comment:
雖然冇人會信費sir增兵完成既廢話
不過CEO同領隊竟然唔夾口供
始終令外界好奇怪

4)
利物浦已經同意將阿古蘭尼外借費倫天拿一季
不過仍有待紫百合同佢傾個人條件

Comment:
費倫天拿根本負擔唔起佢既8萬鎊週薪
如果佢仲想踢歐國盃
減人工係佢唯一既選擇

p.s.:
假如真係合併阿根廷既甲組同埋乙組
河床咪變相冇降到班?

2011-7-26

1)
阿根廷足總決定同巴迪斯達解約

Comment:
講真佢既罪名隨時多過7宗罪
不過最關鍵既係佢冇為球隊搵個合適既 playmaker

由初期用盡3防中
到後來搵美斯墮後客串
根本都唔係辦法

08年佢帶隊贏奧運
人腳勁固然係原因
有個稱職既指揮官亦係關鍵

當時列基美雖然可能又鬧情緒
(有北京球迷見到佢於4強鬥巴西既前一晚
竟然半夜3點獨自去酒店既後花園散步)
但至少都交左6成功課
球隊亦總算有人派牌

2)
加高被傳考慮回流阿根廷,加盟小保加

Comment:
條友踢左西甲咁多年
表現都算不過不失
加上又咁後生
使咩咁快返祖家搵食

3)
李奧曲加即將加盟保頓

Comment:
條友近年發展停滯不前
紀律問題同埋實力見底都係主因
轉投同屬英超中型班既保頓係佢既合理選擇

之前居然傳過拿玻里同埋西維爾都打佢主意
真係唔多 make sense

4)
史雲斯由於未能同魯迪治就週薪達成協議
令交易爛尾

Comment:
唔肯去史雲斯
可能令佢連最後一個踢英超既機會都冇埋
連蘭加都隨時要返英冠踢伯明翰
又何況佢

5)
阿倫史勿夫被指唔肯減薪重返列斯
而寧願於紐卡素食埋最後一年6萬鎊週薪既肥糧

Comment:
如果傳聞屬實
擺明係要錢都唔要前途

2011-7-25

1)
國米被指打算提出以先借後買既形式羅致泰維斯
亦再再再次有消息指話佢會留隊

Comment:
扑槌前用一季時間睇定條煩友會唔會玩嘢
如果報導屬實
白蘭加今舖都算叻返次

2)
費sir雖然話暑假唔會再買人
不過佢依然被傳考慮引入祖爾巴頓

Comment:
信費sir食得住隻野獸
但問題係既然中路既人腳本來已經唔係頂班
佢老人家應該做既係搵人取代費查以及卡域克
而唔係幫佢兩個搵替工

3)
查維馬天尼斯被傳成為阿仙奴既增兵對象

Comment:
條友早前先落實續約到2016年
傳聞既可信性極低

4)
車路士方面透露希望於8至10日內再落實兩個重要收購
英國傳媒估計應該係指柏斯托尼以及摩達歷
而巴勒莫方面亦表示佢地最大可能將前者賣俾車仔

Comment:
收購柏加唔順利
早兩日搞掂既西班牙牛奶咀防中又似係長線投資
肯定係救唔到近火既遠水
就算波亞斯要求林伯特同埋美利拉斯分擔更多既防守工作
球隊既截擊力仍略嫌不足

所以小弟相信佢地只會收購其中一個
另一個 quota 應該要留俾防中

5)
巴黎聖日早門落實同文尼斯簽約3年
消息指轉會費約800萬歐元

Comment:
羅馬當年俾人搵笨
用遠超市價既2000萬歐元簽佢
而家4折散貨真係蝕入肉

6)
韋根被指打算出價200萬鎊接收沙斯度

Comment:
條友係因為思鄉病而想離開富咸
去韋根根本解決唔到問題
單嘢可信性唔大

p.s.:
科蘭3代都羸過美洲國家盃
勁!!!